Ohamba Omunongo Salomau

ETYI Salomau alinga ohamba ankho omukuendye omututu. Mahi, Salomau ankho uhole Yehova. Moluotyo, waendela monondonga onongwa apelwe na tate yae David. Yehova ahambukilwa unene Salomau. Ngotyo, onthiki imue kounthiki, Yehova watolela Salomau kondyoi okuti: ‘Salomau, oityi uhanda ndyikuavele?’

Salomau akumbulula okuti: ‘Yehova Huku yange, ame ndyi-​mukuendye omututu, hityii oñgeni mandyitumina. Ngotyo, ndyavele ounongo opo ndyityivile okutumina ovanthu vove nonkhalelo yaviuka.’

Yehova ahambukwa unene netyi Salomau aita. Moluotyo, Yehova ati: ‘Mokonda waita ounongo, kuaitile omuenyo omule nemona, ame mandyikupe ounongo omunyingi, wehenekale nomunthu nawike. Mahi, tupu madyikuavela ovipuka wahaitile, emona nenkhimano.’

Konyima yotyo, ovakai vevali veya ku Salomau notyitateka tyimue otyinene. Omukai umue wahangununa okuti: ‘Omukai ou naame, tukala mondyuo ike. Ame natyita omona omulume. Etyi papita ononthiki onombali, mukuetu nae atyiti omona omulume. Onthiki imue kounthiki, omona wae wankhia. Putyina ame ndyilele, mukuetu wayombeleka omona wae wokuankhia ponthele yange, iya apolopo wange. Etyi napahukapo okutala omona wankhia. Okumutala nawa omona hawangeko.’

Omukai omukuavo ati: ‘Au! omona wokuna omuenyo o wange, wankhia o wae.’ Omukai wotete akumbulula okuti: ‘Au! Omona wokuankhia o wove, wokuna omuenyo o wange.’ Ankho ongotyo ovakai ovo vekahi nokulipatana. Pahe Salomau malingi ñgeni?

Salomau watuma okueta omutunga, ati: ‘Tetei pokati omona wokuna omuenyo, amuavela kese umue otyinthimbu tyae.’

Ina yotyotyili yomona oo, eliyavela okuti: ‘Mbambavo, wahaipae omona. Mupei vala mukuetu.’ Mahi, omukai omukuavo ati: ‘Enga, mutetei pokati muhemupei nawike.’

Okuhulako Salomau ati: ‘Wahaipae omona. Muavela omukai wotete. Mokonda oe ina yotyotyili.’ Salomau ankho utyii okuti ina yotyotyili una oluembia olunene nomona wae. Mokonda ankho kahande aipawe, watavela omona apewe mukuavo. Etyi ovanthu vetyiiva oñgeni Salomau atetulula otyitateka otyo, avahambukwa unene. Mokonda ankho vena ohamba omunongo.

Mokuenda kuoutumini wa Salomau, ankho Huku waavela ovanthu ononkhano onongwa. Ankho vena ovilia ovinyingi, no tiliku, no sevata, no nouva, nomakuyu, no vikuavo vali. Ovanthu ankho vavala ovikutu oviwa. Tupu ankho vakala monondyuo onongwa. Ankho kuna ovipuka oviwa, vituuka pala ovanthu aveho.