Ovalavi 12

TALA vala ovinyango viatyindwa novalume ava. Tala vala ono uva ombu ononene. Tyesukisa ovalume vevali okuvityinda kotyimuti. Tala omakuyu noma romã. Ovinyango evi oviwa viatundapi? Viatunda kotyilongo tyo Kanaa. Hinangela okuti ko Kanaa oko ankho kukala Abraiau, na Isake, na Jako. Anthi mokonda yondyala, Jako nombunga yae availukila ko Egitu. Papita 216 omanima, iya Moisesi pahe ukahi nokukondola ova Isilayeli ko Kanaa. Vehika pomphangu imue mehoko itiwa Kades.

Ovanthu ankho vakala motyilongo tyo Kanaa onondingavivi. Moluotyo, Moisesi watuma ovalavi 12, iya evetolela okuti: ‘Talei ovanthu patyi vakala motyilongo, nokutala ankho vapama. Talei inkha ohika ikahi nawa pala ovikuna. Tupu amuetelelako ovinyango vimue.’

Etyi ovalavi vakondoka ko Kades, vatolela Moisesi okuti: ‘Tyotyili otyilongo otyo otyiwa.’ Opo valekese okuti otyilongo tyili otyiwa, vemulekesa ovinyango vaeta. Anthi ovalavi 10 avati: ‘Ovanthu vokukalamo ovanene nokuapama. Matukaipawa inkha tuendako okukevepola otyilongo.’

Etyi Ovaisilayeli veiva onondaka ombo avakala nouoma. Avati: ‘Inkha tuankhilile vala mo Egitu ine omehoko lino, ñgeno hahe. Pahe, matukankhila movita, iya ovakai vetu novana vetu avakatyinduapo. Tukoyei onkhalamutue onkhuavo apinge pu Moisesi, opo tukondoke ko Egitu.’

Anthi ovalavi vevali ankho vayumba onthumbi mu Yehova, iya avaovola okuhiliyisa ovanthu. Omanyina avo o Josue na Kalebe. Ovo avati: ‘Muhakalei nouoma. Yehova ukahi nonthue. Matyipepuka okuvepola otyilongo.’ Anthi ovanthu kavetavelele. Avahande okuipaa Josue na Kalebe.

Otyo tyanumanesa unene Yehova, iya atolela Moisesi okuti: ‘Nawike omunthu okupolelela po vomanima 20 manyingila motyilongo tyo Kanaa. Mokonda vamona omahuviso nalinga mo Egitu no mehoko, anthi nongotyo kavayumbile onthumbi muame. Moluotyo, mavakala nokuendaenda mehoko omanima 40 alo vankhia. Josue na Kalebe ovo vala mavanyingila mo Kanaa.