Linga Ononkhono Opo Ukale Nehambu Motyinepo

1. Namphila otyinepo tyihimbika nehambu, oityi ovalinepi vapondola okukevelela? (Tala olutalatu pefo pahimbikila onthele.)

PUTYINA utala ovalinepi monthiki velinepa vena ehambu enene. Puetyi velipola, ohole yavo kese umwe na mukuavo yeliyawisa unene pahe vahanda okulinepa iya valinga omulao opo vakale ovakuatyili poyavo. Konyima yotyinepo, avahimbika omuenyo omupe kumwe, vesukisa okulinga omapiluluko opo vatualeko nokuelikuata okapandi. Jeova Wokuahinda otyinepo, uhanda ovalinepi vakale nehambu nomuenyo omuwa motyinepo, otyo apakela onondonga mbukahi nawa Mondaka yae Ombimbiliya. (Provérbios 18:22) No ngotyo, Ombimbiliya itupopila okuti ovanthu ovakuankhali mavakala novitateka motyinepo ine “emone molutu luavo.” (1 Coríntios 7:28) Oñgeni ovalinepi vapondola okutepulula ovitateka ovio? Iya oñgeni Ovakristau vapondola okukala nehambu motyinepo?

2. Ohole patyi ovalinepi vena okulekesa?

² Ombimbiliya ilongesa okuti ohole otyituwa tyakolela unene. Mahi kuna ohole ovalinepi vesukisa okulekesa motyinepo. Mongeleka, vena okulekesa okuti velihanda tupu vena okukala nokankhenda okanene. Inkha vena ovana, ohole mombunga ina okukala otyipuka tyakolela unene. Mahi opo ohole yeete ehambu motyinepo ina okulundwa novihonekwa. Apostolu Paulu wapopia ohole oyo etyi ati: “Kese umwe puonwe, akale nohole nomukai wae, ngetyi oe muene elihole. Tupu, omukai akale nonthilo onene nomulume wae.”​—Efésios 5:33.

ETYI OMULUME NOMUKAI VENA OKULINGA OPO OTYINEPO TYEENDE NAWA

3. Oñgeni ohole ipameka otyinepo?

³ Paulu wahoneka okuti: “Valume, tualeiko okukala nohole novakai venyi, ngetyi Kristu ankho ehole ewaneno, iya elipakula mokonda yalio.” (Efésios 5:25) Ovakristau hono vahetekela ongeleka ya Jesus putyina vakala nohole na vakuavo ngetyi Jesus ankho ehole ovalongwa vae. (Tanga João 13:34, 35; 15:12, 13.) Ovalinepi Ovakristau vena okukala nohole onene na mukuavo inkha tyesukisa ankhi mokonda yomulume wae ine omukai wae. Mahi tyina motyinepo muna ovitateka, vamwe velitehelela okuti ohole yavo yatepuluka. Oityi tyipondola okuvekuatesako? Ohole ilundwa novihonekwa “ilikuatesila movipuka aviho, itavela ovipuka aviho, ikevelela ovipuka aviho, ikoleleya movipuka aviho.” Ohole ngoyo “kaiponyo na lumwe.” (1 Coríntios 13:7, 8) Ovalinepi vesukisa okuhinangela okuti valinga omphango. Omphango yokukala nohole kese umwe namukuavo nokukala omukuatyili. Okutyihinangela matyilundu Ovakristatu ovalinepi okuiita ekuateso lia Jeova nokuundapela kumwe opo vatetulule ovitateka.

4, 5. (a) Mokonda onkhalamutwe yombunga otyilinga patyi omulume ena? (b) Oñgeni omukai ena okutala outumini? (c) Omapiluluko patyi omulume nomukai vesukisa okulinga motyinepo?

