Okuti o Pasikwa otyipito umwe tyo Vakristau?

Omukanda Encyclopædia Britannica, wapopia okuti o Pasikwa “otyipito tyakolela vali tyongeleya yo Vakristau, tyokuhinangela Etutilo lia Jesus Kristu.” Mahi, okuti otyipito otyo, o tyo Vakristau umwe?

Opo tuimbuke inkha otyipuka tyimwe otyotyili umwe, otyiwa okunoñgonoka opi tyatuka, no ñgeni tyaenda-enda. Tupu, opo tunoñgonoke inkha o Pasikwa otyipito umwe tyo Vakristau, otyiwa tunoñgonoke nawa apa tyahimbikila.

Tete, tuesukisa okunoñgonoka okuti Jesus watumine ovalanduli vae vahinangele ononkhia mbae, kevetumine okuhinangela etutilo liae. Apostolu Paulu waihana ehinangelo olio okuti: “Ondalelo ya Tatekulu.”​—1 Coríntios 11:20; Lucas 22:19, 20.

Tupu, omukanda Britannica wapopia konthele yoviso ovinyingi vilingwa po Pasikwa okuti: “Viatuka koviso viovanthu, kavielikuatele” netutilo lia Jesus. Omukanda Encyclopedia of Religion wapopia konthele yeyiyi, notyindimba, ovilekeso viakaka po Pasikwa okuti: “Eyiyi, otyilekeso tyomuenyo omupe utunda meyiyi tyina otyikola tyeyiyi (tyatena) tyaelekwa nononkhia tyivambuka pokati.” Tupu wati: “Otyindimba, ankho tyiiwe okuti tyilityita unene, moluotyo, otyilekeso tyonthyimbi yondyovo.”

Omulongesi Philippe Walter, wahangununa oñgeni oviso ovio vieya okukala potyipito tyo Pasikwa. Wahoneka okuti: “Onkhalelo Ovakristau vo mouye vakuluminya vonongeleya mba vana vehe vakristau okuya mo nongeleya mbavo,” yapepukisa okuhonyeka etutilo lia Jesus notyipito “tyokutunda moutalala waelekua nononkhia, okuenda mondyovo yaelekwa nomuenyo.” Walter tupu wati: Otyo tyalingisisa vana vehe vakristau okupaka mokalendaliu kavo “Ovipito vio vakristau.” Moluotyo, ovanyingi avelipake monongeleya mbo vakristau vo mouye.

“Okukuluminya vana vehe vakristau okukala ovakristau,” katyalingilwe pomuvo ono apostolu ankho nkhele vena omuenyo, mokonda ono apostolu ankho “vatyilika” omalongeso omatutu. (2 Tessalonicenses 2:7) Apostolu Paulu wapopile okuti tyina “amaende,” ovalume vamwe ankho “mavapopi ovipuka vihaviukile opo vakokele ovalongwa kuvo.” (Atos 20:29, 30) Iya konyima, apostolu João ahoneka okuti ovalume vamwe ankho vekahi-ale nokuyapula Ovakristau. (1 João 2:18, 26) Otyo atyiikula ondyila yokunyingiya oviso via vana vehe vakristau pokati ko vakristau vomouye.

Mahi, vamwe ankho vasoka okuti okuyekelela oviso vimwe vio Pasikwa katyapengele​—mokonda matyikuatesako vana “vehe-vakristau” okunoñgonoka nawa etyi etutilo lia Jesus lilekesa. Mahi otyipuka otyo, ñgeno Paulu ketyitavelele. Namphila ankho aenda-enda pokati koviso vio va Roma, mahi, ketavelele natyike poviso ovio opo akuateseko ovanthu okunoñgonoka nawa Jesus. Anthi, walondolele Ovakristau okuti: “Muhelipakei kokanga ike na vana vehetavela ku Huku. Mokonda oñgeni ouviuki netyi tyihaviukile vikala kumwe? Ine oupanga patyi ukahi pokati kotyitei nenthiki? ‘Moluotyo, tundei pokati kavo, liyapulei-ko. Yekeipo okukuata ovipuka viasila.’ Otyo tyapopia Jeova.”​—2 Coríntios 6:14, 17.

Ovipuka ovio aviho tuelilongesa, vilekesa-tyi? Tyayandyuluka nawa okuti o Pasikwa ha-tyipito tyo Vakristau.