OVAKWENDYE VAPULA
Ine Epanga Liange Wandumanesa Oityi Mandyilingi?
Oityi usukisa okunoñgonoka
Petupu oupanga wehena ovitateka. Tyina nkhele tuvakwankhali, epanga lietu — okuti umwe nepanga lietu enene — upondola okupopia, nokulinga otyipuka tyitunumanesa. Mahi tyili nove umukwankhali. Ine ulitala umwe nawa, okuti petupu onthiki walingile otyipuka tyanumanesa mukwenyi? — Tiaku 3:2.
Etyi umona mo internete tyipondola okukunumanesa. Tala vala etyi tyapopia omukwendye umwe utiwa o David wati: “Ñgeno uli mo internete, ukati-ko ñgaa onofoto mbepanga liove ankho uli pokapito, pahe ohimbika okulipula omokonda yatyi ehekukongelele. Upondola umwe onumana.”
Ove upondola okulilongesa okwahasoko ngootyo.
Oityi una okulinga
Litala nawa. Ombimbiliya yati: “Wahanumane vala liwa. Mokonda, okunuma mwene o tyomalai.” — Omupopi 7:9, okatoi.
“Pamwe ukati-ko ñgana, etyi ankho wanumanena naina ankho katyinumanesale.” — Alyssa.
Nkhele soka: Okuti ove unumana vala liwa? Oityi usoka, ha hahe ulikwatesile wahakale omunthu wokunumana vala liwa? — Omupopi 7:21, 22.
Soka kweevi vituka kokwevela. Ombimbiliya yati: “Tyihiwa. . . ngalewa-ñgo, ngwe ehesuku.” — Omihe 19:11.
“Nankho ove wapengehiwa umwe, hahe vala okweevela. Tyina wamalingi ngootyo, kumakalela vala okuhinangelesa ou wekunumanesa, tupu kumemulingisisa apeho okulivela onombei mokonda yeetyi alinga. Ankho wemweevela, waevelwa umwe.” — Mallory
Nkhele soka: Etyi ñgaa tyalingwa otyinene umwe? Okuti ha hahe vala ndyeete ombembwa? — Ova Kolosu 3:13.
Okuyeka omphepo yatenda enyingile mondywo mwatokota
Lipaka pomphangu ya mukwenyi. Ombimbiliya yati: “Mwahatalei vala kweetyi onwe mwene musuka natyo, amutale no kweetyi vakwenyi vesuka-vo natyo.” — Ova Filipu 2:4.
“Tyina poupanga pena onthyole, nonthilo, opo ove uhanda umwe ñgeno ovitateka vitetululwa vala liwa. Naina opo ove molikwatehila, opo upanga wenyi wahankhie-po.” — Nicole.
Nkhele soka: Okuti ove upondola okutala mukwenyi ngatyina omunene vali? — Ova Filipu 2:3
Tyesukisa otyetyi: Okutyivila okututumba neevi pehepano vikunumanesa, otyipuka tyimwe otyiwa matyikukwatesako komutwe. Naina, ha hahe ulilongese-tyo pehepano?