Ovihuna Vya 10

Mwisesi apopila Falaoo okuti himeya vali kwoove. Mahi nkhele etyi eheneende apopila vali Falaoo okuti: ‘Tyina tyiti kombimba, oviveli aviho vyo motyilongo tyo Isitu mavinkhi, okuhimbikila kotyiveli tya Falaoo atee kotyiveli tyomupika.’

Siovaa apopila ova Isilayeli opo vateleke okulia kwelikalela motyinthiki otyo. Ati: ‘Ipaei ongi okuti hatyo otyinkhombo tyina enima like, ohonde yatyo amwivaveka ponombundi mbonondywo mbenyi. Yokei ohitu yatyo amuli nonombolo mbehena onkhiso. Valei ovikutu nononkhaku opo mwende. Motyinthiki tyino mandyimupolo mo Isitu.’ Soka vala oñgeni ova Isilayeli vakalele etyi veiva otyipuka otyo!

Kombimba oandyu ya Siovaa ailambela ponondywo ambuho mo Isitu. Pomapito onondywo mbahavavekelwe ohonde, oviveli aviho avinkhi. Mahi oandyu aihanyingila monondywo mbavavekwa ohonde ponombundi. Mokonda yotyo, onombunga ambuho mo Isitu okuhimbikila kovahona atee kovahepi, oviveli viavo avinkhi. Mahi povana vova Isilayeli petupu nawike wankhile.

Nomona wa Falaoo wotyiveli nae ankhi. Falaoo etyimono umwe okuti utupu-ale vali etyi malingi. Apopila Mwisesi na Alau okuti: ‘Tundei pano. Endei, kafendei Huku yenyi. Endei novipako vienyi!’

Etyi ova Isilayeli vatunda mo Isitu ohanyi yaoya, avatundu-mo tyaongana nawa, onombunga nomihoko. Ovalume ova Isilayeli ankho vena 600.000 novakai ovanyingi novana. Ovanthu ovanyingi veheva Isilayeli, navo avaende nova Isilayeli opo navo vakafende Siovaa. Pahe ova Isilayeli avayovoka!

Opo vatwaleko okuhinangela oñgeni Siovaa eveyovola, kese nima valinga otyipito. Otyipito otyo tyitiwa o Pasikwa.