“Okuvoko Kuove Kuhapululukwe”

1-2. Oñgeni Eclesiastes 11:6, yelikuata novilinga viokuivisa?

KOVILONGO vimwe, tyina ovanthu veiva onondaka onongwa vetavela liwa-liwa mokonda ankho vetyikevela-le. Mahi, kovilongo ovikuavo ovanthu kavesukile na Huku nii Ombimbiliya. Oñgeni ovanthu vo potyilongo ukala vatala onondaka onongwa? Okuti vetavela? Tyilinge vetavela ine kavetavela, Siovaa uhanda tutualeko okuivisa atee tyipwa.

² Siovaa watokola-le onalupi ovilinga viokuivisa mavipu. Tyina omuvo oo wamehikipo, “onthyulilo aiya.” (Mat. 24:14, 36) Tyina omuvo oo wehenehikepo, oñgeni tupondola okutavela onondaka mbokuati “okuvoko kuove kuhapululukwe”?b — Tanga Eclesiastes 11:6.

3. Oityi matulilongesa monthele ei?

³ Monthele yokualamba tuelilongesa ovipuka vikuana tuesukisa okulinga vitukuatesako okukala “ovafwi vovanthu.” (Mat. 4:19) Onthele ei, maipopi ovipuka vitatu vipondola okupameka etokolo tualinga liokutualako okuivisa, tyihetei otyitateka tulambela. Matulilongesa omokonda yatyi tyesukisila: (1) Okuhatalukwa, (2) okupwa-elundo, (3) okukala nekolelo liapama.

UHATALUKUWE

4. Omokonda yatyi tuesukisila okuhatalukwa movilinga Siovaa etutuma okulinga?

⁴ Sesusi wapopilile ovalongwa vae ovipuka mavimoneka mononthiki mbonthyulilo, vipondola okutalula ovalanduli vae, okufuisapo ovilinga viokuivisa. Mokonda yotyo, evepopila okuti “tualeiko okukala tyipahi.” (Mat. 24:42) Hono mouye mueyula ovipuka vitalula ovanthu, vielifwa na vina ankho vityilika ovanthu vo pomuvo wa Noe okutavela etyi evepopila. (Mat. 24:37-39; 2 Pet. 2:5) Mahi, onthue katuhande okutalukwa movilinga Siovaa etutuma okulinga.

5. Ngetyi tyipopia Ovilinga 1:6-8, atee-pi ovilinga viokuivisa ankho mavikehika?

⁵ Hono tuesukisa okupaka ovilinga viokuivisa, pomphangu yo tete momuenyo wetu. Sesusi wapopile okuti, ovalanduli vae mavatualako okuivisa tyina amankhi. Iya mavaivisa vali tyipona-e. (Suau 14:12) Konyima yononkhia mba Sesusi, vamwe povalongwa vae avahande okukala vali avafwi vombisi. Mahi etyi atutiliswa, Sesusi walingile ehuviso opo akuateseko vamwe povalongwa vae okukuata ombisi onyingi. Walingile ehuviso olio, opo alekese okuti otyilinga eveavela tyokufwa ovanthu, tyesukisa vali tyipona ovilinga ovikuavo ankho valinga. (Suau 21:15-17) Etyi eheneende keulu, wapopilile ovalongwa vae okuti ovilinga viokuivisa maviliyandyana mouye auho atee konondimbu mbo Isilayeli. (Tanga Ovilinga 1:6-8.) Tupu, etyi palamba omanima amwe, Sesusi walekesile Suau emonekelo, opo emupopile ovipuka mavikamoneka “monthiki ya Tatekulu.”c Tyimwe povipuka ovio Suau amuene, oandyu, yatyinda “onondaka onongwa” mbuiviswa ku vana vakala kombanda yohi, “vovilongo aviho, nomihoko aviho, nomalaka aeho, novanthu aveho.” (Ehol. 1:10; 14:6) Tyimoneka nawa okuti Siovaa uhanda tuundape motyilinga etyi tyokuivisa atee tyipwa.

