Siovaa Uholovona Susuwee

Mwisesi wahongolela ova Isilayeli omanima omanyingi, pahe ankho uhungi kononkhia. Siovaa emupopila okuti: ‘Ove have-ko motwala ova Isilayeli Motyilongo Tyalaelwe. Mahi mankhuyeke utyitalele vala kokule.’ Mwisesi aiti Siovaa opo aholovone omunthu omukwavo ahongolele ova Isilayeli. Siovaa emupopila okuti: ‘Enda ku Susuwee, mupopila okuti oe naholovona.’

Mwisesi apopila ova Isilayeli okuti mankhi, Siovaa waholovona Susuwee opo evetwale Motyilongo Tyalaelwe. Mwisesi apopila Susuwee okuti: ‘Wahatile owoma. Siovaa mekukwatesako.’ Konyima Mwisesi alondo Komphunda itiwa Nembu, ngako Siovaa emulekesila otyilongo atile otyo maavela Ambalayau na Isake na Sakoo. Mwisesi wakalele-ko omanima 120 pahe ankhi.

Siovaa apopila Susuwee okuti: ‘Yauka Ondongi Solondau enda noko Kanaa. Ame mankhukwatesako ngeetyi nakwatesako Mwisesi. Opo ukale tyapama tanga apeho Ovitumino viange. Wahatile owoma. Kala tyapama. Enda, linga atyiho nekutuma.’

Susuwee atumu ovalavi vevali mepunda-umbo lyo Selikoo. Melongeso malilandulako matulilongesa vali konthele yeetyi tyaendele-po. Etyi ovalavi vakondoka, avapopi okuti otyilongo tyo Kanaa matyilingi umwe tyetu. Onthiki onkhwavo Susuwee apopila ova Isilayeli opo vamaneke. Ovanakwa avatyindi otyikasa tyomphango avapiti komutwe opo vayauke Ondongi Solondau. Mahi tyina vavasa, ondongi yeyula. Okuyauka kamavetyivili. Mahi etyi ovanakwa valiata vala mondongi omeva aatalama, aelitungu ngotyimato! Ovanakwa avaende pokati kondongi, avakevelela ova Isilayeli vayauke. Okuti otyipuka otyo tyasokesile ova Isilayeli kweetyi Siovaa alingile Melunga Likuhuka?

Ova Isilayeli pahe vanyingila Motyilongo Tyalaelwe. Ankho vapondola okutunga onondywo nomapunda-umbo. Vapondola okutwika omiti vahanda. Ankho otyilongo tyimwe tyiyela ovikuna, tyina omahini nowiki.