Okuendela Mospilitu Tyitukuatesako Okufuisapo Elipakulo Lietu
“Tualeiko okuendela mospilitu, opo muhalinge ehando nalike liolutu.”—GÁLATAS 5:16.
1. Onombatisimu patyi mbalingilwe monthiki yo Pendekoste?
OVALANDULI va Jesus vapopile momalaka mo Pendekoste yo 33 P.K., konyima avambatisalwa nospilitu sandu. Iya avalekesa otyiawa tyihuvisa tyospilitu. (1 Coríntios 12:4-10) Oñgeni otyiawa otyo nelongomona lio apostolu Petulu viakalesile ovanthu? Ovanyingi “tyevehikile komitima.” Mokonda yelondolo lia Petulu, velivela avambatisalwa. Ehipululo liati: “Vana vetavela ondaka yae nomutima auho avambatisalwa. Monthiki oyo akuyawisa ovanthu ovityita omakwi etatu.” (Atos 2:22, 36-41) Ngetyi Jesus alongesile, ovo ankho vena okumbatisalwa momaande menyina lia Tate, no lio Mona no liospilitu sandu.—Mateus 28:19.
2, 3. (a) Hangununa oñgeni okumbatisalwa nospilitu sandu tyelikalela nokumbatisalwa menyina liospilitu sandu. (b) Omokonda yatyi hono Ovakristau votyotyili vena okumbatisalwa momeva?
2 Anthi, okuti okumbatisalwa nospilitu sandu tyelikalela nokumbatisalwa menyina liospilitu sandu? Enga. Vana vambatisalwa nospilitu sandu vatyitwa otyivali avakala ovana voviveli va Huku. (João 3:3) Ovo valembulwa opo vakale ono Hamba no vanakwa Mouhamba wa Huku, nokulinga onthele yolutu lua Kristu. (1 Coríntios 12:13; Gálatas 3:27; Revelação 20:6) Ngotyo, ombatisimu oyo—okumbatisalwa nospilitu sandu—oyo Jeova alingile okupolela monthiki yo Pendekoste pokuholovona vana mavakakala onomphinga na Kristu. (Romanos 8:15-17) Iya okumbatisalwa momeva menyina liospilitu sandu, tyikahi nokulingwa apeho movionge viovanthu va Jeova mononthiki mbetu tyihangununa tyi?
3 Okumbatisalwa momeva tyilekesa okuti Omukristau welipakula ku Jeova Huku. Na vana vokuaihanwa keulu vena okumbatisalwa ngotyo. Mahi, okumbatisalwa momeva tupu tyesukisa pala ovalume ovanyingi novakai hono vena ekevelelo liokukala apeho kombanda yoohi. Kese ekevelelo omunthu ena, opo etavelwe na Huku wesukisa okumbatisalwa momeva menyina lia Tate no lio Mona no liospilitu sandu. Ovakristau aveho vambatisalwa ngotyo, vena “okutualako okuendela mospilitu.” (Tanga Gálatas 5:16.) Okuti ove ukahi nokuendela mospilitu nokufuisapo elipakulo liove?
Oityi Tyihangununa “Okuendela Mospilitu”
4. Oityi tyihangununa “okuendela mospilitu?”
4 “Okuendela mospilitu” tyakutikinya okutavela ospilitu sandu, okuyeka ikuhongolele. Otyo tyihangununa okuyeka ospilitu sandu ikutumine muaviho ulinga kese nthiki. Gálatas okapitulu 5 kalekesa oñgeni okuhongolelwa nospilitu sandu tyelikalela nokuhongolelwa nolutu.—Tanga Gálatas 5:17, 18.
5. Okutavela ehongolelo liospilitu sandu tyakutikinya okulityilika tyi?
5 Inkha ove ukahi nokuhongolelwa nospilitu sandu, moovola okulityilika ovilinga violutu. Ovilinga vimwe ovievi, “oumbalehi, nouheha, nokuhelityilika kovivi, nokufenda ovilolo, noumbanda, noundyale, nomaluei, nounkhuelume, nonyengo, nomalutañgu, nomaliyapauko, okuyapuka metavelo, nonkhi, nounkholwa, novipito viahaviukile.” (Gálatas 5:19-21) Otyo tyilekesa okuti ove “wipaa nospilitu ovituwa violutu.” (Romanos 8:5, 13) Otyo matyikukuatesako okupaka omutima wove movipuka viospilitu, nokutavela ehongolelo liayo, tyipona okuyeka omahando olutu ekuhongolele.
