Omapulo Ovatangi
Olusoko patyi Siovaa makapaka momitima viovatumini?
Pokupopia oku makuhimbikila ononkhumbi ononene Eholololo 17:16, 17 yati: “Ombu onombinga 10 wamona, nambo nenyama wamona mambukayala ekunga, mambukelisa poluhandya, ambukelisa muhoyo, mambukalia ohitu yalio ambuliyoko motupia. Mokonda Huku wapaka momitima viambo mbulinge etyi ngwe asoka, yoo, mbulinge etyi ambuho mbasokela kokulike, mokupa ouhamba wambo enyama.” Omikanda vietu ankho vipopia okuti, olusoko Siovaa mapake momitima viovatumini, olwokuhanya-ko onongeleya mbomatutu.
Etyi ankho tupopia tuna okutyipilulula. Olusoko Siovaa makapaka momitima viovatumini, olwokwaavela ouhamba wavo enyama. Opo tunoñgonoke oñgeni otyipuka otyo matyikaenda matulilongesa-po omapulo amwe.
Ovalie vapopiwa-mo? Mwapopiwa “ekunga” tupu liatiwa “o Mbambilonia Onene,” onongeleya ambuho mbomatutu. Tupu mwapopiwa enyama ‘liotyivala otyinkhuhu.’ Enyama olio, eongano vati olio lieta ombembwa mouye liahimbika mo 1919, ankho litiwa o Liga das Nações, pahe litiwa o Nações Unidas. (Ehol. 17:3-5) Tupu mwapopiwa “onombinga 10,” ovatumini aveho vakwatesako enyama olio.
Ekunga nenyama liotyivala otyinkhuhu velienda ñgeni? Ekunga lipumphi ‘kenyama,’ likwatesako enyama, lihindila enyama okulinga etyi lihanda.
Ekunga malilingwa ñgeni? Maliyalwa nenyama nonombinga 10. Mavekelipola omalumono alio, ovivi lilinga avikala poluhandya. Pahe avelihanye-ko umwe ngeetyi Siovaa ahanda lilingwe. (Ehol. 17:1; 18:8) Opo yatyo opo, opo mapapwila onongeleya ambuho mbomatutu. Mahi tyina otyo tyehenemoneke-po, Siovaa malingi otyipuka tyimwe tyehenelingwe-ale.
Oityi Siovaa malingi? Siovaa mapake momitima viovatumini olusoko lwokwaavela ounene wavo, outumini wavo, enyama liotyivala otyinkhuhu, o Nações Unidas. (Ehol. 17:13) Otyipuka otyo matyiende ñgeni? Okuti mwene ovatumini aveho mavelisoko avati twaavelei ounene wetu o Nações Unidas? Au! Ombimbiliya ipopia okuti mwene Huku oe mevesokesa otyipuka otyo. (Omih. 21:1; tala Isaiya 44:28.) Okuti matyiti omutumini ou aavela ounene wae o Nações Unidas, akuya vali omutumini omukwavo emwaavela ounene wae, atee pahe aveho vemwaavela outumini? Au! Mavetyilingila vala aveho kokulike. Pahe opo enyama mokwapewa outumini malilingi etyi Siovaa ahanda, alihanye-po onongeleya ambuho mbomatutu.
Ovipuka komutwe oku mavikaenda ñgeni? Twahasokei okuti matwivi ovanthu mavapopi okuti, katutu-katutu ovatumini pahe veli nokuhula ko Nações Unidas. Opo matyiende ñgeni? Kamatyisete-ale. Matukati vala ñgaa Siovaa wapaka-le momitima viovatumini olusoko lwokwaavela ounene wavo enyama. Tyina otyo tyamamoneka-po opo pahe ononkhumbi ononene, mbuhungi kokuhimbika. Naina ‘twahalalei tukalei tyipahi’ mokonda ovipuka mavipiluluka vala liwa-liwa. — 1 Tes. 5:6