Jeova Wayamba Unene Etokolo Liange

AME natyitwa mo 1934. Etyi natyitwa, vo tate, Fred na Edna Molohan, ankho Ovalilongesi Vombimbiliya (Onombangi mba Jeova) momanima 20. Ndyivepandula unene mokonda vandongesile okukala nohole na Jeova. Onthue ankho tukala mepunda-umbo etutu lyo Parsons mo Kansas. Ovakuatate ovanyingi mewaneno lietu ankho ovalembulwa. Ombunga yetu ankho yenda apeho komaliongiyo nomovilinga viokuivisa. Mo Tyasapalo komakumbi, ankho tuivisa momatapalo, hono tyiihanwa okuti okuivisa mounyingi. Pamwe ankho tuponwa unene, mahi tyina tuamapetuka tate ankho utulandela ono gelado.

Ewaneno lietu ankho etutu, mahi ankho tuna okuivisa momapunda-umbo omanyingi. Tyina ankho tuavela omikanda ovanthu vokulima omapia, ankho kavetuavela onombongo, mahi ankho vetuavela onombi, nomayiyi iya alo umwe novifufwa. Mokonda tate ankho waava onombongo opo akuateseko ovilinga viokuivisa, ovipuka ovio ankho tuvilia-po.

OVIKAMBANYA VIOKUIVISA

Vo tate ankho vena ofonografu vaundapesa movilinga viokuivisa. Ame ankho ndyimona opo ndyiundapese ofonografu, mahi ankho ndyihole unene okukuatesako vo tate okuhikisa omalongomona Omukuatate Rutherford tyina tukatalelapo ovanthu na tyina tukalongesa ovalongwa mbo Mbimbiliya.

Tate wapakele ekanutu enene kombanda yetuku-tuku lietu, opo likale liokuhikisa. Ankho litukuatesako unene movilinga viokuivisa. Tete, ankho tuhikisa oviimbo opo ovanthu vetutehelele iya konyima atuhikisa elongomona. Tupu ankho tuaavela omikanda ovanthu vokuesuka.

Mepunda-umbo lyo Cherryvale, mo Kansas, tate apake etuku-tuku motyipembe ankho muna ovanthu vekahi nokuomba-po mo Tyalumingu. Konyima opulisa aimupopila opo ahondovole katutu etuku-tuku. Tate elipake metapalo ekuavo ankho likahi popepi opo ovanthu vatualeko nokutehelela elongomona. Ankho tyinthyambukiswa unene okukala no vo tate, nomukulu wange Jerry movilinga ovio.

Momanima oo, tualingile ovikambanya movilongo omu ovanthu ankho vetuyele. Ngetyi napopia-le ponthyimbi, ankho tupinduka-po mokati kovinthiki opo tupake onotratadu nomikanda omikuavo pombundi yonondyuo. Konyima atuho ankho tuna okutunda mepunda-umbo tukelivase novikundyu ovikuavo opo tutale inkha pena omukuatate umwe wakuatua nopulisa.

Otyipuka otyikuavo ankho ndyipanda unene movilinga viokuivisa, okueenda momatapalo nomakalatau. Ankho tupaka omakalatau monthulo iya atuende momatapalo epunda-umbo. Ame ndyihinangela onthiki imwe ovakuatate veile mepunda-umbo lietu iya ankho vapaka monthulo ovikalatau viahonekwa okuti: “Ongeleya Iyondya tupu Ipunda.” Avahimbikila meumbo lietu okuenda no mepunda-umbo iya konyima avakondoka. Nawike wevetalamekele, mahi ovanyingi avahimbika okulipula oityi ankho tyikahi nokuenda-po.

OVIONGE PUETYI ANKHO NDYIMUKUENDYE

Ombunga yetu apeho ankho yenda kovionge ko Texas. Mokonda tate ankho uundapa monomboyo, tyina ankho tuenda kovionge, nokukatalela-po ombunga yetu, ankho katufete. Omukulu wa me ankho utiwa Fred Wismar nomukai wae Eulalie, ankho vakala mo Texas. Titiyu yange Fred wanoñgonoka otyili mo 1900 etyi ankho omukuendye, ambatisalwa, alongesa otyili ava elikuai navo, okukutikinyamo me. Ovakuatate mo Texas ankho vei nawa titiyu yange Fred mokonda ankho o servo zonal, (hono wiihanwa okuti omutalelipo womawaneno). Ankho ulinga nawa ovanthu, una ehambu, nombili iya ankho ongeleka ongwa ku ame.