6. Popiapo ongeleka yetyi tyesukisa opo tukale notyinyango tyospilitu.
6 Putyina ospilitu sandu ikuhongolela, ove ukala novituwa vihambukiswa Huku, “otyinyango tyospilitu.” (Gálatas 5:22, 23) Ngotyo, ove wimbuka okuti wesukisa okulinga ononkhono. Mongeleka: Omulimi ulima oohi. Mahi, inkha kutupu omutenya nomaande, kamateye. Tupondola okueleka ospilitu sandu nomutenya. Ospilitu sandu yesukisa opo tukale notyinyango tyayo. Anthi, okuti omulimi upondola okuteya inkha kalingi ononkhono? (Provérbios 10:4) Onkhalelo ulima oohi yomutima wove, oyo mailekesa ouwa nounene wotyinyango tyospilitu muove. Ngotyo, lipula, ‘okuti ndyikahi nokuyeka ospilitu sandu inkhalese novituwa viayo mokuundapa kumwe nayo?’
7. Omokonda yatyi okulilongesa nokusokolola viakolela unene inkha uhanda okukala notyinyango tyospilitu sandu?
7 Opo omulimi ateye ovilia ovinyingi tupu ovikuna viae viesukisa omaande. Opo ukale notyinyango tyospilitu, wesukisa omaande otyili avasiwa Mombimbiliya, no mewaneno lio Vakristau hono. (Isaías 55:1) Ove uhole okupopila ovanthu okuti Ovihonekwa viahonekwa nombatelo yospilitu sandu. (2 Timóteo 3:16) Tupu, omupika wekolelo nokualunguka utuavela enoñgonoko liesukisa unene liomaande asukuka otyili Tyombimbiliya. (Mateus 24:45-47) Otyo tyayandyuluka nawa. Opo tuhongolelwe nospilitu sandu, tuna okutanga Ondaka ya Huku nokusokolola nawa etyi tuatanga. Inkha ukahi nokulinga ngotyo, ukahi nokuhetekela ongeleka ongwa yovauli “vaovolele nombili nokuovolola nawa” etyi valongesilwe. Tala okuti no noandyu mbesuka unene notyili tyopaspilitu konthele Yombuto yalaelwe newaneno lio Vakristau ovalembulwa.—Tanga 1 Pedro 1:10-12.
Okuhongolelwa Nospilitu—Ñgeni?
8. Omokonda yatyi kuove tyakolela okuita ku Jeova ospilitu yae?
8 Opo uhongolelwe nospilitu, wesukisa vali tyipona okulilongesa vala Ovihonekwa nokusokolola. Una okutualako okuita ombatelo nehongolelo lia Jeova. Oe upondola “okulinga etyi tyavilapo vali unene tyipona ovipuka aviho tuita ine tusoka.” (Efésios 3:20; Lucas 11:13) Oñgeni mokumbulula inkha umwe ukupula okuti: “Omokonda yatyi ndyina okutualako okuita inkha Huku wiyale ‘ovipuka nesukisa tyina nkhele nehemuite’?” (Mateus 6:8) Ehunga limwe, wiitila ospilitu sandu, okulekesa okuti waimbuka okuti wayumba onthumbi mu Jeova. Mongeleka, inkha umwe ukuita ombatelo, ulinga etyi upondola opo umuvatele. Ulinga tupu ngotyo, omokonda wekuyumba onthumbi. (Tyieleka na Provérbios 3:27) Tupu, Jeova tyimuhambukiswa tyina umuita ospilitu yae, moluotyo, ukuavelayo.—Provérbios 15:8.
9. Oñgeni okuenda komaliongiyo Ovakristau tyikukuatesako okuhongolelwa nospilitu ya Huku?
9 Ove mohambukwa okutala okuti, onkhalelo onkhuavo opo uhongolelwe nospilitu ya Huku, yakutikinya omaliongiyo etu novionge. Okulinga ononkhono mbokuenda komaliongiyo nokutehelela nawa momaliongiyo oo tyakolela unene. Okulinga ngotyo tyitukuatesako okunoñgonoka “alo umwe ovipuka viaya kohi via Huku.” (1 Coríntios 2:10) Tupu, mopolo esilivilo enene kokuava apeho omakumbululo momaliongiyo. Soka komaliongiyo waile mo nosimano ononkhuana mbokualamba. Ovikando viñgapi wayelulile okuoko opo ukumbulule, okulekesa ekolelo liove? Okuti ove wesukisa okulinga vali nawa konthele oyo? Inkha ongotyo, tokola etyi molingi mo nosimano mbulandulako. Jeova matale ombili yove, nokukuavela ospilitu yae opo ikukuateseko okupola vali esilivilo tyina wenda momaliongiyo.
