‘Onondaka Ombu Onongwa Mambukaiviswa!’
1. Oñgeni tutyii okuti natyike tyipondola okutalameka ovilinga viokuivisa?
1 Natyike tyipondola okutyilika Jeova okufuisapo ehando liae. (Isa. 14:24) Namphila ankho tyimoneka okuti omukoyesi Gideau novalume vae 300 kamavetyivili okufinda 135.000 yova Midianita, Jeova watolela Gideau okuti: “Ove tyotyili moyovola o Isilayeli pomaoko a Midiã. Hame muene ndyikahi nokukutuma?” (Juíz. 6:14) Ovilinga patyi Jeova ekahi nokuvatela hono? Jesus wati: “Onondaka ombu onongwa mbouhamba wa Huku, mambukaiviswa kombanda yoohi aiho.” (Mat. 24:14) Nawike una epondolo liokutalameka ovilinga evi opo vihalingwe!
2. Omokonda yatyi tupondola okukevelela Jeova etukuateseko movilinga viokuivisa?
2 Jeova Ukuatesako Kese Umwe Puonthue: Putyina tuyumba onthumbi yokuti Jeova makuatesako Onombangi mbae ambuho, okuti tupondola okukevelela Jeova akuateseko kese umwe puonthue? Mokueenda kuovitateka, Jeova wavatelele apostolu Paulu menyina lio Mona wae, Jesus. (2 Tim. 4:17) Nonthue tupondola okukala nonthumbi yokuti Jeova maavela ononkhano onongwa kese umwe puonthue opo tufuisepo ehando liae nononkhono.—1 João 5:14.
3. Omononkhalelo patyi Jeova etukuatesako?
3 Okuti otyiho tya kese nthiki tyitukalesa tyihena ononkhono pala ovilinga viokuivisa? “Oe wavela epondolo una wepuila.” (Isa. 40:29-31) Okuti ukahi nokumoneswa ononkhumbi? “Pakula omulemo wove ku Jeova, iya oe mekuvatela.” (Sal. 55:22) Okuti ove pamwe ukala tyihena onthumbi? ‘Enda, Ame muene mandyikala nomulungu wove.’ (Êx. 4:11, 12) Okuti ove una otyitateka tyekongoko tyikutyilika okuundapa unene movilinga viokuivisa? Jeova upanda etyi ulinga nononkhono mbove ambuho, katyesukisile inkha ulinga vala katutu.—1 Cor. 3:6, 9.
4. Oñgeni okuyumba onthumbi mu Jeova matyitukuatesako?
4 Jeova watandaveka okuoko kuae “olie meukondolako?” (Isa. 14:27) Inkha tuyumba onthumbi yokuti Jeova metuavela ononkhano onongwa movilinga vietu viokuivisa, matutualako okuivisa “nomutima wakola konthele ya Jeova.”—Atos 14:3.