Wahonekelwa Ova Hembeleu
4 Naina, mokonda etyi tyatolelwe tyokunyingila mokupululukwa kwae nkhele tyitai, tulungukei* tyowoma wokwahahande pwoonwe pakale ou utalwa atiwa kehiwa-mo.+ 2 Onthwe noonthwe twapopilwa oviwa ovipe, ngavo;+ mahi ondaka veiva kayevepele ouwa, mokonda kavawanekelwe neyumba-nthumbi naava veitehelela. 3 Pahe onthwe vokuyumba-ko onthumbi twanyingila mokupululukwa kwae, ngeetyi ngwe apopia ati: “Andyinkhi ononyengo, atyimphe umwe okwaana, andyiti: ‘Ava kavakanyingila mokupululukwa kwange,’”+ namphila ovilinga viae viapwa-le kohale ponthyimbi youye.+ 4 Ngwe pena pamwe apopia onthiki ya pandu-vali ati: “Huku atalama kovilinga viae aviho, apululukwa monthiki ya pandu-vali,”+ 5 ati vali: “Kavakanyingila mokupululukwa kwange.”+
6 Naina, mokonda kuna vamwe nkhele vehenenyingile-mo, ngwe ava vokwapopilwa tete oviwa ovipe kavanyingilile-mo kombanda yokwehetavela,+ 7 konyima anake vali onthiki yatyo mwene motyiimbo tya Ndaviti, onthiki yatiwa “Hono”; ngeetyi tyapopiwa-le kombanda tyatiwa: “Hono ine onwe mutehelela etyi apopia, mwahatenekei omitima vienyi.”+ 8 Ine omu Susuwee+ evetwaile omo o momphangu yokupululukwa, opo ñgeno Huku kakatile vali kuna onthiki onkhwavo. 9 Naina nkhele kwakamba otyasapalo ovanthu va Huku mavapululukwa-po.+ 10 Mokonda omunthu wanyingila mokupululukwa kwa Huku, oo watalama umwe no kovilinga viae, ngeetyi Huku apululukilwe pokwamana ovilinga viae.+
11 Naina tulikwatehilei tunyingile mokupululukwa omo, opo pahakale nawike ulipaka mondyila yatyo oyo yokwehetavela.+ 12 Mokonda ondaka ya Huku ina omwenyo, nononkhono ononene,+ yatwa vali komutunga+ walipikwa nthele na nthele, inyingila umwe aitepula pokati ohande* nomphepo,* no pokwatokaikilwa omankhipa nomusa, ityivila okupunga omalusoko neetyi tyili momutima. 13 Kutupu otyipuka natyike tyaholama ngwe eheete,+ mahi ovipuka aviho vimuhoyo, vili vala poluhandya, komaiho a una meketupula evi twalinga-linga.+
14 Pahe, mokonda onthwe tuna omunene-nakwa wakanyingila keulu, Sesusi Omona wa Huku,+ tukakatelei mu etyi tuna-tyo tyokumupopia movaunyingi.+ 15 Onthwe omunene-nakwa tunae, hakuti omunthu wahametweetehila-mo onkhenda+ tyina atala okwayengenga kwetu, mahi onthwe tuna una wakondya-kondya-le novipuka aviho ngoonthwe, mahi wehena onkhali.+ 16 Naina, tufwenei kotyipundi tyounene tyokankhenda okanene tyehena-le otyinkhe pokupopia,+ opo tutambule onkhenda, atuvasi okankhenda okanene maketukwatesako momuvo watamo.