10. Okuendela mospilitu tyakutikinya okupopila tyi vakuenyi?
10 Okuendela mospilitu tyakutikinya okutavela etyi tuaitwa mu Revelação 22:17 yati: “Iya ospilitu nondombwa vatualako okuti: ‘endyu!’ Iya una wetyiiva atie: ‘Endyu!’ Iya una wokuna ohunga eye. Una wahanda atambule otyali omeva omuenyo.” Ospilitu yundapa menyina lionthumbo yondombwa omulembulwa, ikahi nokukonga ovanthu veye okunwa omeva omuenyo. Inkha ove wetavela etyi wakongua okuti “Endyu!” noove watokola okupopia okuti, “Endyu!”? Elao limwe enene okuundapa movilinga ovio viokuyovola omuenyo!
11, 12. Oñgeni ospilitu sandu ikuatesako ovilinga viokuivisa?
11 Ovilinga ovio viakolela pahe vikahi nokufuiswapo nehongolelo liospilitu sandu. Onthue tuatanga oñgeni ospilitu sandu yakuatesileko Ovakristau votete okuikula onotelitoliu onomphe pala onomisionaliu. Apostolu Paulu nomapanga ae “vailikilwe nospilitu sandu okupopia ondaka motyilongo tyo Asia,” nokuhanyingila mo Bitinia. Onthue katutyii nawa oñgeni ospilitu yeveilikile okuenda konomphangu ombo, mahi, tyayandyuluka nawa okuti ospilitu yahongolelele Paulu kepia enene ko Europa. Oe wakalele nemonekelo liomulume woko Masedonia ukahi nokuita ombatelo.—Atos 16:6-10.
12 Hono, ospilitu ya Jeova tupu ikahi nokuhongolela ovilinga viokuivisa ouye auho. Jeova hono kaundapesa vali omamonekelo pala okuava ehongolelo, mahi, uhongolela ovalembulwa nospilitu sandu yae. Iya ospilitu ilunda ovakuatate no nomphange okulinga atyiho vapondola pala okuivisa nokulongesa. Noove ukahi nokuundapa movilinga ovio viokuakolela. Okuti upondola okuyawisa ehambu liove movilinga ovio oviwa?
13. Oñgeni ove upondola okutavela ehongolelo liospilitu sandu? Ava ongeleka.
13 Ove upondola okutavela ehongolelo liospilitu sandu mokuundapesa etyi ulongeswa novanthu va Huku. Tala ongeleka ya Mihoko omukainthu umwe ko Japão. Etyi omukokoli-ndyila omupe, oe ankho ulitehelela okuti kafuilepo pala okukatalelapo ovanthu, ankho ketyii oñgeni mapopi monkhalelo maikuatesako ovanthu okukala nesuko. Momuvo watyo oo, Ovilinga Vietu Viouhamba, waeta onondonga onongwa konthele yokutalelapo ovanthu. Tupu, akulingwa ombruchula yati, Como Ter uma Vida Satisfatória. Otyo tyakuatesako haunene mepia lio Japão. Mihoko waundapesile onondonga mbaavelelwe pala okuundapesa ombruchula oyo, haunene okutalelapo ovanthu. Momuvo uhehi, Mihoko ahimbika okulilongesa Ombimbiliya na vana ankho ñgeno vehetavelele okulilongesa. Oe wati, “pahe andyililongesa novanthu ovanyingi, vehikile alo umwe 12, iya vamwe ankho vena okukevelela!” Tyotyili, tyina wendela mospilitu, nokuundapesa ehongolelo liawa novaumbili va Jeova, upondola okuteya unene.
Yumba Onthumbi Mospilitu ya Huku
14, 15. (a) Oñgeni ovanthu ovakuankhali vapondola okutyinda omuenyo welikuata nelipakulo liavo? (b) Oñgeni ove upondola okuvasa omapanga omawa?
14 Mokonda umuumbili waholovonua, ove una ovilinga pala okufuisapo. (Romanos 10:14) Hamwe ulitehelela okuti kwafuilepo pala okulinga ovilinga ovio. Mahi, ngetyi Huku akuatesako ovalembulwa, nae mekukuatesako okulinga otyilinga otyo. (Tanga 2 Coríntios 3:5.) Ove upondola okutyinda omuenyo welikuata nelipakulo liove mokulinga nawa ovilinga viove nokuyumba onthumbi mospilitu ya Huku.
