Omulao Valingila Siovaa

Etyi ova Isilayeli vatunda ko Isitu, avaende onohanyi onombali avehiki Komphunda Sinai, ngako vakala ononthiki mbumwe. Siovaa apopila Mwisesi alonde komphunda Sinai, emupopila okuti: ‘Ame nayovola ova Isilayeli. Inkha vatwalako okunthavela avalandula ovitumino viange, mavakala ovanthu vange napanda unene.’ Mwisesi atundu komphunda akatolela ova Isilayeli etyi Siovaa emupopila. Utyii etyi vapopile? Vatile: ‘Matulingi ovipuka aviho Siovaa etutuma.’

Mwisesi akondoka vali komphunda. Komphunda Siovaa emupopila okuti: ‘Mandyipopi noonwee tyina pamalambe ononthiki ononthatu. Popila ova Isilayeli vahalonde Komphunda Sinai.’ Mwisesi atuluka komphunda, akapopila ova Isilayeli okuti Siovaa wati mandyiya okupopia noonwe.

Etyi palamba ononthiki ononthatu, ova Isilayeli avamono ekaka limwe enthikovei liahika omphunda. Tupu aveivi omitetanena nonkhwino yahika. Konyima avamono otupia twatunda ku Siovaa, twatokela komphunda. Ova Isilayeli avatili unene owoma. Omphunda aiho aihimbika okuteketa, aihikwa nomwihi. Onkhwino aiivala vali unene. Huku ati: ‘Ame Siovaa. Onwe kamupondola okufenda huku omukwavo.’

Mwisesi alondo vali komphunda Sinai, Siovaa emupopila ovitumino vipopia oñgeni ovanthu vena okumufenda, novipuka vena okulinga, neevi vahapondola okulinga. Mwisesi ahoneka ovitumino ovio eya okuvitangela ova Isilayeli. Ova Isilayeli avapopi okuti: ‘Matulingi ovipuka aviho Siovaa etutuma.’ Avaane umwe avati otyo matulingi otyo. Okuti valingile umwe etyi vapopile?