⁴ Paulu wapopia otyilinga tya kese umwe motyinepo etyi ati: “Vakai tavelei kovalume venyi, ngatyina oku Tatekulu, mokonda omulume oe omutwe womukai wae, ngetyi Kristu oe omutwe wewaneno.” (Efésios 5:22, 23) Otyo katyilekesa okuti omulume wavilapo vali komukai wae. Jeova wapopia esilivilo liomukai etyi ati: “Hatyiwako omulume atualeko okukala vala aike, mandyimulingila omukuatesiko, opo akale omuvateli wae.” (Gênesis 2:18) Omukai upondola okukuatesako omulume wae akale onkhalamutwe ongwa yombunga. Iya omulume wesukisa okuhetekela ongeleka ongwa ya Jesus, “omutwe wewaneno.” Tyina omulume alinga ngotyo, omukai wae ulitehela okuti wapama iya tyimupepukila okuhumba nokukuatesako omulume wae.

⁵ Cathy, welinepa na Fred, wapopia okuti: “Puetyi nehenenepwe ankho ndyilinga omatokolo ange andyike. Otyinepo tyamphilulula nelilongesa okuyumba onthumbi momulume wange. Otyo hapeho tyapepuka, mahi tyituavela omphitilo yokukala omapanga putyina tulinga ovipuka ngetyi Jeova ahanda.”^[1] (Tala okatoi konthyulilo yonthele.) Fred wati: “Okulinga omatokolo nalumwe tyapepukile kuame. Otyinepo, tyakutikinya ovanthu vevali iya otyo tyiyawisa kotyitateka. Mahi putyina tulikuambela okuovola ehongolelo lia Jeova nokutehelela omukai wange, tyipepuka okulinga omatokolo a kese nthiki. Ame ndyilitehelela okuti tuundapela kumwe!”

6. Oñgeni ohole ikahi “ngomuoyo wewaneko” putyina ovalinepi vena otyitateka?

⁶ Otyinepo tyipondola okupama inkha ovalinepi “vatualeko okukoleleya oviponyo viamukuavo, nokulievela pokati tyihakuluminyua.” Mokonda ovakuankhali aveho mavapengesa. Tyina tyamamoneka, ovalinepi vapondola okulilongesila koviponyo viavo, nokulilongesa okuevela nokulekesa ohole ilundwa no nondonga mbo Mbimbiliya. Ohole oyo, “omuoyo wewaneko.” (Colossenses 3:13, 14) Ovalinepi vapondola okulekesa ohole oyo tyina vakala noumphua lundo iya ngotyo kavesuku “nokulingwa omapita.” (1 Coríntios 13:4, 5) Tyina vamelipono, ovalinepi vena okuovola okutetulula otyitateka otyo liwa-liwa, monthiki oyo. (Efésios 4:26, 27) Tyesukisa okukola omutima nokuliola omutima opo utie: “Otyiponyo napengesa,” mahi okulinga ngotyo matyikuatesako okutetulula otyitateka iya atyipameka oupanga wovalinepi.

TYAKOLELA OKULEKESA OKANKHENDA

7, 8. (a) Omalondolo patyi Ombimbiliya yavela konthele yokulinga otyihola motyinepo? (b) Omokonda yatyi katyapengele ovalinepi okulienga-enga?

⁷ Ombimbiliya ituavela omalondolo omawa apondola okukuatesako ovalinepi motyinepo. (Tanga 1 Coríntios 7:3-5.) Otyo tyakolela komulume nomukai okukala nesuko kese umwe namukuavo. Inkha omulume kesuku nomukai wae, kamakala nehambu motyinepo. Ovalume vena okukala novakai vavo, kumue “nenoñgonoko nokuveavela ehumbilo.” (1 Pedro 3:7) Otyihola katyipondola okulingwa kononkhono, mahi vena okutyilinga monkhalelo aveho vetavela. Kovalume otyihola tyipondola okulingwa apeho. Mahi tyilinge omulume ine omukai aveho vena okutyihanda.

⁸ Mombimbiliya mutupu otyitumino tyipopia oñgeni omulume nomukai vena okulienga-enga, mahi vena okutyilinga. (Cântico de Salomão 1:2; 2:6) Ovakristau ovalinepi vena okulekesa okuti velihole nokuna okankhenda.