15 Tyotyili, katyapepukile kuonthue ovanthu ovakuankhali okutyinda omuenyo welikuata nelipakulo tualinga ku Huku yetu Jeova uhena nkhali. Otyitateka tyimwe, omokonda omapanga ove amwe apondola okunumana mokonda yonkhalelo yove omphe yomuenyo iya vapondola ‘okukupopia omapita.’ (1 Pedro 4:4) Mahi, wahalimbueko okuti ove una omapanga omape akolela vali unene, Jeova na Jesus Kristu. (Tanga Tiago 2:21-23.) Tupu, tyakolela okunoñgonoka ovakuatate no nomphange mewaneno liove, valinga onthele “yovakuatate mouye auho.” (1 Pedro 2:17; Provérbios 17:17) Jeova uundapesa ospilitu yae opo ekuvatele okukala nomapanga maekukuatesako okulinga oviwa.
16. Nga Paulu, oñgeni ‘okunama kupondola okukuhambukiswa’?
16 Namphila ukahi pokati yomapanga ekukuatesako mewaneno, hamwe tyipondola okukupuiya okutetulula ovitateka via kese nthiki. Ovitateka ulwa navio pamwe vipondola okukusoyesa unene, ngatyina omutengi wove ovitateka vala. Mahi, oo omuvo wokulikuambela ku Jeova okuita ospilitu sandu yae. Apostolu Paulu wahonekele okuti: “Tyina nanama, opo ndyina ononkhono.” (Tanga 2 Coríntios 4:7-10; 12:10.) Paulu ankho utyii okuti ononkhono mba Huku mbupondola okuvatela ovanthu vanama, kese tyitateka vena. Ngotyo, ononkhono mba Huku, mbupondola okukupameka namphila wasoya nokuesukisa ombatelo. Paulu wahonekele okuti, ‘nahambilwa okuanama.’ Noove upondola okulitehelela ngotyo!—Romanos 15:13.
17. Oñgeni ospilitu sandu ipondola okukuvatela okuhika oku wahanda okuenda?
17 Tuesukisa ospilitu sandu opo tutyinde omuenyo welikuata nelipakulo lietu ku Huku. Soka ñgeno umuendesi wouato utahua nomphepo. Ehando liove okuumbila Jeova apeho. Ospilitu sandu ikahi ngomphepo ove uhanda opo itahe owato opo ukehike nawa oku uhanda okuenda. Ove kuhande okuhika ine okukala popepi nomphepo youye wa Satanasi. (1 Coríntios 2:12) Ove una okuimbuka opi kuna omphepo ongwa nokuivasa. Omphepo oyo ospilitu sandu. Ospilitu sandu maikuhongolela Nondaka ya Huku neongano lihongolelwa nospilitu yae, mondyila yaviuka.
18. Pahe etokolo liove olipi, iya omokonda yatyi?
18 Inkha ukahi nokulilongesa no nombangi mba Jeova, nokuna ehambu liokuliongiya navo, mahi kunelinge etokolo liakolela liokulipakula nokumbatisalwa, lipula ‘omokonda yatyi ukahi nokulikondolela?’ Inkha waimbuka otyilinga tyospilitu sandu pala okufuisapo ehando lia Jeova hono, nokuapanda etyi ikahi nokulinga, tokola okulinga etyi welilongesa okuti otyo tyaviuka. Jeova ukuhandela oviwa. Oe mekuavela ononkhono mbae otyali. Inkha ove wambatisaluale omanima omanyingi, tyotyili utyii okuti ospilitu sandu ikahi no nokuhongolela. Wetyimona nokulitehela oñgeni Huku ekahi nokukupameka nospilitu yae. Ospilitu oyo ipondola okutualako okukuvatela—yoo, maikuvatela apeho. Ngotyo, tokola okutualako okuendela mospilitu sandu.
Okuti Ove Utyihinangela?
• Oityi tyihangununa “okuendela mospilitu”?
• Oityi tyipondola okukuvatela “okutualako okuendela mospilitu”?
• Oñgeni upondola okutyinda omuenyo welikuata nelipakulo liove?
[Ehangununo liolutalatu pefo 17]
Okulima oohi yomutima wove tyesukisa ononkhono
[Ehangununo liolutalatu pefo 19]
Okuti ukahi nokuhongolelwa nospilitu sandu ya Huku?