Ohamba Ondingavivi Itumina mo Egitu

OVALUME ava polutalatu olu vekahi nokukuluminya ovanthu okuundapa. Tala omulume ou ukahi nokuveta omuundapi nosikote. Ovaundapi ava ombunga ya Jako, ankho vatiwa ova Isilayeli. Ovalume vevekuluminya okuundapa, ova Egitu. Ova Isilayeli ankho valinga ovapika mo Egitu. Oñgeni tyaenda?

Ombunga onene ya Jako yakalele nombembwa omanima omanyingi mo Egitu. Jose, omulume ankho wakolela unene mo Egitu, wevetekulile nawa. Mahi, konyima Jose ankhi. Iya Farao omukuavo, wapingile kouhamba mo Egitu, ankho uyele ova Isilayeli.

Ohamba oyo ondingavivi, ailingi ova Isilayeli ovapika. Aivepe ovalume vamue ovakalavi vehena okankhenda, pala okuvetumina. Ovalume ovo ankho vevekuluminya okuundapa unene, okutunga omapundaumbo pala Farao. Mahi, nongotyo ova Isilayeli vatuaileko okukala ovanyingi. Moluotyo, ova Egitu avakala nouoma wokuti ova Isilayeli mavakala ovanyingi, iya avapame unene.

Utyii oityi Farao alinga? Wapopila vana ankho vokukutulisa ovakai ova Isilayeli okuti: ‘Muna yokuipaa ovana aveho ovakuendye.’ Mahi, ovakai ovo ankho onondalawa, iya kavatavelele okuveipaa.

Moluotyo, Farao atumu ovanthu vae okuti: ‘Kaipaei ovana aveho ovakuendye vova Isilayeli. Ovakainthu veyekei nomuenyo.’ Otyipuka otyo atuma hatyiviko? Pahe tutalei oñgeni omona umue womukuendye ayovolelwe.