9. Omokonda yatyi tyapenga okutala omunthu uhelinepele nae, ngatyina umuhanda?

⁹ Tyina tuhole unene Huku novanthu, kamatuyeke omunthu nawike ine otyipuka tyimwe tyinyone otyinepo tyetu. Vamwe vanyona otyinepo tyavo mokutala ovipuka vihongiliya okulinga otyihola. Onthue tuesukisa okulityilika ovipuka vituhongiliya okulinga otyihola. Tuesukisa okulityilika okutala omunthu tuehelinepele nae ngoti tumuhanda. Mokonda otyituwa otyo tyapenga. Tuna okuhinangela okuti Huku wii ovituwa vietu no malusoke etu. Otyo matyitukuatesako okupameka ehando lietu liokuhambukiswa Huku nokutualako noukuatyili motyinepo.​—Tanga Mateus 5:27, 28; Hebreus 4:13.

TYINA MOTYINEPO MUNA OVITATEKA

10, 11. (a) Okuti okulihenga tyakaka? (b) Oityi Ombimbiliya ipopia konthele yokulihenga? (c) Oityi matyikuatesako ovalinepi okuhelihenge vala liwa?

¹⁰ Ovalinepi vamwe vatokola okulihenga tyina vena ovitateka ovinene vitualako. Movilongo vimwe, ovalinepi ovanyingi velihenga. Tyotyili, otyo katyakakele unene mewaneno lio Vakristau. Mahi, Ovakristau ovalinepi vena ovitateka ovinyingi motyinepo tyavo.

¹¹ Ombimbiliya ipopia okuti: “Omukai ahayekepo omulume wae. Mahi, inkha tyotyili umuyekapo, atualeko okukala tyihanepwa, ine inkha hatyo akondoke vali komulume wae. Iya omulume ahasepo omukai wae.” (1 Coríntios 7:10, 11) Ovalinepi vamwe vasoka okuti vena ovitateka ovinyingi hahe vali okulihenga. Mahi, Jesus walekesa okuti tyapenga okulihenga, etyi apopia onondaka Huku apopile ponthyimbi okuti: “Etyi Huku apaka kokanga ike, omunthu ehetyiyapule.” (Mateus 19:3-6; Gênesis 2:24) Ehando lia Jeova okuti omulume nomukai vena okukala aveho. (1 Coríntios 7:39) Atuho tuna okuhinangela okuti Jeova metukoyesa mokonda yovituwa vietu. Okulinga ngotyo matyitukuatesako okutetulula ovitateka vietu liwa-liwa avihevilipo unene.

12. Oityi tyituala ovalinepi ovanyingi okuliyapuka?

¹² Omokonda yatyi ovalinepi vamwe vakalela novitateka ovinene? Kuvamwe, omokonda otyinepo tyavo katyikahi ngetyi ankho vasoka. Pahe vanumana vala. Tupu, pamwe vakala novitateka mokonda ovalinepi vatekulilwe monkhalelo yelikalela ine hamwe vasoka monkhalelo yelikalela. Pamwe omokonda kavelivili no heivi. Ine hamwe kavelivili mokonda yonkhalelo vaundapesa onombongo ine vatekula ovana. Mahi, otyiwa okutala okuti ovalinepi ovanyingi Ovakristau vetyivila okutetulula ovitateka ovio mokonda vayeka Huku evehongolele.

13. Oityi tyipondola okutuala ovalinepi okuliyapuka?

¹³ Kuna ovipuka vimwe vituala ovalinepi okuliyapuka. Inkha omulume kahande okulandela okulia novikutu ombunga. Inkha uveta omukai wae. Inkha kahande omukai wae aumbile Huku. Tyina ovalinepi vavasiwa movitateka ovinene, vena okuita ekuateso lio vakulu vewaneno. Ovakuatate ovo vena ounongo iya vapondola okukuatesako ovalinepi okuendela monondonga mba Huku. Iya tyina ovalinepi vaita ku Jeova ospilitu sandu, otyo tyipondola okuvekuatesako okuundapesa onondonga mbo Mbimbiliya iya avalekesa ovituwa Vioukristau.​—Gálatas. 5:22, 23.^[2]​—Tanga okatoi