Mo 1941, atuende nomboyo kotyonge otyinene mo St. Louis, Missouri. Ovakuendye aveho avakongwa vapumphame kovipundi vyo komutwe opo vatehelele elongomona lyo Mukuatate Rutherford lina osapi yati: “Ovana Vouhamba.” Konthyulilo yelongomona, ovakuendye aveho vena 15.000, avahuvu unene. Omukuatate Rutherford novakuatesiko vae avaavela kese umwe puonthue omukanda una osapi yati Ovana.

Mu Abril yo 1943, atuende Kotyonge tyina osapi yati “Chamada à Ação” mo Coffeyville, Kansas. Motyonge omo, amulingwa eiviso liokuti matukala nosikola omphe, itiwa Osikola Yovilinga vya Huku. Tupu tuapelwe omukanda una omalongeso 52 ankho maundapeswa mosikola oyo. Etyi palamba enima like, andyilingi onthele yange yo tete. Otyonge otyo, ankho tyakolela unene kuame na vakuetu, mokonda omo tuambatisalwa, momaande amwe ankho atenda unene.

ANKHO NAHANDA OKUKAUNDAPA MO MBETELE

Namana okulongeswa mosikola mo 1951 iya konyima andyisoko oityi ankho mandyilingi momuenyo wange. Omukulu wange Jerry waundapele mo Mbetele. Tupu naame ankho nahanda okukaundapa mo Mbetele, ngotyo andyihoneka omukanda. Liwa-liwa, andyiihanwa ko Mbetele iya andyihimbika okuundapa monthiki 10 ya Março yo 1952. Etokolo olio liankhuatesako okuundapela Huku nomutima wange auho.

Ankho ndyisoka okuti mandyiundapa nomakina yokulinga omikanda, opo ndyikuateseko okulinga omitala viomulavi nomikanda omikuavo. Mahi nalumwe naundapeleko. Otyilinga tyange ankho okupaka okulia komesa iya konyima andyikaundapa motyitelekwa. Otyilinga otyo, ankho ndyityihole unene iya nelilongesa ovipuka ovinyingi. Ankho tulipinga-pinga iya otyo ankho tyinkhuatesako okupululukwa-po. Apeho ankho ndyenda mondyuo yomikanda iya andyiundapesa omikanda ominyingi opo ndyilinge elilongeso liange lioulike. Okulinga ngotyo tyankhuatesako okupameka ekolelo liange, noupanga wange na Jeova. Andyitokola okutualako okuundapela Jeova mo Mbetele. Omukulu wange Jerry atundu mo Mbetele mo 1949 iya anepe Patricia, mahi mokonda ankho vakala popepi no Brooklyn, ankho vankhuatesako iya vamphameka puetyi ankho ndyimupe mo Mbetele.

Etyi nehika mo Mbetele, ovakuatate vahongolela ovilinga, avahimbika okuholovona ovakuatate ankho vapondola okutumwa no Mbetele opo vakalinge omalongomona. Ovakuatate vaholovonwa, ankho vena okukatalelapo omawaneno akala kokule, amwe ankho akala onokilometulu mbulamba po 320 okutunda mo Brooklyn. Tyina vehika mewaneno, ankho valinga elongomona, nokuundapa novakuatate movilinga viokuivisa. Naame naholovonenwe. Andyihimbika okutalelapo omawaneno nokulinga omalongomona. Iya pomuvo opo, omalongomona ankho alingwa oola. Ankho ndyenda nomboyo okukatalelapo omawaneno. Ndyihinangela nawa etyi tyamonekele mo 1954, ankho o Tyalumingu komutenya pomuvo woutalala. Ankho ndyikahi nokuenda nomboyo okukondoka ko Nova York iya ankho opala ndyihike mo Mbetele kounthiki. Mahi etyi ankho ndyikahi nokukondoka, apamoneka otyipepe tyimwe otyinene. Omutole womboyo autalama iya andyihiki vala mo Nova York Tyasikunda 5:00. Etyi nehika, andyinyingila vali momboyo onkhuavo opo ndyende ko Mbetele. Andyiviuku vala motyitelekwa. Ankho naseta katutu tupu ankho naponwa unene mokonda halalele otyinthiki atyiho. Mahi ankho nahambukwa unene mokonda yokuakuatesako ewaneno, nokunoñgonoka ovakuatate ovanyingi.

