Omaiho a Jairo​—Onkhalelo Yae Yokuumbila Huku

Jairo watyitua noulema umwe utiwa Paralisia celebral.a Mokonda yotyo, pahe ketyivili okuyunga olutu lwae. Owongo wae kautyivili okuundapesa nawa omahipa olutu lwae, iya ovikalo viae, nomavoko, nomutwe, nomulungu wae, vipikaita vala, ketyivili okuvitalameka. Pamwe uliveta atyimuihama, mokonda yolutu lwae lulinana-nana vala. Tupu, upondola okuveta ovanthu veli ponthele yae inkha kavalunguka. Moluotyo, pamwe ovikalo viae, nomavoko vikutilwa motyipundi tyae tyomalola opo ehelivete.

OKUKULA NO NONGEMBIA

Jairo wekula no nongembia ononene. Tunde puetyi ena onohanyi ononthatu, pamwe ankho vakati vala ñgaa usavila, nkhele aupumo umwe. Tyina amalingi ngotyo, me umutuala liwa-liwa kosipitali, okusoka okuti hamwe wankhia.

Mokonda yokulina-nana, nokulikukautila, mokueenda kuomuvo omankhima ae aalemana. Puetyi ena omanima 16, atunguka enkhipa oku kuaima ovikalo, iya alitandwa, tupu atandwa motyitumbo, no mevango. Nkhele ndyihinangela ononthiki mbumwe Jairo ankho alala nokulila mokonda yomaluihamo akala nao.

Mokonda youlema wae, Jairo pahe uliswa, uvalekwa, ulangekwa-po, nokupindulwa-po. Me na tate apeho valinga ovipuka ovio. Jairo apeho wesukisa okukuatesuako, iya ovo tate apeho vemuhinangelesa okuti omuenyo wae kautei vala kovanthu, mahi tupu utei ku Huku.

VANOÑGONOKA ONKHALELO YOKUTOMPHOLA NAE

Ovo tate Onombangi mba Jeova, iya vatangela Jairo omahipululo Ombimbiliya tunde pouna. Vetyii okuti okukala noupanga na Huku tyikalesa vali nehambu momuenyo. Namphila Jairo alemana, mahi una ekevelo ewa nokuapama. Mahi, ovikando ovinyingi ankho velipula inkha Jairo metyivili okunoñgonoka etyi Ombimbiliya ilongesa.

Onthiki imwe, puetyi Jairo ankho omona, tate emupopila okuti: “Mbambavo Jairo popia na ame?” Ayawisako okuti: “Inkha tyili-tyili unthyole, mopopi!” Etyi tate emuita opo apopie vala ondaka ike, Jairo atokesa ononkhuka ine omahonyi. Ankho uhanda okupopia etyi asoka, mahi ondaka kaipatusuka. Tate elitehelela omapita etyi alilisa Jairo. Mahi, otyipuka otyo Jairo alinga, tyalekesa okuti weiva etyi tate apopia. Otyitateka, okuhetyivili vala okupopia.

Pakala vala katutu, ovo tate avamono okuti Jairo pamwe waangaulula liwa omaiho, opo alekese etyi asoka, no ñgeni elitehelela. Ankho unumana tyina ovanthu vahanoñgonoka etyi ahanda okupopia. Tyina ovo tate vamanoñgonoka etyi ahanda, okutalela komaiho ae, Jairo ulimemetela okuyola. Oyo ankho onkhalelo yae yokupopia okuti napandula.

Ondotolo imwe aipopila tate okuti, tyina tumupula opo akumbulule okuti yoo ine au, tuna okukatula omavoko etu. Okulio opala akumbulule okuti enga, iya okumbili opala akumbulule okuti au. Ngotyo, opo alekese etyi ahanda ankho utala ehimbwe kokuvoko kumwe.

OTYIPUKA TYIMWE TYAKOLELA MOMUENYO WA JAIRO

Onombangi mba Jeova valinga ovionge tutatu menima, iya mulingwa omalongomona apolwa Mombimbiliya. Jairo ankho apeho uhambukwa unene tyina elongomona liombatisimu lilingwa. Onthiki imwe, etyi Jairo ena omanima 16, tate emupulu okuti: “Jairo, uhanda okumbatisalwa?” Jairo atale ehimbwe kokulio kwa tate okulekesa okuti uhanda okumbatisalwa. Tate emupulu vali okuti: “Ove wapopila-le Huku melikuambelo okuti momuumbila apeho?” Tupu Jairo atale ehimbwe kokulio kwa tate. Ankho tyayandyuluka nawa okuti Jairo wapakula-le omuenyo wae ku Jeova.

