Ovakulu Vevali Pahe Navo Vakala Ononkhalamutwe mbo Nombangi
MONTHIKI 5 YA KULINDI YO 2024, meliongiyo lilingwa like menima mwapopilwe okuti: ovakulu vevali oo Jody Jedele na Jacob Rumph, vakala Ononkhalamutwe mbo Nombangi mba Siovaa. Ovakulu ovo vevali, vena ovipuka ovinyingi valinga-linga movilinga vya Siovaa.
O Jody Jedele nomukai wae Damaris.
Omukulu Jedele watyitilwa mepunda-umbo lyo Missouri, mo Estados Unidos, ovohe Onombangi. Apa ankho vakala ankho petupu Onombangi ononyingi. Wanoñgonokele ovakwatate vovilongo ovinyingi ankho veya okwivisa oviwa ovipe apa vakala. Etyi omukulu Jedele atala otyipuka velihole notyipuka velikwata-po etyipande unene. Otyo atyimupe umwe ondundo, tyina tyiti monthiki 15 ya Kulindi yo 1983 ambatisalwa. Ankho uhole unene ovilinga viokwivisa. Etyi amana okulongeswa tyina tyati mohanyi ya Tungonkhe yo 1989 ahimbika ovilinga vioukokoli-ndyila.
Pweetyi omukulu Jedele, nomphange yae nkhele ovatutu vala, pamwe ovohe ankho vevetwala vakatale o Mbetele. Pahe navo avapange okukaundapa mo Mbetele, etyi pakala aveho ngamo umwe vakaundapa. Omukulu Jedele wahimbika okuundapa ko Mbetele yo ko Wallkill mohanyi ya Tungonkhe yo 1990. Tete waundapele kokukomba, etyi pakala aundapa motyilinga tyokukwatesako ava vavela.
Pomuvo watyo opo, omawaneno o Espanhol ankho eli nokukula, pahe ankho musukisa ovakwendye. Omukulu Jedele ailukila mewaneno limwe lyo Espanhol, ahimbika okulilongesa elaka olio. Etyi pakala avelinoñgonoka nomuhikwena umwe womewaneno lyo Espanhol, omukokoli-ndyila utiwa o Damaris. Avelinepe avakaundapa aveho mo Mbetele.
Etyi tyati mo 2005 mo Mbetele avatundu-mo vakakalele ovohe. Pomuvo opo ankho ovakokoli-ndyila. Omukulu Jedele wali omulongesi Mosikola Yovilinga Vioukokoli-ndyila, tupu wali umwe povakulu v’Okomisau Yokwaamena Onombangi Kohonde, n’Okomisau yo Vokutunga Onondywo Mbomaliongiyo Motyilongo tyavo.
Etyi tyati mo 2013, omukulu Jedele nomukai wae avaihanwa vali ko Mbetele vakaundape motyilinga tyokutunga o Mbetele yo ko Warwick. Tupu vaundapele-ale mo Mbetele yoko Patterson no yoko Wallkill. Omukulu Jedele tupu waundapele Moseketa Yokululika Ovilinga Viokutunga Motyilongo, no motyilinga Tyokupopia Nonosipitali. Etyi tyati mu Tyitalale yo 2023, akala Omukwatesiko Wokomisau Yovilinga. Etyi asoka kovilinga akala-kala navio wapopia wati: “Tyina twamapewa otyilinga otyikwavo, pamwe tulinga otyiho. Mahi pomuvo watyo opo tuna okuyumba onthumbi mu Siovaa, mokonda oe utukwatesako okulinga nawa ovilinga viae.”
O Jacob Rumph nomukai wae Ing.
Omukulu Rumph watyitilwa ko California, ko Estados Unidos. Pweetyi omona, mee yae ankho kaivisa vali kaende vali komaliongiyo, mahi no ngootyo ankho umulongesa otyili ty’Ombimbiliya. Omanima atyo aeho omukulu Rumph ankho ukapilila-po vavoo yae Ombangi. Vavoo yae emukwatesako okusuka notyili. Etyi omukulu Rumph ena omanima 13 aiti vemulongaise Ombimbiliya. Tyina tyiti monthiki 27 ya Tungonkhe yo 1992, ambatisalwa. Na mee yae pahe ahimbika okwenda vali komaliongiyo no movilinga viokwivisa, pahe ekulu umwe motyili ambatisalwa.
Omukulu Rumph ankho umona okuti ovakokoli-ndyila vena ehambu. Etyi amana okulongeswa tyina tyiti mohanyi ya Tungonkhe yenima lyo 1995 nae akala omukokoli-ndyila. Etyi tyati mo 2000, ailukila ko Equador ankho kwesukisa ovaivisi. Ngako velinoñgonokela na Inga, omukokoli-ndyila watunda ko Canada. Etyi pakala avelinepe. Avakala umwe vala mo Equador mewaneno limwe ankho muna vala ovaivisi vehehi. Mahi pehepano ewaneno enene, muna ovaivisi ovanyingi.
Etyi pakala, omukulu Rumph nomukai wae avakala ovakokoli-ndyila vavilapo, apakala vala katutu avakala ovapili vomawaneno. Mo 2011 avakalongeswa Mosikola yo Sileyande 132. Etyi osikola oyo yapwa, atyiti avakaundapa oku, avakaundapa oku. Vaundapele mo Mbetele, vali onomisionaliu, vali ovapili vomawaneno. Omukulu Rumph tupu wali omulongesi Mosikola Yovaivisi Vouhamba.
Mokonda Yomukihi Wokolona-Vilu, omukulu Rumph nomukai wae avakondoka ko Estados Unidos. Pahe avaihanwa ko Mbetele yoko Wallkill, omukulu Rumph alongeswa aundape Moseketa Yovilinga. Etyi alongeswa avakondoka ko Mbetele yoko Equador. Omukulu Rumph nae ankho o umwe Povakulu Vokululika o Mbetele. Etyi tyati mo 2023 avakaundapa ko Mbetele yoko Warwick. Etyi tyati mohanyi ya Kupupu yo 2024, omukulu Rumph akala Omukwatesiko Wokomisau Yovilinga. Etyi asoka umwe nawa oko aundapa-undapa apopi ati: “Tyilingisa otyiwa otyilinga tyimwe hatyilongo-ko mahi ovanthu uundapa navo.”
Tupandula unene ovilinga ovinene ovakulu ovo valinga, ‘tuvekwatei nomavoko evali.’ — Fili. 2:29.