Omokonda Yatyi Moisesi Aila Nkholo

TALA Moisesi utunda mo Egitu nokuhateka. Uluete ovalume ava vemuhatekesa? Utyii omokonda yatyi vahandela okuipaa Moisesi? Tutalei omokonda yatyi.

Moisesi wekulila mondyuo ya Farao, omutimini wo Egitu. Iya Moisesi akala omulume omunene wokuna ounongo omunyingi. Ankho Moisesi utyii okuti hamu Egitu ko, ombunga yae yotyotyili ova Isilayeli.

Onthiki imue, etyi ankho Moisesi ena omanima 40, asoko okukatala oñgeni ovanthu vae ova Isilayeli vekahi. Etyi ehika oko watala okuti ankho vekahi nokutekulwa omapita unene. Moisesi amono omu Egitu umwe ankho uveta omu Isilayeli. Moisesi atale kononthele ambuho, etyi amona okuti nawike umueete, avete omu Egitu oo alo ankhia. Iya otyivimbi Moisesi etyiholeka meheke.

Monthiki onkhuavo Moisesi wakatalelapo vali ovanthu vae. Ankho usoka okuti upondola okuvekuatesako okutunda moupika. Mahi, wamona ova Isilayeli vevali vekahi nokulwa. Moisesi apopila una ankho wapengesa okuti: ‘Omokonda yatyi uvetela omukuatate wove?

Omulume oo ati: ‘Olie wekulinga omutumini nomukoyesi wetu? Mohande okundyipaa ngetyi waipaa omu Egitu una?’

Moisesi akala nouoma. Ankho wanoñgonoka okuti etyi alinga omu Egitu una, ovanthu aveho vetyiiva. Na Farao wetyiiva, atumu ovanthu vakaipae Moisesi. Otyo Moisesi ekahi nokutilila mo Egitu.

Etyi Moisesi atunda mo Egitu, wakakalele kokule, kotyilongo tyo Midiã. Kotyilongo oko avasiko ombunga ya Jetru, iya anepe omona wae ankho utiwa o Zipora. Iya Moisesi akala omunthita wonongi mba Jetru. Wakala motyilongo tyo Midiã omanima 40. Pahe ankho una omanima 80. Onthiki imue, etyi Moisesi ankho alisa onongi mba Jetru, wamona otyipuka tyimue tyihuvisa, tyapilulula omuenyo wae auho. Ikula efo, tutale otyipuka patyi tyahuvisile Moisesi.