Uhasoyeswe—Nomalusoke Okuti Kumetyivili
1. Omokonda yatyi vamwe velityilika okulongesa Ombimbiliya?
1 Okuti ove ulityilika okulongesa ovanthu Ombimbiliya mokonda yokusoka okuti kutyivili okulongesa nawa? Ovaumbili vekolelo vokohale, ngetyi o Moisesi na Jeremia, ankho velitehelele okuti kavafuilepo pala okulinga otyilinga vapewa. (Êx. 3:10, 11; 4:10; Jer. 1:4-6) Ngotyo, have vala ulitehela ngotyo. Oñgeni vetyivila?
2. Omokonda yatyi tuhahambukilwa vala okuivisa umbo-na-umbo, okulongesa Ombimbiliya atutyiyekela vakuetu?
2 Tuna okuhinangela okuti Jeova nalumwe etuita okulinga etyi tuhevili. (Sal. 103:14) Otyilinga tuapewa “tyokulinga ovalongwa,” “nokuvelongesa,” tupondola okutyivila. (Mat. 28:19, 20) Otyo hatyilinga Jeova avela vala vamwe ovanongo ine vetyivila vali pokati ketu. (1 Cor. 1:26, 27) Ngotyo, katupondola okuhambukilwa vala okuivisa umbo-na-umbo, okulongesa Ombimbiliya atutyiyekela vakuetu.
3. Oñgeni Jeova etuavela ounongo wokulongesa ovanthu Ombimbiliya?
3 Jeova Utulongesa: Ounongo wetu wokulinga ovalongwa utuka ku Jeova. (2 Cor. 3:5) Neongano liae, Jeova utulongesa otyili tyo Mbimbiliya ovanthu vouye uno vokualongeswa unene vehei. (1 Cor. 2:7, 8) Jeova wapaka nawa ononkhalelo mbokulongesa mba Jesus, Omulongesi Omunene, opo tumuhetekele, nokutualako okutulongesa newaneno. Tupu, Jeova utualako okutuavela etyi tyitukuatesako okulilongesa Ombimbiliya. Utuavela omikanda, ngetyi omukanda Ombimbiliya Ilongesa, muvasiwa otyili tyayandyuluka nokuapepuka okutyinoñgonoka. Okulongesa omunthu Ombimbiliya tyipondola okupepuka tyipona etyi tusoka.
4. Omokonda yatyi tupondola okukala nonthumbi yokuti Jeova metukuatesako?
4 Moisesi na Jeremia vetyivilile okufuisapo otyilinga tyavo nombatelo ya Jeova. (Êx. 4:11, 12; Jer. 1:7, 8) Tupu, nonthwe tupondola okuita Jeova etukuateseko. Muatyiho, tyina tulongesa Ombimbiliya, tukuatesako omunthu okunoñgonoka otyili konthele ya Jeova, iya otyo otyiwa komaiho a Huku. (1 João 3:22) Ngotyo, panga okulongesa ovanthu Ombimbiliya, nokuhambukilwa ovilinga viove viokuivisa.