Ondywo ya Siovaa

Etyi Salomau akala ohamba yo Isilayeli, Siovaa emupopila okuti: ‘Oityi wahanda ñgeno ndyikwavela?’ Salomau ati: ‘Ame ndyimona, hityii oñgeni mandyilingi. Mphevo enoñgonoko opo ndyityivile okuhongolela ovanthu vove.’ Siovaa emupopila okuti: ‘Mokonda waita ekungunyiko, mokala omulume omunongo vali ku aveho. Tupu mandyikwavela olumono. Ine utavela kwaame, mokala-ko ehimbwe nomwenyo.’

Salomau atungu ondywo ya Siovaa. Eitungu noolu, nopalata, nomavai, nomamanya. Ovanthu ovanyingi vetyivila okulinga ovipuka ovinyingi vaundapele motyilinga tyokutunga ondywo ya Siovaa, ovalume novakai. Veitungile omanima epandu-vali, etyi yapwa aveipakula ku Siovaa. Salomau alingi ovilikutila, aikila konongolo pomutala wovilikutila elikwambela ati: ‘Siovaa ove ñgeno utungilwa ondywo onene yapona pwei, mahi tavela-vo efendelo lietu, otehelela omalikwambelo etu.’ Oñgeni Siovaa atalele ondywo oyo nelikwambelo lya Salomau? Etyi Salomau amana okulinga elikwambelo, keulu akutundu otupia atuyoko ovinyama vikahi komutala wovilikutila. Otyo tyalekesile okuti Siovaa wetavelele ondywo oyo. Etyi ova Isilayeli vetyimona, avahambukwa.

Ohamba Salomau ankho iiwe mo Isilayeli aiho no movilongo ovikwavo mokonda omunongo. Putyina ovanthu vamelipono, venda ku Salomau opo ekevekwateseko. Atee umwe onkhai-hamba yoko Sambaa nayo yeile ku Salomau ikemupule ovipuka vialema. Etyi Salomau akumbulula ovipuka aviho onkhai-hamba yapula, aiti: ‘Ame hetavelele kweetyi ovanthu vamphopila tyayemba kwoove, mahi netavela vala etyi neya, andyilitalela-ko nomaiho ange mwene. Huku yove, Siovaa, wekwavela ovipuka oviwa.’ Ova Isilayeli ankho vekahi nawa, vena ehambu. Mahi ovipuka avipiluluka.