Okuti Tyitavela Okuhambukilwa Etyi Una?

“Omuhepi okuhambukilwa etyi ena, tyimukalesa omuhona. Omuhona uhahambukilwa etyi ena, tyimukalesa omuhepi.” —Benjamin Franklin.

NGETYI tyilekesa omuhe oo, ovanyingi vanoñgonoka okuti okuhambukilwa etyi una katyilandwa nonombongo. Katyihuvisa okutala okuti okuhambukilwa etyi tuna—ombembwa momutima—katyivasiwa mouye wovanthu valungala vala novipuka ovinyingi, nomalumono, nomuenyo omuwa vakuavo vena! Okuti ove una otyitateka tyimwe puovio?

• Ovalandesi vapopia okuti ehambu litundilila vala kokukala novipuka ovinyingi, nokulanda kese tyimwe uhanda.

• Okulilola konthele yomalumono kovilinga ine okosikola, tyikuhindila okusoka okuti mokala vala nawa inkha ulinga etyi tyilinga vakuenyi.

• Ovanthu kavapandula ovipuka uvelingila.

• Omapanga ove ekukalesa nonkhi yovipuka vena.

• Omapulo ove akolela konthele yomuenyo, kaenekumbululwe.

Novitateka ovio aviho, okuti upondola umwe okuhambukilwa etyi una? Apostolu Paulu wapopile oñgeni omunthu apondola okukala nehambu olio. Ovikando vimwe ankho ukala novipuka ovinyingi, ovikuavo ankho ukala vala no katutu. Omapanga ae amwe ankho emuhole, mahi ovakuavo ankho vemuyele. Mahi, oe wati, “welilonga okuhambukilwa etyi ena kese muvo.”—Onthue tueiyendameka; Filipenses 4:11, 12, New International Version.

Ehambu lietyi tuna kaliiwe na vana vahalingi ononkhono mbokulivasa. Mahi, Paulu wapopia okuti omunthu upondola okulilonga okukala nalio. Pahe tukukonga opo utale ovipuka vitano konthele yokuhambukilwa etyi una, vivasiwa Mondaka ya Huku, Ombimbiliya.