Wahalimbweko Okwiitilako Vakwenyi

1. Oityi tyilekesa okuti Siovaa wesuka nomalikwambelo etu?

ELIKWAMBELO otyipuka tyimwe otyiwa unene. Nkhele tusokei vala: Siovaa waavela onoandyu ovilinga vimwe. (Ovii. 91:11) Omona wae Sesusi, wemwavela ovilinga ovinene vali. (Mat. 28:18) Mahi olie aavela otyilinga tyokutehelela omalikwambelo? Petupu ou etyaavela, mwene otyae. Siovaa ‘Omuteheleli womalikwambelo.’ — Ovii. 65:2.

2. Oityi tulilongesila kweetyi tyalingile omutumwa Paulu?

² Pokulikwambela tupondola okupopila Siovaa ovipuka vietu mwene, mahi tupu tupondola okwiitilako vakwetu. Nomutumwa Paulu otyo alingile. Ankho wiitila-ko ovanthu ovanyingi. Etyi ahonekela ewaneno liova Efesu watile: “Apeho ndyimutumbula momalikwambelo ange.” (Efe. 1:16) Mahi tupu ankho wiitilako omunthu wike-wike. Wahonekelele Timotiu ati: “Ame ndyipandula Huku, . . . tyina ndyilivondela tyinthiki na tyitenya ove hikulimbwa nii vala.” (2 Tim. 1:3) Paulu mwene ankho una ovipuka ovinyingi vimutokotesa omutwe. (2 Kol. 11:23; 12:​7, 8) Mahi no ngootyo pokulikwambela ankho wiitilako vakwavo.

3. Oityi pamwe tulimbilwako okwiitilako vakwetu momalikwambelo?

³ Pamwe tupondola okulimbwako okwiitilako vakwetu tyina tulikwambela. Omokonda yatyi? Omphange umwe utiwa o Sabrinaa wapopia tyimwe tyitulimbiswako. Wati: “Ovilinga vialinga ovinyingi. Pokulikwambela tupondola okupopia evi tuli nokukondya navio, neevi twesukisa. Kokwiitilako vakwetu atulimbwiko.” Okuti noove uhole okulimbwako? Opo naina onthele ei maikukwatesako. Monthele ei matulilongesa (1) omokonda yatyi tyesukisila okwiitilako vakwetu, (2) ovipuka tuna okulinga tyina tuti pokuveitilako.

OITYI TWIITILILAKO VAKWETU?

4-5. Oityi tutila okwiitilako vakwetu tyina “ononkhono ononene”? (Tiaku 5:16)

⁴ Omalikwambelo tulingila vakwetu ena “ononkhono ononene.” (Tanga Tiaku 5:16.) Okuti tyina twiitilako vakwetu momalikwambelo etu, tyipondola okuvekwatesako? Eenga, tyivekwatesako. Tala etyi tyalingile Sesusi. Ankho utyii okuti omutumwa Petulu mati kemwii, pahe emupopilila okuti: “Ame ndyili nokukulingila omalikwambelo, eyumba-nthumbi liove liahatepuluke.” (Luka 22:32) Nomutumwa Paulu ankho utyii umwe okuti okulilingilako omalikwambelo tyitukwatesako. Etyi akwatwa apakwa mokaleya mo Loma ngwe utupu etyi alinga tyapenga, apopila Filemo okuti: “Ame ndyityii okuti, mokonda yomalikuambelo enyi, ame mandyikondolwa oko kwoonwe.” (File. 22) Etyi pakala Paulu mokaleya apolwa-mo atwalako novilinga viae viokwivisa.

⁵ Mahi pokulikwambela tuna okulunguka twahalinge ngatyina uti tuli nokukuluminya Siovaa. Tyina twiitilako vakwetu Siovaa utyimona okuti, twesuka navo, ya pamwe ulinga umwe etyi twaita. Otyo apeho tulikwambelela nonthumbi ku Siovaa atuyekela ovipuka pomavoko ae. — Ovii. 37:5; tala 2 Ova Kolindu 1:11.

6. Okwiitilako vakwetu tyitukalesa ñgeni? (1 Petulu 3:8)

⁶ Okwiitilako vakwetu tulinga ovanthu ‘vonkhenda.’ (Tanga 1 Petulu 3:8.) Omunthu wonkhenda oyou umona mukwavo wehulilwa, emukwatesako. (Malu. 1:​40, 41) Omukulu umwe wewaneno utiwa o Michael wapopia okuti: “Tyina ndyiitilako vakwetu, opo ndyivehumba vali. Evi veli nokukondya navio hivilimbwa. Ndyilinga ngatyina uti tuli vala mphangu ike.” Omukulu omukwavo wewaneno wapopia ouwa oukwavo utuka-ko, wati: “Tyina twamaitilako mukwetu melikwambelo, tupu tuna etyi tulinga tumukwateseko.” Wapopia vali wati: “Okukwatesako omunthu twaitilako melikwambelo, ongatyina tukumbulula elikwambelo onthwe mwene twalingile.”

