“Vena Ehambu Ovovana Vahayeke-po” Siovaa

1-2. (a) Oityi ovatumini vehole okulinga onombangi mba Siovaa, iya oityi onombangi vehole okulinga? (b) Oñgeni okumoneswa ononkhumbi tyipondola okutuhambukiswa? (Tala olutalatu luokondye.)

PEHEPANO ñgana, mouye muna ovilongo vina 30 viailika ovilinga vietu. Iya movilongo vimwe ovatumini vapaka umwe ovakuatate vetu movikaleya. Okuti pena tyimwe valinga tyapenga? Petupu natyike valinga tyapenga komaiho a Siovaa. Etyi ovo muene valinga, okulilongesa vala ombimbiliya, nokuenda movilinga viokuivisa nokuenda komaliongiyo na vakuavo. Namphila ovakuatate ovo vamoneswa ononkhumbi, mahi no ngotyo valinga ononkhono mbokuhelipake mopulitika nokukakatela vala mu Siovaa.b Iya otyo tyivehambukiswa unene.

² Polutalatu luokondye tueetepo ovakuatate vahambukwa namphila vamoneswa ononkhumbi. Ovo vahambukwa mokonda vetyii okuti Siovaa wahambukwa navo mokonda yetyi vakakatela mwe. (1 Cró. 29:17a) Sesusi wati: “Vena ehambu ovo vana vamoneswa ononkhumbi mokonda youviuki . . . Hambukwei amukala nehambu enene, mokonda ondyambi yenyi keulu onene.” — Mat. 5:10-12.

ONGELEKA PALA ONTHUE

3. Ngetyi tyipopia Ovilinga 4:19, 20, omokonda yatyi ono Apositolu vehetavelele etyi vapopilwa no vatumini?

³ Ovakuatate vetu no nomphange vena ovitateka ngeevi viakalele Novakilisitau vokotyita tyotete. Vamonesilwe ononkhumbi mokonda yokupopia konthele ya Sesusi. Ovakoyesi vombonge onene yova Sundeu avevepopila okuti, “muhapopiei vali konthele ya Sesusi.” (Ovil. 4:18; 5:27, 28, 40) Oityi ono Apositolu mbalingile? (Tanga Ovilinga 4:19, 20.) Ono Apositolu ankho vetyii okuti una ‘wevetuma okwaava oumbangi konthele konthele ya Sesusi,’ omunene vali kuvo. (Ovil. 10:42) O Petulu na Suau mokonda ankho vakola omutima avevepopila umwe okuti onthue tuna okutavela tete ku Huku tyipona kuonwe, iya atee avevepopila okuti onthue kamatuyekepo-ale okuivisa konthele ya Sesusi. Pahe avevepulu okuti: ‘Muati hamwe okutavela kuonwe otyo tyaviuka vali tyipona okutavela ku Huku?’

4. Ngetyi tyipopia Ovilinga 5:27-29, ongeleka patyi ono Apositolu vetusila iya oñgeni tupondola okuvehetekela?

⁴ Ono Apositolu vetusila ongeleka ongwa onthue atuho tuna okulandula, “okutavela tete ku Huku tyipona kovanthu.” (Tanga Ovilinga 5:27-29.) Etyi vavetwa mokonda yokuhetavelele, ono Apositolu “avatundu Mombonge Onene yova Sundeu tyahambukwa mokonda vamoneswa ononkhumbi mokonda yenyina lya Sesusi,” iya avatualako umwe nokuivisa! — Ovil. 5:40-42.

5. Omapulo patyi tuesukisa okukumbulula?

⁵ Mokonda yotyipuka otyo ono Apositolu valingile pamwe tupondola okulipula ñgana. Oñgeni omunthu apondola okutavela tete ku Huku tyipona kovanthu mahi no ngotyo aendela mo nondaka mbokuati “tuna okutavela kovatumini”? (Loma 13:1) Oñgeni omunthu apondola okutavela kovatumini ngetyi Apositolu Paulu apopia mahi no ngotyo akakatela mu Huku? — Titu 3:1.

