Oñgeni Mokala Nombunga Ina Ehambu

Okukala Noupanga novo Hoivi

Jennya wati: Me ya Ryan apeho umphopia omapita. Tupu, tyina tukatalelapo ovotate navo vapopia omapita Ryan. Mahi, ame nalumwe namuene ovotate vapopia omapita omunthu omukuavo! Okukatalelapo ombunga tyilinge yange ine oya Ryan, tyitunumanesa unene.

Ryan wati: Me yange nalumwe asokele okuti kuna omunthu ukahi nawa pala okunepa nomona wae, ngotyo tunde ponthyimbi oe ankho upopia omapita Jenny. Iya ovohe ya Jenny apeho vamphenya. Pahe otyitateka omokonda Jenny wamema ovohe, iya ame ndyiamena vange, nonthue atuhimbika okulipenya.

OVITATEKA novo hoivi hamwe tyina tuvitala mo nosinema vipondola okuyolesa, mahi, okukala navio momuenyo wetu katyiyolesa. Omukai umwe ko India utiwa o Reena wati: “Mokueenda kuomanima maivi apeho ulipaka motyinepo tyetu. Iya apeho ndyinumana nomulume wange mokonda ame hilingi ngotyo me yae. Oe apeho ankho una okuholovona inkha mayembe kuame ine uyemba ku ina.”

Omokonda yatyi vamwe velipakela potyinepo tyovana vavo? Jenny wapopiwa pombanda, upopia ehunga limwe. Oe wati: “Mokutala tyivepuiya unene okutala omona wavo makatekulwa nomona mukuavo wehetyii nawa oñgeni tyitekulwa ombunga.” Dilip omulume wa Reena tupu upopia ehunga ekuavo. Oe wati: “Ovohe vokuatekula ovana vavo hamwe velitehelela okuti vekahi nokupakwa ponthele. Ovo tupu vasukalala nokuti omona wavo utupu ounongo wokueendesa nawa otyinepo.”

Mahi tupu, ovikando vimwe ovana ovo vakonga ovohe velipake motyinepo tyavo. Mongeleka, Tala Michael na Leanne ovalinepi vakala ko Australia. Michael wati: “Leanne watunda mombunga imwe ina oupanga omuwa, omu kese umwe apopia etyi asoka. Moluotyo, etyi tuelinepa, oe apeho ankho ukapula tate yae konthele yomatokolo onthue tuesukisa okulinga. Tate yae ankho omunongo, mahi ankho ndyinumana mokonda oe ankho kapulu kwame ukapula tate yae!”

Tyotyili, tyina ovohe velipaka motyinepo tyovana vavo tyipondola okuete ovitateka. Okuti nove otyo ukahi ngotyo? Oñgeni tyikahi oupanga wove novo hoivi, tupu oñgeni tyikahi oupanga wauna welinepa nae no o tate yove? Tala ovitateva vivali vipondola okumoneka neetyi upondola okulinga konthele oyo.

OTYITATEKA 1: Una muelinepa nae wayemba unene kovohe. Omulume umwe utiwa o Luis ko Espanha, wati: “Omukai wange usoka okuti inkha katukala popepi novohe, otyo tyilekesa okuti katuvehole. Tupu, oe wayawisako okuti: “Etyi omona wetu akutulwa, ovotate ankho veya okututalelapo ononthiki ambuho, iya otyo ankho tyinumanesa omukai wange. Iya atyituetela ovitateka ovinyingi.”

Ombatelo: Okupopia konthele yotyinepo, Ombimbiliya yati: “Omulume masipo he na ina, elihonyeka nomukai wae, iya avakala vala olutu luike.” (Gênesis 2:24) Okukala “olutu luike” tyavilapo vali tyipona vala okukala kumwe. Tyotyili, otyo tyilekesa okuti omulume nomukai pahe vakala ombunga omphe—vena okusuka vali kese umwe namukuavo tyipona onombunga mbavo oku vatunda. (1 Coríntios 11:3) Tyotyili, aveho omulume nomukai vena okuhumba ovohe, iya otyo tyakutikinya okukala nesuko navo. (Efésios 6:2) Mahi, oñgeni molingi inkha ulitehela okuti una muelinepa nae wesuka vali unene no o tate yae tyipona ove?

Oityi upondola okulinga: Nkhele soka nawa. Okuti una welinepa nae tyotyili wayemba vali kovohe ine ove wehena oupanga ngoo novo tate yove? Inkha ongotyo, onkhalelo ove watekulua nombunga yove ikukalesa ñgeni konthele yotyo? Okuti una onkhi?—Provérbios 14:30; 1 Coríntios 13:4; Gálatas 5:26.

Tyesukisa utale nawa omakumbululo omapulo oo. Mahi tyakolela ove ulinge ngotyo. Anthi, inkha apeho motyinepo tyenyi muna ovitateka konthele yo hoivi, otyitateka havo ko, onue muene.

