Ove Upondola Okukala Omulongesi!
1. Ovaivisi aveho Vouhamba vena elao patyi?
1 Otyipuka tyimue tyakolela movilinga viokuivisa, okulongesa ovanthu otyili. Okutala okuti vekahi nokutavela onondaka onongwa Mbouhamba, nokuvekuatesako okulinga oupanga Nohamba youye auho, otyilinga tyimue tuna okupanda unene. (Tia. 4:8) Ovaivisi aveho Vouhamba, vena okukala nehando liokulongesa ovanthu vokuna ehando liokunoñgonoka otyili, nokuvekuatesako okulinga omapiluluko momuenyo wavo, monkhalelo yavo yokuvala, no movituwa.—Mat. 28:19, 20.
2. Omokonda yati vamue velityilika okulongesa ovanthu Ombimbiliya, iya oityi matyivekuatesako okufinda otyitateka otyo?
2 Yumba Onthumbi mu Jeova: Kohale, ovaumbili vekolelo, ankho vasoka okuti kamavetyivili okufuisapo ovilinga Jeova eveavela. Onthumbi mu Jeova Huku, yakuatesileko Moisesi, na Jeremia, na Amosi, novanthu ovakuavo okuhakala nowoma, nokufuisapo ovilinga viavo viakolela. (Êx. 4:10-12; Jer. 1:6, 7; Amós 7:14, 15) Tupu, Apostolu Paulu “wakalele nondundo onene,” ine “wapopile neandyuluko.” Ñgeni? Oe wapopile okuti wapewa ondundo “na Huku yetu.” (1 Tes. 2:2) Tyotyili, atuho onthue tupondola okukala nonthumbi yokuti Jeova metuavela ombatelo, nounongo, nepameko tuesukisa opo tulongese nawa ovanthu Ombimbiliya.—Isa. 41:10; 1 Cor. 1:26, 27; 1 Ped. 4:11.
3, 4. Oityi matyitukuatesako okulongesa nawa Ondaka ya Huku?
3 Tavela Okulongeswa: Omulongesi wetu Omunene Jeova Huku, utulongesa no programa ongwa yelilongeso Yombimbiliya, opo tukale ovalongesi vafuapo nawa. (Isa. 54:13; 2 Tim. 3:16, 17) Tavela elongeso olio, nokuovola omphitilo yokuyawisa enoñgonoko liove konthele Yovihonekwa, nokuyawisa ounongo wove wokulongesa otyili tyo Mbimbiliya. Namphila tulongeswa okulinga otyilinga otyo Mosikola Yovilinga Via Huku, Neliongiyo Liovilinga, tupu omaliongiyo aeho omawaneno etukuatesako okulongesa Ondaka ya Huku.
4 Linga ononkhono opo ulilongese ononkhalelo mbapepuka mbokulongesa otyili tyo Mbimbiliya tyokuaya kohi. Omukanda Escola do Minitério Teocrático, pefo 227, upopia okuti: “Ove tete una okunoñgonoka nawa onthele imue opo utyivile okukeilongesa vakuenyi.” Okuava omakumbululo momaliongiyo, matyitukuatesako okupaka momutima ononthele matukaundapesa. Moluotyo, lipongiya nawa, iya onthumbi yove mounongo wove wokulongesa mailiyawisa.
5. Ombatelo patyi onkhuavo tuna mewaneno pala okutukuatesako okukala ovalongesi ovanongo?
5 Tunde kohale, ovaumbili Ovakristau, velilongesa pokati tyina vaundapa kumue movilinga viokulinga ovalongwa. (Luc. 10:1) Inkha tyitavela, landula ovaivisi valongoka nawa, okukutikinyamo ovakokoli-ndyila, novakulu veuaneno, novatalelipo vomawaneno, movilinga viokulongesa ovanthu Ombimbiliya. Tala nawa, oñgeni ovo vaundapesa omalekeso, no nongeleka, nomalutalatu ekahi momikanda vietu viokulongesa pala okuhangununa otyili tyo Vihonekwa. Vepula oñgeni ove upondola okukala omulongesi omunongo. (Pro. 1:5; 27:17) Panda elongeso aliho upewa novakuatate no nomphange, mokonda, tyotyili o Huku ukahi nokutukuatesako.—2 Cor. 3:5.
6. Haunene, oityi tyesukisa opo ukale omulongesi Wondaka ya Huku?
6 Yumba onthumbi mu Jeova, nokupola esilivilo kelongeso aava. Tualako okulinga omalikuambelo. (Sal. 25:4, 5) Tupu, nove upondola okukala nehambu liokukuatesako omunthu okukala omulongesi Wondaka ya Huku ngove!