2. Okuti Onthue Tuvelwa Onombei Mokonda Yononkhumbi Tukahi Nokumona?
Omokonda yatyi otyiwa okuovola ekumbululo?
Inkha onthue tuvelwa onombei mokonda yovipuka ovivi vimoneka momuenyo wetu, opo ñgeno tutyivila okulinga otyipuka tyimwe opo tutepulule ononkhumbi mbetu.
Soka kuetyi:
Okuti ovanthu ovo vavelwa onombei mokonda yovipuka ovivi vikahi nokumoneka? Tala onongeleka mbumwe.
Okulingwa onya.
Eongano limwe litiwa Organinazação Mundial da Saúde (OMS) liapopia okuti povanthu vekuana, wike walingwa onya etyi ankho omona, iya povakai vetatu, wike walalwa nae kononkhono ine okuvetwa.
Ononkhia.
Ngetyi tyapopia eongano litiwa Organização Mundial da Saúde mo 2018, ovanthu 477.000 vaipawa mouye auho mo 2016. Tupu wapopia okuti menima olio, ovanthu 180.000, tyafwa vankhila movilwa.
Ovitateka Viekongoko.
Omukanda wahonekwa nomunongo umwe utiwa Fran Smith, wati: “Ovanthu valamba pomiliau vapuena, iya omakaya aeta ovitateka vitano vieta ononkhia: okuvela omutima, okuihama omutwe, ovitateka viokufima, omukolo omunene, no cancer.”
Okapungulula Komihoko.
Omunongo umwe utiwa Jay Watts wapopia okuti: “Oluhepo, nokambungulula komihoko, novalume okulala poyavo, nokuilauka, iya nokulinga okalolela komaanda, tyikahi nokuliyawisa unene iya otyo tyieta ononkhumbi.”
OPO UNOÑGONOKE VALI
Tala ovidiu yati Omokonda yatyi Huku atungila Ohi? mo jw.org.
Oityi Ombimbiliya ipopia?
Ovipuka ovivi vikahi nokumoneka mouye, vikahi nokueetwa novanthu.
Ovikando ovinyingi, otyo tyimoneka mokonda yovatumini valinga onya ovanthu, ankho ñgeno vakuatesuako navo.
“Omunthu utumina omunthu mukuavo pala okumumonesa ononkhumbi.” — ECLESIASTES 8:9.
Ononkhumbi mbupondola okutepuluka.
Onondongwa mbo Mbimbiliya mbutukuatesako okukala nekongoko ewa, nokulitekula nawa navakuetu.
“Omutima wahiliya omuenyo pala olutu, mahi ounkhuelume uvolesa omankhipa.”— PROVÉRBIOS 14:30.
“Yekei-po okukala nonkhongo mononkhalelo ambuho, nonyengo, nokunumana, nokuyaya, nonondaka mbuleva, novipuka aviho ovivi.” — OVA EFESU 4:31.