6. Oñgeni onthue tupondola okutualako okupaka ovilinga viokuivisa pomphangu yo tete momuenyo wetu?

⁶ Onthue matutualako vala tyihatalukwa movilinga viokuivisa, tyina tusoka kovipuka aviho Siovaa alinga opo etukuateseko movilinga ovio. Mongeleka, tupewa okulia okunyingi kupameka oupanga wetu na Siovaa, ngetyi omikanda, nono vidiu, novipuka ovikuavo vikahi mono site mbetu mo internet ngetyi o broadcasting. Tupu mo site yetu, muvasiwa ovipuka ovinyingi viahonekwa momalaka alamba po 1000! (Mat. 24:45-47) Ovanthu mouye veliyapauka mokonda yopulitika, nonongeleya. Ovakuavo veliyapauka mokonda vamwe ovahona, ovakuavo vahepa. Mahi ovanthu valamba po nomiliau etyinana, ovaumbili va Huku, velikuata okapandi mouye auho. Mongeleka, mutano 19 ya Abril yo 2019, ovaumbili va Huku mouye auho, vatangele kumwe otesitu yonthiki. Tupu monthiki oyo, ovanthu ovanyingi vena 20.919.041, veile Pehinangelo liononkhia mba Tatekulu. Onthue tuna elao liokutala, nokulinga onthele movilinga ovio vihuvisa unene vya Huku. Okusoka kelao olio, tyitulunda okuhatalukwa movilinga Siovaa etuavela.

7. Oñgeni ongeleka ya Sesusi itukuatesako okuhatalukwa?

⁷ Onkhalelo onkhuavo ipondola okutukuatesako okuhatalukwa movilinga viokuivisa, oputyina tuhetekela ongeleka ya Sesusi. Sesusi kayekele natyike tyimutalule okuava oumbangi wotyotyili. (Suau 18:37) Mongeleka, ketavelele etyi Satanasi emuavela “omauhamba aeho omouye nomunkhima wao.” Tupu ketavelele etyi ovanthu vahandele akale ohamba. (Mat. 4:8, 9; Suau 6:15) Ankho kesukile nomalumono, tupu ankho utupu owoma wokuyalwa. (Luka 9:58; Suau 8:59) Tyina ekolelo lietu lilolwa, tupondola vala okutualako inkha tuhinangela onondongwa mba apositolu Paulu. Walundile Ovakilisitau vahetekele ongeleka ya Sesusi opo ‘vahaponwe, iya avayekeko.’ — Heb. 12:3.

PWA-ELUNDO

8. Oumphua-lundo oityi, iya omokonda yatyi otyituwa otyo tyesukisa, haunene mononthiki mbetu?

⁸ Oumphua-lundo ounongo wokukevelela tyahiliya otyipuka tyimwe, ine otyitateka tyimwe tyipwe. Tuesukisa okupwa-elundo movipuka ovinyingi, mahi pamwe katyapepukile. Mongeleka, hamwe tuna nokukevelela otyitateka tyimwe tyipwe, ine hamwe tukahi-ale nokukevelela ehimbwe ovipuka oviwa Huku alaa okutuavela. Tupu, omuuli Habakuke nae wakevelele ehimbwe opo ovivi ankho vilingwa mo Sundaa vipue-ko. (Hab. 1:2) Ovalongwa va Sesusi navo vakevelele Ouhamba wa Huku uye “liwa-liwa,” opo uveyovole koutumini wo Loma. (Luka 19:11) No onthue, tukevelela onthiki Ouhamba wa Huku mauya okumanako ovipuka ovivi, aweeta ouye omupe, omu mamukakala vala ovaviuki. (2 Pet. 3:13) Mahi tuesukisa okupwa-elundo, tyina tukevelela onthiki Siovaa meketyilinga. Tutalei ononkhalelo mbumwe Siovaa etulongesa okupwa-elundo.

9. Onongeleka patyi mbulekesa okuti Siovaa wapwa-elundo?

⁹ Siovaa wetuavela ongeleka ongwa yokupwa-elundo. Mongeleka, waavelele Noe omuvo utuuka, opo atunge owato, nokukala “omuivisi wouviuki.” (2 Pet. 2:5; 1 Pet. 3:20) Tupu, Siovaa watehelele nawa Ambalaiau, etyi emupula konthele yetokolo liae liokuhanyako epunda-umbo lyo Sondoma no Gomola. (Gên. 18:20-33) Siovaa wapuile-elundo nova Isilayeli ankho vehevakuatyili mokueenda kuomanima omanyingi. (Nee. 9:30, 31) No onthue hono, tumona okuti Siovaa wapwa-elundo, mokonda wavela ovanthu aveho vahanda okukala omapanga ae ‘omuvo wokulivela.’ (2 Pet. 3:9; Suau 6:44; 1 Tim. 2:3, 4) Tupu Siovaa utulongesa okupwa-elundo pokati konongeleka tuvasa mondaka yae Ombimbiliya. Ongeleka ya Siovaa itulongesa okupwa-elundo tyina tuivisa.

