Okuti Okunwa Tyapenga? Oityi Ombimbiliya Ipopia?
Ekumbululo Lyo Mbimbiliya
Okunwa okupola pokati katyapengele. Ombimbiliya ipopia okuti ovinyu tueipewa na Huku, okunwa tyipondola okutuhambukiswa. (Salmo 104:14, 15; Eclesiastes 3:13; 9:7) Tupu Ombimbiliya ilekesa okuti ovinyu ikalesa nawa ekongoko. — 1 Timotiu 5:23.
Etyi Sesusi ali pano pohi, nae wanwine ovinyu. (Mateusi 26:29; Luka 7:34) Aloo umwe nthiki imwe motyipito tyotyinepo, Sesusi watyitulile omaande, akala ovinyu. Ehuviso olio na hono liiwe unene. — Suau 2:1-10.
Ovitateka Vipondola Okutuka Kokunwa Unene
Namphila Ombimbiliya kaiilika okunwa, mahi iilika okunwa unene, ounkholwa. Ankho omunthu wa Huku utokola okunwa, una okupola pokati. (1 Timotiu 3:8; Titu 2:2, 3) Mombimbiliya muna omahunga omanyingi, alekesa omokonda yatyi tuesukisila okulityilika okunwa unene. Tala amwe:
Okunwa unene tyinyona ounongo wokusoka, nokupunga ovipuka. (Provérbios 23:29-35) Omunthu wakolwa ketyivili okuendela motyitumino tya Huku tyokuati “avei omalutu enyi ngotyilikutila tyina omuenyo, tyasukuka, tyitavelwa na Huku, ngotyo mamuumbila Huku nonondunge mbenyi ambuho.” — Ova Loma 12:1.
Okunwa unene tyimupola omunthu ohonyi iya ngotyo “kametyivili okulinga ovipuka viaviuka.” — Oséias 4:11; Ova Efesu 5:18.
Okunwa unene tyipondola okutuala koluhepo, nokunyona ekongoko. — Provérbios 23:21, 31, 32.
Okunwa unene, nokukolwa katyihambukiswa Huku. — Provérbios 23:20; Ova Galata 5:19-21.
Oityi tyitiwa okunwa unene, okunwa olambesa?
Omunthu utiwa walambesa wanwa unene, tyina amanu ulinga etyi tyapenga ine okulinga etyi tyinyona vakuavo. Okunwa unene, hakuti oputyina vala omunthu amanu atoko. Ombimbiliya ipopia oityi tyitiwa okunwa unene. Mongeleka, ankho omunthu wanua ahasoko vali nawa, uhanda okutañguna ine okuyaya, tupu ketyivili okupopia nawa ine utanthauka opo ngotyo walambesa. (Jó 12:25; Salmo 107:27; Provérbios 23:29, 30, 33) Aloo umwe ankho omunthu wapama, unwa ahatoko, “okunwa unene” tyipondola okumuetela ovitateka. — Luka 21:34, 35.
Onalupi Tyesukisa Okulityilika Okunwa
Ombimbiliya ilekesa okuti pamwe otyiwa okulityilika okunwa. Lityilika okunwa:
Tyina tyinyona omalusoke a vakuenyi. — Ova Loma 14:21.
Tyina ovatumini vailika okunwa. — Ova Loma 13:1.
Tyina omunthu ena ovipepe viokunwa unene. Omunthu ankho wali onkholwa ankho unwa unene wesukisa okuliyunga unene. — Mateusi 5:29, 30.