Okulilongesa okuundapa unene tyikahi ngokuhateka; matyikukuatesako pehepano, no komutwe wandyila tyina wamekulu
OVAKUENDYE NOVAHIKUENA
11 Linga Omunthu Wokuhole Ovilinga
OTYO OTYITYI?
Omunthu wokuhole ovilinga ha munthu wondende. Uundapa unene amone-vo okulia, akuateseko vakuavo. Uundapa umwe novilinga vina viatombwa novanthu.
OITYI OTYIPUKA OTYO TYESUKISILA?
Tyilinge tutyihole tyilinge katutyihande, omunthu una yokuundapa umwe. Mouye muno tuli, ovanthu ovanyingi vananga, kavetyihole tyokuundapa. Ove pahe ine ulikuatehila ulinge omunthu uhole ovilinga, momono oviwa. — Eclesiastes 3:13.
“Ove tyina uundapa unene, no ove muene ukala nawa, uhambukwa. Ehambu ankho ndyikala nalio tyina ndyilinga nawa ovilinga viange, olio liampha umwe ondundo ndyilinge omunthu uhole ovilinga. Ove ine uundapa unene, novanthu vekupopia nawa.” — Reyon.
ONONDUNGE MBO MBIMBILIYA: “Kuna ouwa omunyingi mokuundapa unene.” — Provérbios 14:23.
OITYI UPONDOLA OKULINGA?
Apa pena ovipuka vimwe upondola okulinga ulinge omunthu wokuundapa unene.
Lilongesa okulinga nawa ovipuka. Tyilinge ovilinga vyo meumbo, tyilinge ovilinga viove muene, tyilinge ovilinga vyo kosikola, tyina uti pokuvilinga, vilinga umwe nawa. Katutu-katutu otyo ulikuatehila ulinge liwa ovilinga viove, mahi tupu ovilingi umwe nawa. Tyina otyilinga utyivila umwe okutyilinga nawa, tyikuhambukiswa.
ONONDUNGE MBO MBIMBILIYA: “Wamona omunthu omunongo movilinga viae? Makakala ponthele yo nohamba, kamakakala ponthele yovanthu vala.” — Provérbios 22:29.
Soka oñgeni ovilinga viove vikuatesako vakwenyi. Tyina ulinga umwe nawa ovilinga viove, vakwenyi navo vakala nawa. Ine ulinga nawa ovilinga vyo meumbo, vakwenyi mavatulu omutima, avahakala notyiho.
ONONDUNGE MBO MBIMBILIYA: “Okuava tyihambukiswa vali tyipona okupewa.” — Ovilinga 20:35.
Wahalinge vala etyi watumwa. Wahalinge vala omunthu wokukuluminya novipuka. Lipulukwa umwe nawa, olingi umwe nawa ovipuka. Omunthu ulinga ngotyo, kalingi vala ovipuka mokonda tyatiwa tyilinga, mahi omokonda tyatuka umwe komutima. — Mateusi 5:41.
ONONDUNGE MBO MBIMBILIYA: ‘Otyiwa ulinga wehetyilinge tyakuluminyua, mahi tyilinga mokonda otyo muene wahanda.’ — Filemo 14.
Wehesuke vala novilinga tyapwa. Tuahula umwe okuti tuna okuundapa unene, mahi katupondola okuliipaa-ko vala kovilinga viatyo. Tuna okuti, otyo tuundapa, otyo pamwe tupululukwa-po tulie-vo etyi tuaundapa.
ONONDUNGE MBO MBIMBILIYA: “Hahe vali okupululukwa-po katutu, tyipona okuundapa unene olambesa, otyo okutaata vala omphepo.” — Eclesiastes 4:6.