“OVATUMINI”

6. (a) “Ovatumini” vapopiwa mova Loma 13:1 ovalie, iya omovipuka patyi onthue tuna okuvetavela? (b) Oityi onthue twii tyayemba kovatumini?

⁶ Tanga ova Loma 13:1. Movelesikulu ei, ondaka “ovatumini” ipopia umwe ovanthu vokutumina ovilongo. Ovakilisitau vena okutavela kovatumini movipuka valinga nthiki-na-nthiki. Vena okueendela movitumino ovio mokuhakala ovanthu vonondyaya mokonda atee umwe ovitumino ovio pamwe viyakulila ovanthu va Siovaa. (Ehol. 12:16) Otyo onthue tuatilua tuna umwe okufeta elilimu, tuna okuvelinga onthilo, nokuvepa omunkhima tyina vetyiita. (Loma 13:7) Mahi ovatumini vatumina vala mokonda Siovaa oe weveyekelako. Otyo Sesusi wetyilekesa umwe nawa etyi ankho ekahi nokukoyeswa nomutumini wo Loma utiwa Pilatu. Etyi Pilatu apopila Sesusi okuti ame ndyityivila okukuyovola opo uhaipawe, Sesusi emukumbulula okuti: “Ove ankho kupondola okundinga natyike inkha hatyetyi wetyipeua na Huku.” (Suau 19:11) Nga Pilatu ovatumini wo hono navo pena ovipuka vehevili okulinga.

7. Omovipuka patyi onthue tuhapondola okutavela kovatumini, iya oityi ovatumini vena okuhinangela?

⁷ Ovakilisitau vetavela kovatumini movipuka vina viehevelingisisa okuliatela kovitumino vya Huku. Mahi kavetavela kovatumini tyina vevetuma okulinga ovipuka Huku ailika, ine tyina vevityilika okulinga ovipuka Huku ahanda. Mongeleka pamwe ovatumini vapopia okuti ovakuendye aveho vena okukala omafualali.c iya tupu pamwe vailika Ombimbiliya novilinga viokuivisa nomikanda vietu nokuenda komaliongiyo. Tyina Ovatumini valinga ovipuka ovio Siovaa mekevekoyesa. Mokonda etyi vekahi nokulinga Siovaa utyiete! — Ecl. 5:8.

8. Oñgeni ondaka “ovatumini” yelikalela nondaka “omukulami,” Iya omokonda yatyi otyipuka otyo tyesukisila unene?

⁸ Ondaka yokuati “ovatumini,” Ihangununa okuti, “ovo kukahi nawa, ovanene vatyo, ovo-kuli kounene.” Mahi otyo katyilekesa okuti, ovatumini “ovo vekahi vali nawa, ovanene vali, vokuli vali kounene tyipona Huku.” Ondaka ityipopia umwe nawa, ondaka “omukulami.” Namphila ovatumini pamwe vatiwa ‘ovanene vatyo,’ mahi Siovaa Huku omunene vali kuvo, omukulami. Mombimbiliya Siovaa Huku wapopiwa-mo tukuana okuti: “Omukulami.” — Dan. 7:18, 22, 25, 27.

“KUNA VALA OMUKULAMI WIKE”

9. Oityi omuuli Daniele amuene movilelenya akalele navio?

⁹ Movilelenya Daniele akalele navio waamuene omanyama ekuana alekesa omautumini ouye auho, akalele-ko kohale naa pahe ekahiko pehepano. Omautumini oo tyati umwe: Ombambilonia, o Meendo Persia, o Gelesia o Loma, iya pehepano pahe outumini uli-ko, o Anglo-Americana. (Dan. 7:1-3, 17) Konyima pahe Daniele amono Siovaa Huku upumphi kotyipundi tyae tyoutumini keulu. (Dan. 7:9, 10) Otyipuka otyo Daniele amuene hono tyilondola ovatumini.

10. Ngetyi tyilekesa Daniel 7:13, 14, 27, olie Siovaa makapa outumini iya otyo tyilekesa-tyi?

¹⁰ Tanga Daniel 7:13, 14, 27. Huku makapola outumini kovatumini aveho ewaavela una watokala okutumina, tupu una vali epondolo. Omunthu wapewa outumini oo olie? “Omunthu oo ankho ukahi ngomona womulume,” oo Sesusi Kilisitu “novasukuki Womukulami,” vo 144.000 vana mavakatumina “pala apeho.” (Dan. 7:18) Otyo tyilekesa okuti mokonda Siovaa oe vala “omukulami,” oe vala utyivila okulinga otyipuka otyo.

