Okuti Ovilinga Viove Vikahi Ngeyombo?
OVILINGA vietu viokuivisa viesukisa iya viakolela unene. Mahi ovanthu tuvasa tyina tuivisa haveho vetavela. Alo umwe vana vapopia okuti vesuka netyi Ombimbiliya ipopia, vasoka okuti okulilongesa Ondaka ya Huku katyesukisile.
Tala ongeleka ya umwe utiwa Gavin. Ankho wenda apeho komaliongiyo, mahi ankho kahande okulongeswa Ombimbiliya. Gavin wati ankho kahande mokonda kei ovipuka ovinyingi Mombimbiliya iya kahande vakuavo vetyinoñgonoke. Ankho una owoma wokuti hamwe mavemuiti anyingile mongeleya, ngwe ankho kahande vetyiimbuke. Oityi ove usoka? Okuti ankho tyitavela okukuatesako Gavin? Soka omapiluluko omawa Ombimbiliya ipondola okulinga momuenyo womunthu. Jeova wapopilile ova Isilayeli okuti: “Onondaka mbange mambukala ngomata eyombo, ngatyina ombila inyenya keholi.” (Deuteronômio 31:19, 30; 32:2) Tulilongesei ovipuka vimwe eyombo lilinga, atuvieleka novilinga vietu viokuivisa opo tyitukuatesako okupopia nawa “novanthu vomihoko viatyo aviho.” —1 Timóteo 2:3, 4.
OÑGENI OVILINGA VIOKUISA VIKAHI NGEYOMBO?
Eyombo Litalaleka. Eyombo liwila katutu-katutu alikala omata omaande. Oñgeni onondaka mba Jeova “mbakalele ngomata eyombo”? Wapopile nohole novanthu vae, nounkhengela, tupu walekesile okuti wesuka novanthu vae. Onthue tumuhetekela putyina tukala nonthilo netyi vakuetu vetavela. Tuvekuateseko vala vanoñgonoke etyi tyaviuka, muene ngavo vatokola etyi mavalingi. Tyina tulekesa okuti tuesuka novanthu, matyivekuatesako okusuka netyi tuvepopila iya ovilinga vietu mavikuatesako vali nawa ovanthu.
Eyombo lineñgenesa. Ovilinga vietu viokuivisa mavineñgenesa ovanthu vasoka monkhalelo yelikalela no yetu iya otyo matyivekuatesako okunonoñgonoka otyili. Omukuatate umwe utiwa Chris, etyi ehimbika okulongesa Gavin Ombimbiliya, ankho kemukuluminya. Ankho wovola vala ononkhalelo ononkhuavo mambukuatesako Gavin akale nehando liokulilongesa Ombimbiliya. Chris apopila Gavin okuti Ombimbiliya ipopia otyipuka tyimwe tyesukisa unene, inkha utyinoñgonoka matyikukuatesako okunonoñgonoka okuti omaliongiyo esukisa. Pahe Chris apopi okuti omaulo Ombimbiliya ankhuatesako okunoñgonoka okuti Ombimbiliya omukanda upopia otyili. Okutunda opo, pahe avelilongesa omaulo Ombimbiliya ekahi nokufuisuapo. Etompho olio lianeñgenesa Gavin, etavela okulilongesa Ombimbiliya.
Eyombo liesukisa pala omuenyo. Pomuvo wova Isilayeli, ombava ankho pamwe ikala ehimbwe. Ovikuna ankho viuvuka iya avikukuta mokonda kutupu eyombo. Jeova waulile okuti mononthiki mbetu mbuno, omutenya mautokota unene, tyilekesa okuti ovanthu mavakala nohunga “yokuiva ondaka ya Jeova.” (Amós 8:11) Jeova walaa okuti ovalembulwa mavakala “ngatyina eyombo litunda kwe,” putyina vaivisa otyili Tyouhamba wa Huku, avakuatesuako “nonongi ononkhuavo.” (Miquéias 5:7; João 10:16) Onondaka onongwa tuivisa mbatunda ku Jeova iya mambuetela omuenyo wahapu vana vena ohunga yotyili. Okuti otyili otyo utyihole?
Eyombo otyipuka otyiwa Jeova etuavela. (Deuteronômio 33:13) Ovilinga vietu viokuivisa vipondola okukala otyipuka otyiwa ine otyiawa otyiwa kuvana vetavela otyili. Okulilongesa Ombimbiliya tyakala otyipuka otyiwa ku Gavin mokonda tyemukuatesako okuvasa omakumbululo omapulo ae aeho. Alingi liwa-liwa omapiluluko, ambatisalwa iya pahe uhole ovilinga viokuivisa otyili Tyouhamba wa Huku kumwe nomukai wae Joyce.
Onombangi mba Jeova vekahi nokuyandyanesa mouye auho otyili Tyouhamba
HUMBA OVILINGA VIOKUIVISA
Okueleka ovilinga viokuivisa neyombo, tyitukuatesako okunoñgonoka okuti ononkhono kese muivisi alinga mbesukisa unene. Ñgeni ngotyo? Eta like lieyombo kalikuatesako, mahi tyina eyombo liamalingi enyingi lieta otyimbwi ine otyituto. Tyelifwa notyo, otyilinga kese umwe ponthue alinga movilinga viokuivisa tyipondola okumoneka ngoti katyihi. Mahi putyina uundapela kumwe novaumbili ovanyingi va Jeova tyikuatesako okuava oumbangi “movilongo aviho.” (Mateus 24:14) Okuti ovilinga ovio mavikala otyipuka otyiwa tyatunda ku Jeova pala vakuetu? Yoo. Ondaka ya Huku tupopila ovanthu, ikahi ngeyombo mokonda italaleka, ineñgenesa tupu yeeta omuenyo!