Etyi velilongesa ovipuka ovinyingi konthele Yombimbiliya, tupu atyiyandyuluka nawa okuti Jairo wanoñgonoka oityi tyihangununa ombatisimu yo Vakristau. Mo 2004, Jairo akumbulula epulo limwe liakolela unene, liokuati: “Okuti welipakula ku Huku opo ulinge ehando liae?” Jairo wakumbulula epulo olio, mokuatala peulu. Oyo ankho onkhalelo velipakelamo yokukumbulula okuti yoo. Ngotyo, etyi atuula omanima 17, ambatisalwa, akala Ombangi ya Jeova.

OMAIHO ATALA VALA KOVIPUKA VIA HUKU

Mo 2011, apamoneka okomputadole ikuatesako Jairo okutomphola na vakuavo. Okomputadole oyo​—iyunga etyi alinga nomaiho ae. Tyina amatale kondaka imwe ateye keiho, ongatyina amanga kombutau yo komputadole. Mo komputadole omo, avapakemo onondaka, nomalutalatu, opo vikuateseko Jairo okupopia. Tyina amatale apa pahonekwa etyi ahanda okupopia, uteya keiho, akuivala ondaka ipopia etyi tyahonekwa-po.

Etyi enoñgonoko lia Jairo konthele Yombimbiliya lieliyawisa, akala nehando liokukuatesako vakuavo okunoñgonoka Huku. Onosimanu ambuho, tyina tulilongesa Ombimbiliya mombunga, Jairo utala kuame no ko komputadole yae. Oyo onkhalelo yokunthyinangelesa okuti nesukisa okuhoneka etyi makakumbulula meliongiyo, mononthele mbokulingwa omapulo.

Meliongiyo, ulipulukwa okuovola mo komputadole opo amange apa pena ekumbululo, iya ondaka yae aiivala kounyingi. Apeho tyina apameka ovakuatate monkhalelo ngoyo, uhambukwa unene. Alex umwe pomapanga a Jairo, wati: “Apeho ndyihuva tyina ndyiiva omakumbululo a Jairo konthele Yombimbiliya.”

Jairo tupu upopila vakuavo nomaiho ae konthele ya Huku. Onkhalelo imwe etyilinga, okuteya keiho tyina amatele pana pena otyikunino muna ovinyama vina ombembwa novanthu vomihoko aviho. Tyina amamange-po neiho, okomputadole yae aipopi okuti: “Ombimbiliya yava ekevelelo liokuti ohi maikakala omphangu yombembwa, iya omauvela nononkhia kamavikakala-ko vali, Revelação [Apocalipse] 21:4.” Inkha omunthu apopia nae ulekesa esuko, umanga popakuavo, akuivala ondaka iti: “Uhanda okulilongesa Ombimbiliya na ame?” Iya tate ya me etavela. Tyihambukiswa okutala Jairo, tyina alongesa katutu-katutu tate ya me Ombimbiliya, otyo akuatesuako nomukuatate venae! Iya Tate ya me, wambatisalua motyonge tyalingilwa mo Madri mu Kwenye Kunene yo 2014.

Omulongesi wa Jairo kosikola wamona ehando liae liokuumbila Huku. Rosario umwe po nondotolo mbae, wati: “Inkha onthiki imwe ndyisoka okunyingila mongeleya, mandyikala Ombangi ya Jeova. Namona oñgeni ekolelo lia Jairo liemukalesa nehambu momuenyo namphila alemana.”

Omaiho a Jairo apeho alaima tyina ndyimutangela omulao wo Mbimbiliya wati: “Otyilema matyikalombauka ngombambi, elaka liotyihita mulungu malikaimba nokukuiilila nehambu.” (Isaías 35:6) Namphila pamwe asoya, mahi ovikando ovinyingi una ehambu. Ukahi ngotyo, mokonda usoka vala kovilinga via Huku, nokuna omapanga Ovakristau. Ehambu liae, nekolelo liae liapama, vilekesa nawa okuti okuumbila Jeova tyitukalesa nehambu namphila tuna ovitateka momuenyo.