OVIPUKA VIALIA OKALU— MOLINGI ÑGENI?

Hambukilwa Etyi Una-tyo

Ovanthu vokuti etyi vena-tyo avati tyatuuka vena ehambu. Tyina vamatale ovipuka vili nokulonda, vatepulula kweevi vehole okulanda, avalande vala evi viesukisa vali.

OMOKONDA YATYI TYESUKISILA

Omukai umwe watanga unene utiwa o Jessica Koehler nae wetyimona okuti ovanthu vana vokuhambukilwa etyi vena, vati umwe ovo vena ehambu, ovo tupu vahapeleya vya vakwavo. Tyili ovanthu ovo vati ovo vena ehambu, ovo vahatokota omutwe, ngwe pamwe vahepa umwe. Ovo yatyo vahambukilwa tupu evi vena, ngwe pamwe kavihi-ale, omokonda kuvo otyipuka tyesukisa vali okukala nehambu, nokukala nombunga, nokukala nomapanga avo, ovipuka viahalandwa.

“Naina, ine tuna okulia nomuvalo, matuhambukilwa ovipuka ovio.” — 1 Timotiu 6:8.

ETYI UPONDOLA OKULINGA

Wehelieleke na vakwenyi. Ine oupuka unao wehehi, uweeleka no vya vakwenyi vialanda onombongo ononyingi, oviwa vali, kumakala nehambu tupu movelu onkhi. Pamwe, etyi uli nokusoka hatyoko. Mokonda vamwe, ove uti vala vamona, naina opo valande ovipuka vena, velipaka vala monongele. Umwe utiwa o Nicole, ukala kotyilongo tyitiwa o Senegal wati: “Opo ndyikale nehambu hisukisa-le ovipuka ovinyingi. Tyindyavela ehambu, okuti evi ndyina-vio andyiti viatuuka, namphila vakwetu vena ovipuka ovinyingi.”

Hetekela etyi: Wahakalele vala okutala mo internete, ovipuka vilekesa ovanthu velimphanda mokonda yokwamona, novipuka vena.

“Omunthu ngalinga-linga umwe omuhona, omwenyo keupolo movipuka ena-vio.” — Luka 12:15.

Linga omunthu wokupandula. Ovanthu vokupandula etyi vena-tyo, kavasoko vala kokulanda ovipuka ovikwavo, okuti hatyo avati, ovo vala vatamo mokukala novipuka. Umwe utiwa o Roberton, ukala kotyilongo tyitiwa Haiti, wati: “Apeho ndyisoka umwe kovipuka vakwetu vandingila, neevi valingila vo meumbo. Apeho tyina vamandingila tyimwe, ndyivepandula unene. Tupu nalongesa omona wange womanima etyinana, okuti tyina wamapewa otyipuka uti, napandula.”

Hetekela etyi: Soka ovipuka una opandula. Ononthiki ambuho honeka etyi wahanda okupandula. Upondola okupandula, etyi una ekongoko likahi nawa, neetyi vo meumbo velikwata-po, omapanga omawa una, nokutala otyipuka ekumbi liehiwa pokunyingila, novikwavo vali.

“Womutima wahambukwa, apeho una otyipito.” — Omihe 15:15.

Atuho vala pamwe opo tuhambukilwe etyi tuna pakala umwe ovilinga. Mahi ine tulikwatehila umwe matutyivili! Mokonda tuhambukilwa evi tuna, matukala nehambu, ngwe ehambu otyipuka tyahalandwa nonombongo.