Omukanda Watunda Kovakulu Ononkhalamutue Mbo Nombangi Mba Jeova
Vakuatate Vetu Onombangi Mba Jeova:
Tuna ehambu enene liokumuhonekela omukanda ou! Tulitehelela ngetyi tyapopile apostolu João okuti oe ‘tyotyili uhole’ ovakuatate vae iya wahambukua mokonda ovo ankho vekahi “nokuendela motyili.” (2 João 1, 4) Ovakristau vekolelo, vena esilivilo enene kuonthue! Otyili tyetuyovola Mombambilonia Onene, nomalongeso ao, noviso vipenyesa Huku. Okutavela etyi Ombimbiliya ilongesa, tyikahi nokutukuatesako okukala ovanthu onondalawa, vokuna ohole, nokankhenda. Iya otyili tyetuikulila ondyila opo tukale tyasukuka komaiho a Huku, nekevelelo liomuenyo wahapu.
Tupu, tupandula unene ospilitu ya Jeova ikahi nokutuhongolela nokutupameka! Tuna onthumbi yokuti onwe muahambukwa okutala ononkhalelo ononyingi Jeova ekahi nokuundapesa ospilitu sandu yae pala okutuhongolela, nokutupameka, ngetyi tuetyimona Motyionge Tyononthiki Ononthatu “Hongolelwa Nospilitu ya Huku. Putyina ovitateka mouye vikahi nokuliyawisa, tyesukisa okuyumba onthumbi mepondolo liospilitu sandu ya Jeova opo ituhongolele mononthiki mbokuepuiya mbukahi komutue.
Tuna onthumbi yokuti omitima vienyi viapamekwa etyi muatanga o Anuário yapopia konthele yovakuatate vetu vakoleleya mononkhumbi mokonda yekolelo liavo. Iya tyituhuvisa okusoka okuti etyi ovakuatate ovo vekolelo vahimbika okumoneswa ononkhumbi, ovanyingi ankho vambatisalwa mononthiki mbehehi ine ankho nkhele kavene mbatisalwe. Tyotyili, tuna ohole onene navo mokonda yekolelo liavo nokutualako nouviuki! Tupu, ongeleka yavo ongwa, yapameka etokolo lietu liokutualako nekolelo Mouhamba, katyesukisile otyitateka patyi tyipondola okumoneka.—1 Tes. 1:6-8.
Vakuatate no nomphange ononthyolwa, onthue tutyii okuti kuna ovitateka ovinyingi konthele yonombongo, novikuavo vali, iya muesukisa okulinga ononkhono opo onombunga mbenyi mbutualeko kumue, nohole. Vamue puonwe, katyapepukile okuundapa apeho movilinga viokuivisa Ouhamba, nokuenda apeho komaliongiyo. Mokonda yotyo, konyima yokulikuambela unene, nokusokolola nawa, tuatokola okulinga omapiluluko amwe momaliongiyo omewaneno okuhimbikila monthiki yo 1 ya Kupupu yo 2009. Tuna onthumbi yokuti omapiluluko oo, maemukuatesako okukala vali nomuvo wokulinga elilongeso lienyi lioulike, nokulilongesa nombunga.
Movionge ovinyingi viononthiki onombali, no nonthatu, vialingwa menima lino, tuahambukwa unene okutala ovanthu ovanyingi velipakula pala okumbatisalwa. Ovanyingi puvo ankho nkhele ovatutu. Tukahi nokuavela ondundo ovohe, opo mulongese nawa ovana venyi, nokuveavela ondundo opo velipakule ku Jeova pala okumuundapela putyina nkhele ovatutu. Namphila ovakuendye ovo vapita movitateka ovinyingi kosikola, velipakula pala okumbatisalwa, tyilekesa okuti vapewa elongeso ewa novohe.—Sal. 128:1-6.
Tupu tuhanda okupopia okuti ovilinga viokulongesa ovanthu Ombimbiliya vieliyawisa, iya onomisionaliu, novakokoli-ndyila vavilapo, vaundapa unene movilinga ovio. Atuho onthue Ononkhalamutue Mbo Nombangi Mba Jeova tupanda unene ovilinga ovakuatate vetu no nomphange vekahi nokulinga, okupopila vana vena omutima waviuka okuti “Endyu!” okukonga aveho vena ohunga opo veye “vatambule otyali omeva omuenyo.” (Rev. 22:17) Tupu, tuliepesa 239.678 ovakuatate vetu vokuelipakula nokuambatisalwa menima liokualamba mouye auho!
Tuhinangelei apeho onondaka mba apostolu João, wahonekele okuti: “Ouye ukahi nokupwa, kumue nepeleyo liao, mahi una ulinga etyi Huku ahanda makalako apeho.” (1 João 2:17) Tuhalimbueiko okuti tukahi konthyulilo youye uno! Tyakolela unene okutualako okulinga ehando lia Huku, ‘nokutualako okutala nawa.’ (Mat. 24:42) Inkha tulinga ngotyo, kamatulivele, iya matupoloko esilivilo enene koluembia olunene lwa Jeova.—Isa. 63:7.
Tukevelela okuti omahipululo konthele yovilongo ovinyingi ekahi mo Anuário, emuavele ondundo opo mupake tete momuenyo wenyi Ouhamba wa Huku. Tupu, tuhanda mukale nonthumbi yokuti onwe mukahi apeho momalusoke etu nomalikuambelo, iya tuna ohole onene nonwe. Jeova, atualeko okumuavela ononkhano mbae onongwa.
Ovakuatate venyi,
Ononkhalamutue Mbo Nombangi Mba Jeova