Josue Walinga Onkhalamutue

MOISESI wahandele okunyingila mo Kanaa nova Isilayeli. Moluotyo waita ku Yehova okuti: ‘Mbambavo, ndyeke ndyiyauke Ondongi Jordau, ndyikatale otyilongo otyo otyiwa.’ Anthi Yehova ati: ‘Tyatuuka. Uhamphopile vali otyipuka otyo.’ Ove utyii omokonda yatyi Yehova apopila ngotyo?

Omokonda yetyi tyapopia Moisesi puetyi aveta monkhanda. Hinangela okuti, Moisesi na Arau kavankhimanekele Yehova. Ovo kavapopile kovanthu okuti o Yehova matundisa omaande monkhanda. Mokonda yotyo, Yehova wapopia okuti kameveyeke okunyingila motyilongo tyo Kanaa.

Ngotyo etyi papita onohanyi mbuhehi konyima yononkhia mba Arau, Yehova atolela Moisesi okuti: ‘Pola Josue, omutalameka komeho ya Eleazar osaserdote, no yovanthu aveho. Iya otolela aveho okuti Josue oe makala onkhalamutue.’ Moisesi walinga etyi Yehova emupopila, ngetyi uluete polutalatu apa.

Iya Yehova atolela Josue okuti: ‘Kala wapama, wahakale nouoma. Ove mohongolela ova Isilayeli motyilongo tyo Kanaa nevelaele, iya ame mandyikala noove.’

Konyima Yehova watolela Moisesi alonde Komphunda itiwa Nebu motyilongo tyo Moabe. Komphunda oko, Moisesi wetyivila okutala otyilongo otyiwa tyo Kanaa. Yehova apopi okuti: ‘Etyi, otyo otyilongo nalaa okuavela ovana va Abraiau, nova Isake, nova Jako. Ame nekuyeka utyitale, mahi himekuyeke unyingilemo.’

Moisesi ankhila Komphunda oyo itiwa Nebu. Ankho una 120 omanima. Moisesi ankho nkhele wapama, nomaiho ae ankho nkhele ekahi nawa. Ovanthu vanumanene unene avalili, mokonda Moisesi wankhia. Mahi ankho vahambukwa mokonda vena onkhalamutue omphe Josue.