Oityi Vokuatanga Unene Vehevili Okutupopila?
Namphila vokuatanga unene velilongesa ovipuka ovinyingi, mahi no ngotyo pena ovipuka ovinyingi vehevili okuhangununa nawa-nawa.
Ouye novipuka vina omuenyo viatukapi? Vokuatanga unene otyipuka otyo kavetyii nawa. Ovanthu vamwe vehole okupopia okuti ava vokulilongesa etyi ouye ukahi, netyi ononthungululu mbukahi, ovo vetyivila okupopia apa patuka ouye. Mahi omukulu umwe watanga unene utiwa o Marcelo Gleiser wati: “Na hono nkhele apa patuka ouye katupei.”
Iya omuenyo watuka-pi? No otyo vokuatanga unene nii kavetyivili okutyipopia. Omukanda umwe wapopia okuti: “Katyitavela okunoñgonoka nawa-nawa oku kuatuka omuenyo. Omokonda yatyi? Omokonda otyipuka otyo ñgeno ankho tutyitalela kovipuka vimwe, ngetyi omankhipa ovinyama vialiko kohale, nomamanya. Mahi pahe tyalingisa, ovipuka ovio kouye kaviko vali.”
Mokutala hamwe uli nokulipula okuti: ‘Ine ouye watungwa, opo naina olie weutunga? Ine omunthu wokuatunga ovipuka vili mouye, tyatiwa ukahi nawa, omunongo, opo oityi tumonena ononkhumbi otyo etutala vala? Oityi ayekela mouye mukale onongeleya ononyingi, mahi ambuho mbulipatana vala? Omokonda yatyi vana vapopia okuti vemufenda, valingila ovipuka ovivi?’
Ovanthu vokuatanga unene kavetyivili okukumbulula omapulo oo. Okuti pahe ngotyo omapulo oo kaevilwa okukumbululwa. Au! Ovanthu ovanyingi, vetyimona okuti Ombimbiliya, oyo vala ikumbulula omapulo oo.
Ovanthu ovanyingi vokuatanga unene velilongesa Ombimbiliya, avetyimono umwe okuti kouye naina kuna Omutungi. Opo utale etyi vapopia, nyingila mo jw.org, otale onovindiu mbati: Etyi Ovanthu Vapopia Konthele Yoku Kwatuka Omuenyo.