1. Okuti Huku Oe Uvelwa Onombei Mokonda Yononkhumbi Tukahi Nokumona?

Omokonda yatyi okunoñgonoka ekumbululo otyiwa?

Ovanthu ovanyingi kavetavela Huku mokonda vasoka okuti oe uvelwa onombei mokonda yononkhumbi mbetu.

Soka kuetyi:

Pamwe, ononkhalamutwe mbonongeleya mbulongesa okuti Huku oe weetako ononkhumbi. Mongeleka, vamwe vapopia okuti:

• Huku oe weetako ovinimawe opo etumonese ononkhumbi.

• Ovana vankhia mokonda Huku wesuka vali no noandyu ononkhuavo keulu.

• Tyina movilongo vimwe muna ovilwa, Huku uyamba otyilongo tyimwe, opo ovanthu votyilongo otyikuavo vamone onkhumbi.

Mahi tyitavela ononkhalamutwe mbonongeleya vapopie omatutu ngoo konthele ya Huku? Okuti tupondola okuyumba onthumbi muetyi ovanthu ovo vapopia?

Oityi Ombimbiliya Ipopia?

Huku haeko utuetela ononkhumbi.

Mokonda yovituwa viae oviwa viapopiwa mo Mbimbiliya Huku kapondola okutuetela ononkhumbi. Mongeleka:

“Onondyila mbae [Huku] ambuho mbaviuka. . . . Oe omuviuki, tupu omukuatyili.” — DEUTERONÔMIO 32:4.

“Huku yotyotyili nalumwe malingi etyi tyahaviukile, Wepondolo Aliho nalumwe malingi etyi tyapenga!”— JÓ 34:10.

“Wepondolo Aliho nalumwe malingi etyi tyihaviukile.”— JÓ 34:12.

Huku ketavela onongeleya mbulongesa omatutu konthele yae.

Otyo tyakutikinya onongeleya mbuna mbulongesa okuti Huku oe utumonesa ononkhumbi, na mbuna mbulipaka moungangala.

“Ovauli vekahi nokupopia ounkhembi menyina liange. Ame hevetumine otyitumino natyike ine okupopia navo. Vekahi nokumupopila omamonekelo . . . nomaulo ounkhembi, novipuka viahasilivila.”— JEREMIAS 14:14.

Sesusi waholololele ovipuka ovivi ononkhalamutwe mbonongeleya ankho valinga.

“Haaveho vati ‘Tatekulu, Tatekulu’ mavakanyingila Mouhamba wo keulu, mahi mamukanyingila vala vana valinga etyi Tate yange keulu ahanda. Ovanyingi mavakati: ‘Tatekulu, Tatekulu, katuaulile menyina liove, katuataatele ovilulu menyina liove, katualingile ovilinga ovinene menyina liove?’ Iya ame mandyikevepopila okuti: ‘Ame himwii! Tundei ponthele yange, onwe vokulinga ovivi!’” — MATEUSI 7:21-23.