14. Oityi Ombimbiliya ipopia konthele Yovakristau velinepa nomunthu uhaumbila Jeova?

¹⁴ Ombimbiliya ilekesa okuti otyiwa okutualako notyinepo, namphila omunthu welinepa nae kafende Jeova. (Tanga 1 Coríntios 7:12-14.) Una uhafende Jeova “upandwa” mokonda welinepa nomuumbili wa Huku. Ovana vavo vatalwa okuti “vasukuka,” iya vaamenwa na Huku. Paulu wapameka Ovakristau ovalinepi okuti: “Mukai, oñgeni utyii okuti moyovola omulume wove? Ine mulume, oñgeni utyii okuti moyovola omukai wove?” (1 Coríntios 7:16) Kuna onongeleka ononyingi mbo Vakristau vakuatesako ovakai vavo ine ovalume vavo avakala ovaumbili va Jeova.

15, 16. (a) Onondonga patyi Ombimbiliya yaavela ovakai Ovakristau vanepwa novalume vahaumbila Huku? (b) Oityi Omukristau ena okulinga inkha “ou elinepa nae uhelilongesa utokola okulihenga”?

¹⁵ Apostolu Petulu walondola ovakai Ovakristau opo vetavele kovalume vavo, etyi ati: “Inkha kavetavela kondaka, vakokwe tyihena ndaka novituwa viovakai vavo. Mokonda yokutala ovituwa vienyi viaviuka, kumwe nehumbilo enene.” Kesukisile okupopia apeho konthele yomatavelo ae, omukai wanepua wesukisa okukuatesako omulume wae opo etavele otyili, tyina alekesa “otyituwa tyahiliya noutendi, mokonda otyo tyakolela vali unene komaiho a Huku.”​—1 Pedro 3:1-4.

¹⁶ Mahi inkha una uhaumbila Huku utokola okuliyapuka? Ombimbiliya ipopia okuti: “Inkha una uhafende Huku utokola okuliyapuka, muyeka etyilinge. Omukuatate ine omphange kakuluminyua monkhalelo oyo, mahi Huku wemuihanena ombembwa.” (1 Coríntios 7:15) Namphila okulihenga hamwe matyieta katutu ombembwa, mahi Ovakristau vekahi monkhalelo oyo kavapondola okulinepa nomunthu omukuavo, ngetyi tyipopia Ombimbiliya. Mahi, Omukristau kapondola okukuluminya mukuavo opo veliwane. Hamwe mokueenda kuomuvo, ou welinepa nae uhelilongesa matokola okukondoka meumbo, alingi ononkhono opo otyinepo tyikale nehambu. Hamwe alo umwe upondola okukala omuumbili wa Jeova.

OTYIPUKA PATYI TUNA OKUPAKA TETE MOTYINEPO?

17. Otyipuka patyi Ovakristau vokuanepa vesukisa okupaka tete momuenyo wavo?

¹⁷ Tukahi “kononthiki mbahulilila,” ou “omuvo wepuiya okukala.” (2 Timóteo 3:1-5) Mokonda yotyo, tuesukisa okupameka oupanga wetu na Jeova. Paulu wapopia okuti: “Omuvo wahupako kauhi. Moluotyo, vana vena ovakai vakale ngatyina vehenavo. Iya vana vaundapesa ouye uno, vakale nga vana veheuundapesa unene.” (1 Coríntios 7:29-31) Paulu kapopile okuti ovalinepi kavapondola okusuka nou velinepa nae. Mahi mokonda tukahi kononthiki mbahulilila, otyipuka tuesukisa okupaka tete momuenyo wetu efendelo lietu na Jeova.—Mateus 6:33.

18. Omokonda yatyi tutyii okuti tyitavela Ovakristau vakale notyinepo tyitualako nokuna ehambu?

¹⁸ Momuvo uno wepuiya okukala, tuete ovalinepi ovanyingi vekahi nokulihenga. Okuti tyitavela umwe okukala notyinepo tyina ehambu? Eenga, mahi oputyina vala tutualako noupanga wapama na Jeova, novanthu vae, nokuendela monondonga mbo Mbombiliya, nokutavela ehongolelo lia Jeova. Tyina tulinga ngotyo, tulekesa okuti tupanda “etyi Huku apaka mokanga ike.”​—Marcos 10:9.