Oñgeni Olukembe Moisesi Ayovolwa

TALA olukembe olu lukahi nokulila, otyo lukuata momunwe womuhikuena. Olukembe olu o Moisesi. Ove utyii olie omuhikuena ou omuwa? Omona wa Farao ohamba yomo Egitu.

Ina ya Moisesi ankho waholeka olukembe luae alo luakala no nohanyi ononthatu. Mokonda ankho kahandele luipawe nova Egitu. Mahi, ankho utyii okuti onthiki imue Moisesi upondola okuvasiwa. Moluotyo, walinga otyipuka tyimue opo emuyovole.

Wapola osestu, eipangiya nawa opo muhanyingile omeva. Iya apake Moisesi mosestu oyo, ekeipaka peholi limue eele Mondongi itiwa o Nilu. Apopila Miriã omphange ya Moisesi, akalele popepi opo atale etyi matyipiti nae.

Omona wa Farao omuhikuena ankho ulauka Pondongi Nilu okukelikoha. Tyina akatala ñga osestu ikahi meholi. Iya atumu omukainthu wae okuti: ‘Enda kampholele osestu oyo.’ Etyi omuhikuena aikula osestu, ankho muna olukembe lumue oluwa. Olukembe olo ankho lukahi nokulila, iya omuhikuena akala nokankhenda nae. Ankho kahandele aipawe.

Miriã afuenepo. Umueete polutalatu olu? Miriã apulu omona wa Farao okuti: ‘Wahanda ndyikaihane omukai umwe omu Isilayeli, ekekunyamisileko olukembe olu?’

Omuhikuena ati: ‘Yoo, nahanda.’

Miriã akahateka liwa liwa okukapopila me yae. Etyi me ya Moisesi eya, omuhikuena emutolela okuti: ‘Tambula olukembe olu kelunthekulileko, ndyikufete.’

Ngotyo me ya Moisesi, watekula omona wae muene. Konyima etyi Moisesi ekula nawa, ina emutuala komona wa Farao. Omuhikuena oo, atekula Moisesi ngomona wae muene. Ongotyo Moisesi ekulila meumbo lia Farao.