10. Oityi tulilongesila kongeleka yomulimi, ivasiwa mu Tiaku 5:7, 8?

¹⁰ Tanga Tiaku 5:7, 8. Tupondola okulilongesila okupwa-elundo komulimi. Mongeleka, ovikuna vimwe vikula liwa, ovikuavo viseta okukula, haunene omiti viokuima ovinyango. Mo Isilayeli, opo omiti vikule umwe nawa, ankho vikala onohanyi epandu. Tyina ombila yamaloko omulimi okuna akevelela ale ovilia viyela, Pahe ateye. (Malu. 4:28) No onthue matukala ovanongo, tyina tuhetekela oumphua-lundo womulimi. Mahi pamwe katyapepukile.

11. Oñgeni oumphua-lundo utukuatesako movilinga viokuivisa?

¹¹ Ovanthu vahanda ñgeno vamona liwa-liwa ouwa utundilila kovilinga valinga. Soka ku etyi: Ine tuhanda ovikuna vietu viyele, tuesukisa okusuka navio, atuvihondyuela, nokuvitapelela. Tupu tyesukisa omuvo nononkhono, opo tutyivile okutukula omii viokapungulula momitima viovanthu tulongesa. Ine tuhanda okulinga ovalongwa, tuesukisa okutualako okuundapa unene. Tupu, okupwa-elundo tyipondola okutukuatesako okuhasoyo tyina ovanthu vehetutehelela. Mahi atee umwe tyina ovanthu vetutehelela, no ngotyo tuesukisa okupwa-elundo navo. Onthue katutyivili okukuluminya omulongwa wo Ombimbiliya, okupanda otyili. Atee umwe ovalongwa va Sesusi, pamwe ankho vaseta okunoñgonoka ovipuka Sesusi evelongesa. (Suau 14:9) Tyina tuivisa nokulongesa, tuhinangelei okuti onthue tupondola okutuika nokutapelela, mahi o Huku ukulisa. — 1 Kol. 3:6.

12. Oñgeni tupondola okupwa-elundo tyina tulongesa ombunga yetu?

¹² Otyipuka tyimwe tyipondola okutupuiya okupwa-elundo, oputyina tuivisa kombunga yetu. Mahi onondaka tuvasa mu Eclesiastes 3:1, 7, mbupondola okutukuatesako. Mbati: “Kuna . . . omuvo wokukala tyahiliya nomuvo wokupopia.” Ovituwa vietu oviwa vipondola okuava oumbangi kombunga yetu. Mahi apeho tyina tuna omphitilo yokuvelongesa otyili, tuesukisa okutyilinga. (1 Pet. 3:1, 2) Tyina tuivisa nokulongesa, tuesukisa okupwa-elundo novanthu aveho okukutikinyamo ombunga yetu.

13-14. Onongeleka patyi mboumphua-lundo tupondola okuhetekela?

¹³ Tupondola okulilongesila okupwa-elundo konongeleka mbovaumbili ovakuatyili vapopiwa mo Mbimbiliya, no vo pomuvo wetu. Soka okuti Habakuke nae ankho uhanda ovivi vina vipue-ko. Mahi walekesile okuti wapwa-elundo etyi ati: “Mandyitualako lutai pomutala wokuyunga.” (Hab. 2:1) Tupu Paulu walekesile okuti ankho uhanda unene “okumanuhula” ovilinga viae. Mokonda yotyo, atualako noumphua-lundo “okuava oumbangi nombili wonondaka onongwa.” — Ovil. 20:24.

¹⁴ Pahe tutale ongeleka yovalinepi vamwe, vakongelwe kosikola yo Gileade. Etyi osikola yapwa, avatumwa kotyilongo tyimwe kuna vala Onombangi mbehehi. Kotyilongo oko, kutupu unene onongeleya iya kavehi vesuka nokulongeswa Ombimbiliya. Mahi kovilongo oku vakuavo vatumwa okukaundapa, ovanthu ovanyingi vesuka nokulongeswa Ombimbiliya, iya atee umwe vamwe vakala Onombangi mba Siovaa. Mahi no ngotyo ovalinepi ovo, avatualako okuivisa noumphua-lundo, namphila ovanthu vehetavela. Konyima yetyi palamba omanima etyinana, umwe povalongwa vavo ambatisalwa. Oityi onongeleka mbokohale no mbo mononthiki mbetu mbutulongesa? Tala okuti ovanthu ovo ovakuatyili vaivisile nombili, iya kavayekele omavoko avo apululukwe. Mokonda otyo, Siovaa ayambe ononkhono valinga mbokupwa-elundo. No onthue ‘tulingei nga vana vatambula etyi Huku apopia mokonda yekolelo noumphua-lundo.’ — Heb. 6:10-12.