Ovalinepi ovanyingi vena ovitateka mokonda kavetyivili okulipakelamo. Okuti upondola okutala ovipuka ngetyi una welinepa nae evitala? (Filipenses 2:4; 4:5) Tala etyi tyalingile Adrián omulume umwe ko Mexico. Oe wati: “Omukai wange wekulila mombunga yonondyaya, moluotyo ame ankho hihande okukala unene novo tateivi. Ame ankho ndyilityilika okulihonyeka navo movipuka aviho mokueenda kuomanima omanyingi. Otyo tyaetele ovitateka motyinepo tyetu mokonda omukai wange ankho nkhele uhanda okukala unene nombunga yae, haunene na ina.”

Moluotyo, Adrián atokola okupola pokati konthele yotyo. Oe wati: “Namphila ame ankho ndyityii okuti tyina omukai wange alinga oupanga no vohe, tyipondola okumuetela ovitateka, mahi hapeho okukala navo tyipondola okueta ovitateka. Moluotyo andyiovola okulinga vali oupanga nokutualako noupanga omuwa novo tateivi.”b

HETEKELA ETYI: Honeka pombuelo oityi ove na una muelinepa nae mutavela konthele yo vo hoivi. Inkha tyitavela, himbika nokuti “ame ndyisoka okuti . . .” Iya tyina wamamane, mukuenyi nae apopi etyi asoka. Undapelei kumwe pala okusoka oityi mupondola okulinga opo mulikuateseko.

OTYITYAKEKA 2: Ovo hoivi apeho velipaka motyinepo tyenyi, natyina mueheveitile. Omukai umwe utiwa o Nelya ko Kazaquistão wati: “Momanima epandu-vali otete otyinepo tyetu ankho tukala omuvo omunyingi nombunga yomulume wange. Ovitateka vimoneka mokonda ankho maivi upopia konthele yoñgeni tuna okutekula omona wetu, konthele yokuteleka nokusukukisa ondyuo yetu. Andyipopi nomulume wange na maivi konthele oyo, mahi otyo atyituetela vali ovitateka ovinyingi!”

Ombatelo: Tyina wanepua ine wanepa, pahe kukahi vali mombuelo youtumini wo voho. Ombimbiliya ipopia okuti: “Omutwe womulume o Kristu, iya omutwe womukai omulume wae.” (1 Coríntios 11:3) Anthi, ngetyi tyapopiwa pombanda, aveho, omulume nomukai vena okuhumba ovohe. Provérbios 23:22 itupopila okuti: “Tehelela tate yove wekueta kouye, iya uhatombe me yove mokonda pahe wakulupa.” Mahi, inkha ovoho ine ovohe yauna welinepa nae vahanda okutualako okulipaka unene motyinepo tyenyi, nokumutumina?

Oityi upondola okulinga: Nomutima wahiliya, ovola okunoñgonoka omokonda yatyi usoka okuti ovo vekahi nokulipaka motyinepo tyenyi. Ryan wapopiua pombanda wati: “Ovikando vimwe ovohe vesukisa okunoñgonoka okuti ovo nkhele vakolela unene momuenyo wovana vavo.” Ovo hamwe kavetyilingila tyawina iya otyo tyipondola okutetululwa, mokuundapesa elondolo Liombimbiliya liati, “Tualeiko okulikoleleya pokati na vakuenyi, nokulievela pokati tyihakuluminyua, inkha umue ena ehunga liokunumana na mukuavo.” (Colossenses 3:13) Mahi oityi molingi inkha tyina ovo hoivi velipaka unene motyinepo tyenyi tyimuetela ovitateka?

Ovalinepi vamwe vetyivila okulinga oupanga wapola pokati no vohe. Otyo katyilekesa okuti una okuvetomba.c Pamwe, otyiwa okulekesa nawa movipuka ulinga okuti una muelinepa nae oe wapaka tete momuenyo wove. Mongeleka, omulume umwe ko Japão utiwa o Masayuki wati: “Inkha ovotate vapopia etyi vasoka, ame hivenumanena. Ndyihinangela okuti nahanda okukala nombunga yapama. Tete tala oñgeni una muelinepa nae asoka konthele yelondolo olio.”

HETEKELA ETYI: Popia na una muelinepa nae oityi tyimunumanesa tyina ovo tate yenyi velipaka motyinepo tyenyi. Amuho, honekei pombuelo, apa muesukisa okuoyela pokukala no votate yenyi, no ñgeni mamulityilika kuvo mahi otyo mukala nonthilo navo.

Ovitateka ovinyingi no voheivi vipondola okutepululwa mokuimbuka omokonda yatyi velipakela motyinepo tyenyi nokuhayeke ovitateka ovio viete omalutañgu pokati kenyi. Konthele yotyo, Jenny wati: “Pamwe tyina tutañguna nomulume wange konthele yo votate tyeta omuihamo omunene, mahi tyiihamesa vali unene oputyina tuhimbika okupopia oviponyo vio votate yetu. Mahi, pahe tuelilongesa okuhapopi vali oviponyo vio votate, atuovola okutetulula ovitateka. Okulinga ngotyo, pahe tuna vali oupanga wapama pokati ketu.”

[Onondaka Poutoi]

LIPULA . . .

▪ Ovituwa patyi oviwa ovo tateivi vena?

▪ Oñgeni ndyipondola okuhumba ovo tate mahi anahatombo una tuelinepa nae?