OVAKWENDYE VAPULA
Oityi Una Okulinga Ukoleleye Tyina Ulolwa?
Omutumwa Paulu wahoneka okuti: “Tyina nahanda okulinga etyi tyaviuka, mwaame muna etyi tyapenga.” (Ova Loma 7:21) Okuti noove welitehelele-ale ngootyo? Ine welitehelele-ale ngootyo, onthele ei ipondola okukukwatesako utyivile okulwisa omalusoke omavi.
Etyi ove wesukisa okunoñgonoka
Etyi ava mulongeswa navo vekuhongiliya okulinga otyo tyipondola okukuyondya. Ombimbiliya yati: “Omapanga omavi anyona ovituwa oviwa.” (1 Ova Kolindu 15:33, okatoi) Ovipuka utala mo internete neevi vakwenyi mulongeswa navo vekuhongiliya okulinga, vipondola okukutwala ‘kokulandula vala movanyingi olingi otyivi.’ — Okutunda 23:2.
“Mokonda yokuhanda okuhumbwa na vakwenyi, upondola vala okulinga atyiho valinga opo vekuhumbe.” — Tyapopiwa na Jeremy.
Soka kweetyi: Omokonda yatyi tyipondola okukupwiya okwaanya okuholingiliywa, tyina usuka vala unene neetyi ovanthu mavekusokela-mo? — Omihe 29:25.
Etyi twahanda okupopia otyetyi: Wahayeke ava mulongeswa navo vekuhongiliye okulinga etyi tyapenga.
Etyi ove una okulinga
Noñgonoka nawa etyi utavela. Ankho ove kwii etyi utavela, molingi vala omunthu wokulinga vala etyi vakwenyi valinga. Hahe wetavelele etyi Ombimbiliya yapopia okuti: “Sukei umwe novipuka aviho; kakatelei motyiwa.” (1 Ova Tesalonika 5:21) Tyina ove wii nawa etyi utavela, otyo umwe vala molingi, kamatyikupwiya okwanya tyina uhongilinywa okulinga etyi tyapenga.
Soka kweetyi: Omokonda yatyi ove utavelela okuti okutavela ku Huku opala ouwa wove?
“Ovanthu vandinga vali onthilo tyina vatala okuti ndyilinga vala etyi ndyitavela, hitavela okuhongiliywa.” — Tyapopiwa na Kimberly.
Umwe wapopiwa m’Ombimbiliya: Ndaniyele. Tyipondola pweetyi hamwe nkhele ankho omukwendye vala, Ndaniyele “komutima wae apakeko umwe” tyokutavela ovitumino vya Huku. — Ndaniyele 1:8.
Ankho ove kwii etyi utavela, molingi vala omunthu wokulinga vala etyi vakwenyi valinga
Noñgonoka apa wayengenga. Ombimbiliya ipopia “omalusoko ouna” — omalusoke ana haunene ovakwendye vakala vali nao. (2 Timotiu 2:22) Omalusoke oo, haokusoka vala kokulinga ovinepo viasila, mahi tupu oo kuhanda okuhumbwa novanthu, nokuhanda ñgeno ovohe kavelipake vali povipuka valinga ngwe nkhele ovana vala.
Soka kweetyi: Ombimbiliya yati: “Tyilola omunthu otyetyi mwene ahanda tyimukengelela, ngatyo tyimutyinda.” (Tiaku 1:14) Omalusoke patyi unao apondola okukutwala kokulinga otyipuka tyapenga?
“Noñgonoka umwe nawa okutyi ove wayengenga tyipondola okukutwala kokulinga etyi tyapenga. Ovola etyi tyipondola okukukwatesako otyihoneka umwe. Ine otyo ulinga otyo, tyina tyameya-po monoñgonoka etyi una okulinga wahatokele motyivi.” — Tyapopiwa na Sylvia.
Umwe wapopiwa m’Ombimbiliya: Ndaviti. Pena omuvo umwe Ndaviti etavelele okuyondywa nomalusoke ae nokuhongilinywa na vakwavo. Mahi Ndaviti welilongesilile koviponyo vae, elikwatehila eheviwane vali. Welikwambelele ku Siovaa ati: “Nkhwateseko-vo ndyikale nomutima wasukuka, paka-vo mokati kange omutima omupe, omutima wotyili.” — Oviimbo 51:10.
Liyunga umwe. Ombimbiliya yati: “Otyivi tyehemuvile.” (Ova Loma 12:21) Otyo hakuti ngatyeya, ove moti tyeya tyeya-le ndyilinge vala. Ove umwe mokoyo etyi una okulinga.
Soka kweetyi: Oityi ove wesukisa okulinga opo utyivile okwaanya tyina wamahonginywa okulinga etyi tyapenga?
“Ame ndyihole okusoka oñgeni haa mandyikala tyina namalingi etyi tyapenga. Okuti mandyilitehelela nawa? Hamwe, mahi omokamuvo kehehi vala. Okuti tyina pahe pamakala ehimbwe mandyilitehelela nawa? Au, mandyilitehelela omapita. Okuti pena umwe oviwa mandyipolo-po? Au, petupu-ale!” — Tyapopiwa na Sophia.
Umwe wapopiwa m’Ombimbiliya: Paulu. Ngwe wapopile okuti usoka okulinga etyi tyapenga, mahi ankho keliyekela vala omalusoke oo. Otyo ahonekela okuti: “Ndyiveta olutu lwange, andyilutumina ngomupika.” — 1 Ova Kolindu 9:27, okatoi.
Etyi twahanda okupopia otyetyi: Ove umwe utyii etyi molingi. Mwene ove umwe mokoyo ine molingi etyi tyapenga ine motyaanye.
Hinangela okuti, ovipuka vikupwiya hono haapeho mavikupwiya vala. Melissa una omanima 20 wati: “Etyi ankho nkhele ndyitanga, pena ovipuka ovinyingi ankho ndyisoka okuti vipwiya unene okwaanya okuvilinga, mahi pehepano pahe hatyoko vali ndyisoka. Okusoka kotyipuka otyo, tyinthyinangelesa okuti ovipuka ndyikahi nokulolwa navio pehepano mavilambe, ya komutwe wandyila mandyiti nalingile nakoleleyile.”