11. Oityi vali Daniele apopile tyilekesa umwe okuti Huku omukulami kovatumini vatyo aveho?

¹¹ Ovilelenya ovio Daniele amuene vielikuata umwe nonondaka apopia konyima. “Upola-ko onohamba, apake-ko onohamba.” Tupu ahoneka vali okuti: “Omunene oe Ohamba utumina ovanthu, tyokutumina utyipa ou ahanda.” (Dan. 2:19-21; 4:17) Okuti pena umwe nthiki imwe Huku ahanyeneko onohamba nokupakako Onohamba? Eenga!

12. Popia onongeleka mbulekesa oñgeni kohale Siovaa apolele onohamba koutumini. (Tala olutalatu.)

¹² Siovaa walekesa umwe okuti omukulami “kovatumini vatyo aveho.” Tutalei onongeleka ononthatu. Farao wapakele ovanthu va Huku koupika, etyi apopilwa opo eveyovole ngwe aanye. Mahi Huku ayovola ovanthu vae iya aipaela Falao melunga. (Êx. 14:26-28; Sal. 136:15) Ohamba yo Mbambilonia itiwa o Mbelesasale yalingile otyipito tyimwe “ailipaka kounene, okulitalelapo na Mwene weulu,” iya atee umwe “aihilivika ono huku mboolu no mbotyitasu, no mbopalata” tyipona Siovaa. (Dan. 5:22, 23) Mahi Huku emuhanyeko mokonda yomalityindailo. “Motyinthiki tyatyo otyo umwe,” Mbelesasale aipawa iya outumini wae aupewa Ova Meendo Pelesa. (Dan. 5:28, 30, 31) Omutumini wo Palestina utiwa o Helode Agilipa watumine okuipa omo Apositolu Tiaku tupu apake Petulu mokaleya tyihanda umwe okumuipaa. Mahi Siova ahayeke Helode alinge otyipuka otyo. “O andyu ya Siovaa aimuvelesa,” iya ankhi umwe. — Ovil. 12:1-5, 21-23.

13. Popia onongeleka mbulekesa okuti Siovaa utyivila umwe okuhanyako ono Hamba.

¹³ Etyi ono Hamba ononyingi-nyingi mbeliyonyeka kumwe no ngotyo Siovaa alekesa umwe okuti omukulami. Otyo wetyilinga puetyi Ova Isilayeli vati pokunyingila motyilongo tyalaelwe. Wevekuatesileko okuluisa ono Hamba mbuna 31 mbova Kanaa. (Jos. 11:4-6, 20; 12:1, 7, 24) Iya etyi Ova Asiria vati pokulwisa ova Isilayeli Siovaa ahanyeko ohamba Mbeni-Handande kumwe no nohamba 32 Mbova Asilia. — 1 Reis 20:1, 26-29.

14-15. (a) Ohamba Nambukondonosole no Hamba Daliu vapopile-tyi konthele ya Siovaa? (b) Oityi Omuhoneki wo Salmu apopia konthele ya Siovaa no vanthu vae?

¹⁴ Etyi ohamba Nambukondonosole yahimbika okulimphanda mokonda yovipuka ankho ina, Siovaa alekesa vali okuti Omukulami. Mokonda ohamba oyo ankho kayeliole-le omutima nokulekesa okuti Siovaa oe vala watokala okutumina, Siovaa emukalesa otyova. Etyi pahe ohamba yakala nawa “aihilivika omukulami” iya ainoñgonoka okuti “[outumini wa Siovaa] outumini wapeho.” Tupu aipopi okuti: “Petupu nawike upondola okumutyika.” (Dan. 4:30, 33-35) Etyi Siovaa ayovola Daniele metoto liononkhulika omutumini Daliu apopi okuti: “Movilongo aviho ndyitumina, ovanthu vena okutila Huku ya Ndaniyele. Mokonda ngwe o Huku una omwenyo, ukala-ko apeho. Kutupu onthiki naike ouhamba wae maukahanywa-ko, outumini wae utualako apeho.” — Dan. 6:7-10, 19-22, 26, 27, okatoi.