KALA NEKOLELO LIAPAMA

15. Oipi onkhalelo imwe ipameka etokolo lietu liokuivisa?

¹⁵ Onthue tutavela onondaka tuivisa iya tuhanda okumbupopila ovanthu vatyo aveho tuvasa. Tupu, onthue tuyumba onthumbi momilao vili mo Mbimbiliya. (Sal. 119:42; Isa. 40:8) Iya tupu tueete oñgeni omilao vyo Mbimbiliya vikahi nokufuisuapo mononthiki mbetu. Tumona oñgeni omuenyo wovanthu upiluluka tyina vaendela monondongwa mbo Mbimbiliya. Otyo tyitukalesa nonthumbi yokuti ovanthu aveho vesukisa umwe okuiva onondaka onongwa Mbouhamba.

16. Ngetyi tyipopia o Salmo 46:1-3, oñgeni okukala nekolelo mu Siovaa no mu Sesusi tyipameka etokolo lietu liokuivisa?

¹⁶ Tupu, onthue tuna ekolelo mu Siovaa, Ondyivi-ndyivi yonondaka onongwa tuivisa, no mu Sesusi Ohamba Youhamba wae. (Suau 14:1) Nga tukala-kala ñgoo novitateka Siovaa apeho otyiholamo tyetu nononkhono mbetu. (Tanga Salmo 46:1-3.) Tupu, tuna onthumbi yokuti o Sesusi una nokuhongolela ovilinga viokuivisa. Ukahi notyilinga nevililo noutumini apewa na Siovaa. — Mat. 28:18-20.

17. Popia ongeleka ilekesa omokonda yatyi tuesukisila okutualako okuivisa.

¹⁷ Ekolelo lipameka onthumbi tuna yokuti Siovaa mayambe ononkhono mbetu, iya pamwe metyilingi monkhalelo ankho tuhakevelela. (Ecl. 11:6) Ononthiki ambuho ovanthu ovanyingi-nyingi, vamona omikanda vietu koutuku-tuku wokuivisa. Okuti onkhalelo oyo yokuivisa ikahi nawa? Enga. Omukanda Ovilinga Vietu Viouhamba, wa Novembro yo 2014, upopia konthele yomuhikuena umwe ankho ulongeswa kosikola onene. Omuhikuena oo, ankho uhanda okuhoneka omukanda upopia konthele Yonombangi mba Siovaa. Iya ankho kekahi nokuvasa Ondyuo Yomaliongiyo, mahi nthiki imwe avasi okatuku-tuku komikanda apolo-ko omukanda upopia umwe etyi ankho ahanda okuhoneka. Etyi pakala, ambatisalwa iya pehepano omukokoli-ndyila. Ongeleka oyo itulunda okutualako okuivisa mokonda ilekesa okuti nkhele kuna ovanthu vesukisa okutehela onondaka onongwa Mbouhamba.

UHAYEKE OKUVOKO KUOVE KUPULULUKUWE

18. Omokonda yatyi tukalela nonthumbi yokuti ovilinga viokuivisa mavipu momuvo Siovaa anaka?

¹⁸ Onthue tuna onthumbi yokuti ovilinga viokuivisa mavipu momuvo watyo. Nkhele soka ku etyi tyamonekele pononthiki mba Noe. Siovaa walekesile okuti ulinga ovipuka momuvo watyo. Etyi ankho kuakambela omanima 120, Siovaa ankho utyii-ale onalupi ombila onene maiya. Konyima, apopila Noe atunge owato. Tyafuile mokueenda kuomanima 40 ine 50 etyi Ombila onene yeheneye, Noe watuaileko okuundapa. Namphila ovanthu ankho vehetavela, no ngotyo Noe watuaileko okuivisa atee etyi Siovaa emupopila okuti: ‘Pahe ou omuvo wokupaka ovinyama mowato.’ Konyima, momuvo watyo “Siovaa aiki omapito.” — Gên. 6:3; 7:1, 2, 16.

19. Ovipuka patyi matukamona, inkha katuyeke omaoko etu apululukwe?

¹⁹ Apa katutu Siovaa metupopila okuti ovilinga viokuivisa viapwa. Konyima, ahanyeko ouye wa Satanasi, aeta ouye omupe, omu mamukakala vala ovanthu vetavela ku Huku. Tyina onthiki oyo yehenehike-po, tupondola okuhetekela Noe, na Habakuke, no vakuavo vali vahayekele omavoko avo apululukwe. Mahi opo tutyivile, tuesukisa okuhatalukwa, nokupwa-elundo, nokupameka ekolelo lietu mu Siovaa no momilao viae.