7. Okwiitilako vakwetu tyitukwatesako okuhalingi-tyi? (Ova Filipu 2:​3, 4) (Tala omalutalatu.)

⁷ Okwiitilako vakwetu katwiiki omutwe movitateka vietu vala. (Tanga Ova Filipu 2:​3, 4.) Atuho vala mokonda yokuli mouye utuminwa n’Eliapu, tuna ovitateka tukondya navio. (1 Swau 5:19; Ehol. 12:12) Mahi no ngootyo tyina apeho twiitilako vakwetu momalikwambelo etu, tulekesa okuti, ‘tutyii okuti na vataveli vakwetu mouye auho veli nokukondya neevi [onthwe] tukondya navio.’ (1 Pet. 5:9) Omukokoli-ndyila umwe utiwa o Katherine wati: “Tyina ndyiitilako vakwetu, tyinthyinangelesa okuti navo vena ovitateka. Otyo tyinkhwatesako anahaiki vala omutwe mweevi ndyili nokukondya navio.”

AVA TUSUKISA OKWIITILAKO

8. Ovalie tupondola okwiitilako momalikwambelo etu?

⁸ Pokulikwambela, ovalie tupondola okwiitilako? Vamwe tupondola okwiitilako ovava: Ovokuvela, ovakwendye novahikwena valingwa omukwele kosikola, vahindilwa okulinga evi viapenga, na vana vokwakulupa. Tupu tupondola okwiitilako ava tufenda navo vahukaiswa novavo, okuti hatyo o novatumini. (Mat. 10:​18, 36; Ovil. 12:5) Na vana vasa-po omaumbo avo mokonda yovilwa, novokumona emone kombanda yovihuna. Ovakwatate ovo nonomphange katuvei, mahi tyina tuveitilako pokulikwambela, ngootyo tuli nokulandula otyitumino Sesusi apopile tyati: “Lilingei olwembia na vakwenyi.” — Swau 13:34.

9. Omokonda yatyi twesukisila okwiitilako ava valulika ovilinga meongano novakai vavo?

⁹ Tupu tupondola okwiitilako vokululika ovilinga meongano lya Siovaa. Pwoovo pati umwe Nononkhalamutwe Mbonombangi, novakwatesiko vavo, Novakulu Vokululika o Mbetele, novokululika ovilinga mono Mbetele, novakulu ovapili vomawaneno, novakulu vomawaneno, novakwatesiko vovakulu vomawaneno. Ovakulu ovo vena ovilinga ovinyingi, mahi tupu vena ovipuka ovinyingi vatutumba navio. (2 Kol. 12:15) Omukulu umwe omupili womawaneno utiwa o Mark wati: “Ame tyindingisa otyiho okuli kokule noo tate, vakulupa ngwe ekongoko liavo kalitwalamo nawa. Namphila omphange yange nombwale yae vehole okuvekwatesako, no ngootyo tyindyihama mokonda movipuka vimwe hityivili okuvekwatesako.” Tyilinge evi ovakulu ovo vakondya navio tuvii, tyilinge katuvii, mahi no ngootyo otyiwa okuveitilako momalikwambelo etu. (1 Tes. 5:​12, 13 ) Tupu tupondola okwiitilako ovakai vovakulu ovo, mokonda vehole okukwatesako ovalume vavo okulinga nawa ovilinga viavo.

10-11. Oityi tutila okulikwambela atuti Siovaa kwatesako ovakwatate nonomphange tyimuhambukiswa?

¹⁰ Ngeetyi twelilongesa-le pamwe twiitilako ovanthu ovanyingi, ovakwatate nonomphange. Pamwe pokulikwambela petupu omunthu tutumbula, tuti vala Siovaa kwatesako ovakwatate nonomphange veli movikaleya, na vana vasiwa-po novavo. Omukulu umwe wewaneno utiwa o Donald wati: “Mokonda ovakwatate ovanyingi veli nokukondya novitateka, pamwe pokulikwambela tuti vala Siovaa kwatesako ovakwatate mouye auho.”

¹¹ Okuti omalikwambelo oo ahambukiswa Siovaa? Eenga! Onthwe katwii ovitateka patyi vakwetu tufenda navo mouye auho veli nokukondya navio. Naina katyapengele okwiita okuti, kwatesako ovakwatate nonomphange. (Swau 17:20; Efe. 6:18) Omalikwambelo atyo oo alekesa okuti, ‘tuhumba vataveli vakwetu.’ — 1 Pet. 2:17.

OKWIITILAKO WIKE-WIKE

12. Oityi matyitukwatesako tumone ou matwiitilako tyina tulikwambela?

¹² Tala umwe nawa. Tyihe okwiitilako vala ovakwatate aveho, tupu tyitavela okwiitilako omunthu otumbula umwe enyina liae. Okuti mewaneno lienyi muna umwe uvela? Muna omukwendye wasoya mokonda kosikola uhongilinywa okulinga evi viapenga? Okuti muna omukulu utekula ovana aike, ututumba evelongese ‘onondunge mba Siovaa’? (Efe. 6:4) Ine utala umwe nawa, momono ava vena ovitateka, okala nokankhenda navo, otyo atyikupe okuveitilako tyina ulikwambela.b — Loma 12:15.