Menima lyo tete nahimbika okuundapa mo Mbetele, tupu nahimbika okulinga ononthele mbelilongeso lyo Mbimbiliya ankho lilingwa onosimanu ambuho molaliu yetu ankho itiwa WBBR. Ondyuo yokungalavala ankho ikala mosapalalo itiwa 124 Columbia Heights. Omukuatate Alexander H. Macmillan, waundapele mo Mbetele omanima omanyingi, apeho ankho ulinga ononthele melilongeso olio. Ankho tumuihana okuti Mukuatate Mac. Oe, ankho ongeleka ongwa ku onthue vakuendye ovape mo Mbetele mokonda wakoleleyile movitateka ovinyingi.

Mo 1958, otyilinga tyange atyipululuka, ankho pahe ndyiundapa na vana valongeswa Mosikola yo Gileade. Ankho ndyina otyilinga tyokupopia novatumini opo vayekwe okunyingila movilongo vatumwa, nokukafeta opasasi yavo. Mokonda ankho ono aviau mbufetelwa onombongo ononyingi, vana ankho vatumwa mo Afrika nomo Asia ankho venda nono mbapolo mbokutyinda ovityuma. Konyima, ono aviau ankho kambufetelwa vali unene, ngotyo onomisionaliu ankho pahe venda nono aviau movilongo vatumwa.

OKULINGA OUNGENDI OKUENDA KOVIONGE

Mo 1960, ankho ndyina okutaindya opasasi opo tutunde ko Estados Unidos nono aviau okuenda kovionge ovinene ankho mavilingilwa ko Europa mo 1961. Ame naile kotyonge tyalingililwe mepunda-umbo lyo Hamburg ko Alemanha. Konyima yotyonge, ame novakuatate vetatu, navo ankho vaundapa mo Mbetele, atulukala etuku-tuku, atuende ko Italia iya atukatalelapo o Mbetele mo Roma. Konyima, atuende ko França, atulambela konomphunda Pireneus opo tuhike ko Espanha. Pomuvo opo, ko Espanha ovilinga vietu ankho viailikwa. Atuavela omikanda vimwe ovakuatate ko Barcelona, iya ankho tueviwinga nawa opo vimoneke ngatyina oviawa. Okuelivasa novakuatate ovo tyetuhambukisilwe unene! Etyi tuatunda ko Espanha, atuende ko Amsterdã iya atukondoka ko Nova York no aviau.

Mo 1962, andyipewa otyilinga tyokufuika ovipuka pala ovakuatate nonomphange vena 583 ankho maveya movionge ovinene mavilingilwa movilongo ovinyingi. Otyonge otyo, tyalingwa mo 1963 iya ankho tyina osapi yati “Boas Novas Eternas.” Ovakuatate ovo, ankho mavaende movionge mavilingilwa ko Europa noko Asia noko Pacífico Sul iya konyima ankho mavaende kepunda-umbo lyo Honolulu ko Havaí noko Pasadena ko Califórnia. Tupu, ankho mavaende ko Líbano noko Jordau opo vakatalelepo ovilongo viapopiwa mo Mbimbiliya. Oseketa yetu ankho ina okutaindya ono pasasi, nono qualutu monondyuo mbokuhikila ovaenda iya nokupopia novatumini opo ovakuatate vayekwe okunyingila movilongo ovio.

PAHE ANKHO NDYINA MUNDYILA

Enima lyo 1963, ankho liakolela unene ku ame monkhalelo onkhuavo. Monthiki 29 ya Junho, andyinepe Lila Rogers woko Missouri, ankho uundapa mo Mbetele tunde mo 1960. Konyima yotyinepo tyetu, ame na Lila, atuliwaneka novakuatate ankho vekahi nokutalelapo ovilongo ovinyingi, iya atuende ko Gresia, noko Egitu noko Líbano. Tupu atuende no aviau ko Jordau. Mahi ovilinga vietu motyilongo otyo ankho viailikwa iya ovatumini ankho kavetavela Onombangi mba Jeova vanyingile motyilongo tyavo. Ngotyo, ankho katutyii oñgeni ovipuka maviende tyina tuamehiki. Pahe soka vala oñgeni tuakala etyi tuamona ovakuatate nonomphange ankho vekahi nokutukevelela motyipale tyo no aviau notyikalatau tyahonekwa okuti: “Liepeiko Nombangi mba Jeova”! Tuahambukilwe unene okutalelapo ovilongo viapopiwa mo Mbimbiliya, nokutala onomphangu omu ankho mukala Abraiau na Isake na Jako, no nomphangu Jesus no apostolu vaivisile iya naapa Ovakristau vahimbikila opo veliyandyane ‘movilongo vyo kokule.’ — Atos 13:47.

