Mwisesi Wahulile Kokufenda Siovaa

Ko Isitu, ombunga ya Sakoo ova Isilayeli. Etyi Sakoo na Susee vankhia, ohamba onkhwavo Falaoo aihimbika okutumina. Akala nowoma etyi atala okuti ova Isilayeli vekahi nokukala vali ovanyingi tyipona ova Isitu. Pahe, Falaoo akalesa ova Isilayeli ovapika. Evekuluminya okulinga omatisolu, nokuundapa unene momapia. Ova Isitu avakuluminya ova Isilayeli okuundapa unene, mahi no ngootyo avatwalako nokuliyawisa. Mokonda Falaoo ketyihandele, atumu okwipaa omalukembe aeho ovakwendye ova Isilayeli. Tyina usoka oñgeni otyo tyakalesile ova Isilayeli?

Omukai umwe omu Isilayeli utiwa o Sokembende ankho wakutula olukembe lumwe oluwa omukwendye. Opo emuhupise, emupake mosesu eiholeka momayenga Mondongi Nilu. Miliaa omphange yolukembe, akala popepi otyo emuyunga.

Omona wa Falaoo aende mondongi opo ekelikohe, amono osesu. Mosesu avasi-mo olukembe lukahi nokulila, emwetehilamo okankhenda. Miliaa apulu okuti: ‘Ndyipondola okukaihana omukai ekutekulileko olukembe olu?’ Omona wa Falaoo etavela, Miliaa akaihana me yae Sokembende. Omona wa Falaoo apopi okuti: ‘Polapo olukembe olu kelutekule ame ha andyikufete.’

Etyi omona ekula, Sokembende emutwala komona wa Falaoo. Omona wa Falaoo emuluku okuti o Mwisesi akala omona wae. Mwisesi atekulwa ngatyina omona wohamba, upondola okukala novipuka aviho ahanda. Mahi Mwisesi kalimbilwe Siovaa. Ankho utyii okuti omu Isilayeli, ha mu Isitu. Aholovona okufenda Siovaa.

Etyi atuukisa omanima 40, Mwisesi ati mandyikwatesako ovanthu va Siovaa. Etyi amona omu Isitu uveta omupika omu Isilayeli, Mwisesi avete omu Isitu ankhi. Mwisesi aholeka otyivimbi meheke. Etyi Falaoo etyiiva, ahande okwipaa Mwisesi. Mwisesi akahateka no kotyilongo tyitiwa o Mindiyaa. Siovaa atwalako okumutekula.