13. Oityi tuna okulinga twiitileko umwe na vana twehei?

¹³ Tumbula enyina. Tyina tulikwambela tupondola okutumbula omanyina a vakwetu tufenda navo, mahi twehei. Tupondola okusoka Konombangi vakwetu vapakwa movikaleya ko Crimeia noko Eritreia noko Rússia noko Singapura. Pahe opi movasi omanyina avo? Mo site jw.org, movasi-mo omanyina ava vapakwa movikaleya.c Omukulu umwe omupili womawaneno utiwa o Brian, wati: “Netyimona okuti okuhoneka omanyina a vakwetu vakwatwa, pahe andyietangela peulu, pokulikwambela ndyivetumbula umwe.”

14-15. Oityi tuna okulinga tunoñgonoke etyi matwiitilako vakwetu?

¹⁴ Uti Siovaa vekwatesako motyongandi. Omukulu Michael, twapopia-le wati: “Tyina ndyitanga mo site jw.org vakwetu vapakwa movikaleya, ndyisoka oñgeni ñgeno nakala ankho ame napakelwe mokaleya. Ndyityii okuti ñgeno nalinga otyiho nomukai wange, ñgeno ndyikalela vala okusoka ine veli umwe nokumutekula nawa. Okusoka ngootyo tyinkhwatesako okunoñgonoka etyi ndyipondola okwiitilako vana vapakwa movikaleya vanepa aa vanepwa.” — Hemb. 13:​3, okatoi.

¹⁵ Tupu okusoka kweevi vakwetu vakondya navio movikaleya, tyipondola okutukwatesako tyina tulikwambela atuti Siovaa vekwatesako motyongandi. Tupondola okwiita opo vokuveyunga vevelinge onkhenda. Tupu tupondola okwiita opo ovatumini vaneñgene omitima, avayeke ovakwatate vetu okufenda Siovaa. (1 Tim. 2:​1, 2) Tyihe-otyo vala, tupondola okwiitilako vomewaneno liou wapakwa mokaleya, vapame omutima. Tupu tyitavela okwiitilako ovanthu vahafende Huku vatalele komukalelo omuwa waava vapakwa movikaleya, avetavela okulilongesa otyili. (1 Pet. 2:12) No pokwiitilako ovakwatate veli nokukondya novitateka ovikwavo, upondola okusoka etyi vekahi, unoñgonoke etyi moveitilako pokulikwambela. Tyina tutala nawa, na tyina pokulikwambela tutumbula omanyina, atuti umwe Siovaa vekwatesako motyongandi, opo ngootyo tulihole umwe. — 1 Tes. 3:12.

POKULIKWAMBELA SOKA NAWA

16. Oityi twesukisila okusoka nawa etyi matupopi pokulikwambela? (Mateusi 6:8)

¹⁶ Ngeetyi twelilongesa omalikwambelo tulinga apondola okukwatesako vakwetu. Mahi pokulikwambela twesukisa okusoka nawa etyi matupopi. Tyina tulikwambela twahalingei ngatyina uti tuna nokupopila Siovaa otyipuka ehei, hamwe atulingi ngatyina uti tuli nokumupakela-mo aendeke ovipuka ngeetyi onthwe twasoka. Siovaa aviho ovafendi vae vesukisa mwene uvii nawa, na apa nkhele twehenemupopile-vio. (Tanga Mateusi 6:8.) Naina omokonda yatyi twesukisila okwiitilako vakwetu? Vimwe twevipopia-ale monthele ei, mahi otyikwavo okuti tuveitilako tupu okwesuka navo. Tuveitilako mokonda tuvehole. Ya Siovaa uhambukwa unene tyina amona okuti ovanthu vae vena olwembia ngae.

17-18. Oityi twesukisila okwiitilako vakwetu momalikwambelo? Tutyeeleka natyi?

¹⁷ Na tyina twamaitilako vakwetu mahi etyi veli nokukondya natyo atyahalambe-ale, Siovaa utyeete, utyimona okuti tuvehole. Otyo tyikahi vala ngotyipuka etyi: Soka kovalinepi vena ovana vevali, umwe omukwendye ou omukwavo omukainthu. Pahe omukwendye watyo avele. Omukainthu watyo aende ku tate yae ati: “Tate ngandi ñgeno ukala-vo nawa, tukanyane atuho!” He uhole omona wae, uli-ale nokumuhakulisa. Mahi tyina amamono okuti omukainthu wesuka nomphange yae, uhambukwa.

¹⁸ Na Siovaa wetupopila okuti tuna okulikwatesako na vakwetu nokuveitilako momalikwambelo. Tyina tuveitilako momalikwambelo ngootyo tuvehole, ya Siovaa otyipuka otyo nae utyimona. (2 Tes. 1:3; Hemb. 6:10) Ngeetyi twelilongesa okwiitilako vakwetu momalikwambelo etu tyipondola okuvekwatesako. Naina, twahalimbweiko okwiitilako vakwetu momalikwambelo.