Vayauka Elunga Enkhuhu

TALA etyi tyikahi nokupita apa. Ou o Moisesi uyulika otyimuti tyae kombanda Yelunga Enkhuhu. Ava ekahi navo, ova Isilayeli vayovoka. Anthi, Farao nomafualali ae aeho vekahi nokuenda nomeva melunga. Tutalei oñgeni otyo tyaendele.

Tuelilongesale okuti konyima yehingano lia tyekwi, Huku aetele kova Egitu, Farao apopila ova Isilayeli vatunde mo Egitu. Avatundumo ovalume 600.000, kumue novakai ovanyingi, novana. Tupu ovanthu ovakuavo ovanyingi ankho vokuetavela ku Yehova, navo vatundilemo kumue nova Isilayeli. Aveho vatyindile onongi mbavo, novikombo no nongombe mbavo ambuho.

Puetyi nkhele vehenetundemo, ova Isilayeli vaitile kova Egitu, ovikutu novipuka vialingwa no olu, no palata. Mokonda yehingano liahulako, ova Egitu vakalele unene nouoma. Moluotyo, avaavela ova Isilayeli ovipuka aviho veveita.

Mononthiki mbehehi, ova Isilayeli vehika Pelunga Enkhuhu, iya avapululukuapo. Anthi, Farao novalume vae, vahimbika okulivela mokonda yetyi vayeka ova Isilayeli vaye. Iya avati: ‘Ovapika vetu tueveyeka vaye.’

Ngotyo, Farao wapiluluka vali. Apongiya liwa liwa omatemba ae ovita, no mafualali ae. Alandula ova Isilayeli, nomatemba 600 akolela unene, no matemba omakuavo omo Egitu.

Etyi ova Isilayeli vamona Farao nomafualali ae, ankho vevelandula avakala nouoma omunene. Ankho petupu ondyila pala okuenda nkholo. Mokonda nthele imue ankho kuna Elunga Enkhuhu. Iya konthele onkhuavo ova Egitu ankho vekahi nokuiya. Mahi, Yehova wapaka eundu pokati kovanthu vae nova Egitu. Moluotyo ova Egitu ankho kavapondola okulwisa ova Isilayeli, mokonda ankho kaveveete.

Yehova atumu Moisesi ayulike otyimuti tyae kombanda Yelunga Enkhuhu. Etyi etyilinga, Yehova aetako omphepo imue onene, omeva elunga aeliyapuka. Iya pokati apakala ondyila.

Ova Isilayeli avahimbika okutauluka elunga, okuenda meheke liakukuta. Papita onowola ononyingi, opo ovanthu aveho novipako viavo, vehike konthele onkhuavo yelunga. Konyima, ova Egitu vevemona. Ovapika vavo ankho vekahi nokuenda nkholo. Moluotyo, navo avelipake mondyila oyo mokati kelunga okuvelandula.

Etyi veliyumba mondyila oyo, omalola omatemba avo ahimbika okutundako. Ova Egitu avahimbika okukala nouoma omunene, aveliyavela okuti: ‘Yehova ukahi nokulwilako ova Isilayeli. Tutundeimo muno.’ Mahi, ankho lietaka unene pala okutundamo.

Yehova atolela Moisesi ayulike otyimuti tyae kombanda Yelunga Enkhuhu, ngetyi uluete polutalatu olu. Etyi Moisesi etyilinga, omeva ahimbika okuhonya vali kumue. Iya ova Egitu nomatemba avo avahitikilwa mokati komeva. Omafualali aeho ankho alandulile ova Isilayeli melunga ankhia. Nawike omu Egitu wahupile nomuenyo.

Ovanthu va Huku aveho avahambukwa unene, mokonda yokuayovolwa. Ovalume avahimbika okuimba otyiimbo tyokupandula Yehova okuti: ‘Yehova wafinda nenkhimano enene. Wayumba melunga ononkhambe navana vaendelako.’ Omphange ya Moisesi Miriã wapola okañgoma kae, iya ovakai aveho avemulandula nouñgoma wavo otyo vanyana. Ankho vanyana nehambu, tupu otyo vaimba otyiimbo ankho tyiimbwa novalume, okuti: ‘Yehova wafinda nenkhimano enene. Wayumba melunga ononkhambe navana vaendelako.’