¹⁵ Omuhoneki wo Salmo wapopia okuti: “Siovaa wahanya onomphango mbovanthu vovilongo. Wahanya onomphango mbovanthu.” tupu apopi vali okuti: “Vena ehambu ovo vana Huku yavo o Siovaa, ava akoya opo vakale ovanthu vae.” (Sal. 33:10, 12) Naina tuna umwe vala okukakatela mu Siovaa.

OVILWA VIAHULILILAKO

16. Oityi onthue twii okuti Siovaa meketyilinga umwe “mononkhumbi ononene,” iya omokonda yatyi? (Tala olutalatu.)

¹⁶ Tuelilongesa ovipuka Siovaa alingile kohale. Mahi pahe oityi makalinga komutwe wandyila? Onthue tuna onthumbi yokuti Siovaa makayovola ovaumbili vae “mononkhumbi ononene” matukala nambo apa katutu (Mat. 24:21; Dan. 12:1) Otyo meketyilinga tyina ovanthu vamwe vamelihonyeka opo vautukile ovaumbili vae ovakuatyili. Ovanthu ovo vaihanwa okuti Ngonge na Mangonge. Namphila movanthu ovo mamukeliyonyeka ovanthu ovakuavo vena 193 veongano lyo Nações Unida, mahi onthue tutyii okuti ku Siovaa noko noandyu mbae, kavavete-ko. Siovaa wapopia okuti: “Ame mwene mandyikelinkhimaneka, mavakankhola umwe okuti ndyikola, mandyikelinoñgonokesa kovanthu vovilongo ovinyingi. Mavakankhola umwe okuti ame, ame Siovaa.” — Eze. 38:14-16, 23; Sal. 46:10.

17. Oityi Ombimbiliya ipopia matyikamoneka apa katutu no nohamba na vana vokukakatela mu Huku?

¹⁷ Ovilwa vya Ngonge na Mangonge, ovio mavieta umwe o Alumagedom omu Huku makahanyako “Onohamba mbo kombanda yohi aiho.” (Ehol. 16:14, 16; 19:19-21) Mahi, “Ovaviuki ovo vala mavakakala kombanda yohi. Ovokukakatela vala motyili mavakala-ko apeho.” — Pro. 2:21, okatoi.

TUNA OKUKAKATELA VALA MU SIOVAA

18. Oityi ovakilisitau vamwe valinga, iya omokonda yatyi? (Daniel 3:28)

¹⁸ Mokueenda kuomanima omanyingi, Ovakilisitau vamwe vapaka motyiponga omuenyo wavo mokonda vehole Siovaa, Omutumini wavo. Ovo vakakatela umwe vala mu Siovaa ngetyi tyalingile ova Hembeleu vetatu vapakelwe mofolono yatokota unene. Mokonda vatuaileko okukala ovakuatyili ko Mukulami wohi aiho atyiyovola omienyo viavo. — Tanga Daniel 3:28.

19. Tyina Siovaa akoyesa ovanthu vae okutyi atalela, iya otyo tyitulunda okulinga-tyi?

¹⁹ David wapopile omokonda yatyi tyesukisa umwe vala okukakatela mu Siovaa. Watile: “Siovaa makaongela omphela ovanthu. Nkhoyese-vo Siovaa okutalela kouviuki wange.” (Sal. 7:8) Tupu apopi vali okuti: “Okukoleleya tyindyakulile, okuviukisa tyindyakulile.” (Sal. 25:21) Opo tukale nehambu, tuesukisa okutualako okukala ovakuatyili ku Siovaa nokuhayeke otyipuka natyike tyinyone oupanga wetu nae. Inkha tulinga ngotyo, matupopi umwe ngetyi tyapopile omuhoneki umwe wo Salmo watile: “Vena ehambu ovovana vahavelwa onombei monondyila mbavo, vana vaendela vala motyitumino tya Siovaa.” — Sal. 119:1, okatoi.