Ovalavi 12

Ova Isilayeli vatunda Komphunda Sinai avaende moluhandya. Etyi vehika kotyilongo tyitiwa o Kande, Siovaa apopila Mwisesi okuti: ‘Tuma ovalume 12 vakalave otyilongo tyo Kanaa, momuhoko wike pola-mo wike-wike. Otyilongo otyo mandyityiavela ova Isilayeli.’ Mwisesi aholovona ovalume 12, evepopila okuti: ‘Endei ko Kanaa, katalei ine otyilongo tyiyela ovikuna. Katalei ine ovanthu vakala-mo vapama ine kavapamene, tupu talei oñgeni omapunda-umbo avo ekahi.’ Povalavi 12 vaile ko Kanaa vamwe puvo o Susuwee na Kalembe.

Etyi palamba ononthiki 40, ovalavi avakondoka avaeta omakuyu nomalomaa, nonouva. Ovalavi avapopi okuti: ‘Otyilongo tyikahi nawa, mahi ovanthu vatyo ovanene unene, epunda-umbo lina ovimato viaya peulu.’ Kalembe apopi okuti: ‘Tukatukei vala twendei. Otyilongo tyina matyilingi tyetu, kavetupono-ale.’ Ove utyii omokonda yatyi Kalembe apopilile ngootyo? Omokonda Kalembe na Susuwee ankho vayumba onthumbi mu Siovaa. Mahi ovalavi ovakwavo 10 avapopi okuti: ‘Twahayei! Ovanthu vana ovanene, uti vala omakihi! Okulieeleka navo, uti vala tuvimphunia-mphunia.’

Ova Isilayeli avatili owoma. Avahimbika okupopia okuti: ‘Tukoyei umwe pwoonthwe makala onkhalamutwe yetu, atukondoka ko Isitu. Omokonda yatyi twila kotyilongo otyo opo tukaipawe?’ Susuwee na Kalembe avapopi okuti: ‘Tutavelei ku Siovaa, twahatilei owoma. Siovaa metuyakulila.’ Mahi ova Isilayeli avehetavela. Avahande okwipaa oo Susuwee na Kalembe!

Oityi Siovaa alinga? Wapopila Mwisesi okuti: ‘Nalingila ovipuka ovinyingi ova Isilayeli, mahi no ngootyo kavetavela kwaame. Mokonda yotyo, mavakala moluhandya omanima 40, ngamo vankhila. Ovana vavo kumwe na Susuwee na Kalembe ovo vala mavanyingila motyilongo mandyiveavela.’