Mokueenda kuomanima 55, Lila wankhuatesako noukuatyili movilinga aviho nakala navio. Tuaile ovikando ovinyingi ko Espanha noko Portugal etyi ovilinga vietu kovilongo oko viailikwa. Ankho tupameka ovakuatate no nomphange, tupu ankho tuvetuaila omikanda novipuka ovikuavo vesukisa. Alo umwe ankho tukatalelapo ovakuatate vamwe ankho veli mokaleya ko Cádiz mo Espanha. Okuvelingilako elongomona ankho tyinthyambukiswa unene.

Mo 1963, andyifuika ovipuka vyo vionge ovinene ankho mavilingilwa mo Africa noko Australia noko America Central noko America do Sul noko Europa noko Extremo Oriente noko Havaí noko Nova Zelândia noko Porto Rico. Ovionge vimwe tuakalele na Lila, nalumwe matuvilimbwa, ngetyi otyonge tyalingwa mo 1989 mo Warsaw, Polonia. Ovakuatate ovanyingi voko Russia navo veile motyonge otyo. Otyo ankho otyikando tyo tete veya motyonge! Tuanoñgonoka ovakuatate nonomphange vakalele omanima omanyingi mokaleya mokonda yekolelo liavo mo Uniau Sovietika.

Otyilinga otyikuavo ankho ndyihole unene, okukatalelapo nokupameka onombunga mbo Mbetele, no nomisionaliu mouye auho. Otyikando tyahulililako tuatalelapo ovakuatate, tuaile ko Coreia do Sul iya atulivasi novakuatate vena 50 ankho veli mokaleya mo Suwon. Ankho kavasoyele iya ankho vakevelela okuti nthiki imwe mavaumbila vali Jeova neyovo. Okunoñgonoka ovakuatate ovo, tyetupamekele unene! — Romanos 1:11, 12.

OKUTALA ONKHALELO OVANTHU VEKAHI NOKULIYAWISA TYIHAMBUKISWA

Mokueenda kuomanima, natala oñgeni Jeova ekahi nokuyamba ovanthu vae. Etyi nambatisalwa mo 1943, ankho kuna vala ovaivisi 100.000 mouye auho. Pahe, ovanthu valamba ponomiliau etyinana vekahi nokuumbila Jeova movilongo 240. Ovilinga vyo nomisionaliu valongeswa mo Gileade, viakuatesako unene opo ovanthu veliyawise. Okuundapa no nomisionaliu ononyingi iya nokuvekuatesako okuenda movilongo vatumwa, tyinthyambukiswa unene.

Tupu, nahambukwa unene mokonda etyi ankho ndyimukuendye, natokolele okuundapesa omuenyo wange movilinga vya Jeova iya andyihoneka omukanda wokuundapa mo Mbetele. Jeova wandyamba unene mokueenda kuomanima oo aeho. Mahi tyihekuundapa vala mo Mbetele, ame na Lila tuhambukwa unene mokonda yokuundapa movilinga viokuivisa nomawaneno omanyingi mo Brooklyn mokueenda kuomanima alamba po 50 iya tuakala nomapanga omanyingi.

Nekuateso lya Lila, ndyitualako okuundapa mo Mbetele kese nthiki. Namphila pahe ndyina omanima alamba po 84, ndyina ehambu liokutualako okuundapa iya nokukuatesako okuonganeka omikanda ovanthu vatuma mo Mbetele.

Tyihambukiswa unene okulinga onthele yeongano lya Jeova, nokutala oñgeni Malaquias 3:18 ikahi nokufuiswapo, yati: “Onwe mamumono vali okuelikalela kukahi pokati komuviuki nondingavivi, no pokati ka una uumbila Huku na una uhemuumbila.” Ononthiki ambuho, tumona okuti ouye wa Satanasi ukahi nokuvilapo, ovanthu vetupu ekevelelo iya ovanyingi vetupu ehambu. Mahi vana vehole Jeova iya vemuumbila, vena ehambu, namphila tukahi momuvo wepuiya iya tukevelela ovipuka oviwa komutwe wandyila. Elao limwe enene okupopila vakuetu onondaka onongwa! (Mateus 24:14) Apa katutu, Ouhamba wa Huku maweta ouye omupe. Onthue tuhanda unene onthiki oyo ihikepo! Tyina yamehikipo, ovanthu aveho mavakakala nekongoko ewa, nehambu iya matukakalako apeho.