Vayauka Ondongi Jordau

TALA. Ovaisilayeli vekahi nokuyauka Ondongi yo Jordau. Iya omeva ekahipi? Mokonda ombila ankho iloka unene pomuvo watyo oo wenima, ondongi ankho yeyula omaande. Mahi pahe mondongi mutupu vali omaande. Ovaisilayeli vekahi nokuyauka pohi yakukuta ngetyi valingile Kelunga Enkhuhu. Omaande ana aeho aya napi? Tutalei.

Etyi omuvo wehikapo pala ova Isilayeli vayauke Ondongi yo Jordau, Yehova watuma Josue apopile ovanthu okuti: ‘Ono saserdote mbutyinde otyikasa tyomphango iya avapiti komutue. Putyina vamapake onomphai mbavo momaande ondongi Jordau, omeva maatalama okuhateka.’

Ngotyo, ono saserdote mbatyinda otyikasa tyomphango, iya avapiti komutwe wovanthu. Etyi vehika po Jordau, ono saserdote mbaliata momaande. Omaande ankho ekahi nokuhateka no nonkhono ononene nokuaya kohi. Anthi, liwa liwa etyi onomphai mbavo mbaliata momaande, omaande ahimbika okutalama okuhateka. Otyo ehuviso. Yehova omaande weehitika. Moluotyo, mokamuvo kehehi mondongi ankho mutupu vali omeva.

Ono saserdote mbokuatyinda otyikasa tyomphango, avaende alo pokati kondongi yakukuta. Uveluete polutalatu apa? Opo vakala opo, alo ova Isilayeli aveho vayauka ondongi.

Etyi ovanthu aveho vayauka, Yehova watuma Josue apopile ovalume 12 vokuapama okuti: ‘Endei opo patalama ono saserdote notyikasa tyomphango. Kapoleipo omamanya 12, iya amuetyindi alo apa mamukalala. Iya komutue, putyina ovana venyi vemupula okuti omamanya oo ahangununa tyi, amuvetolela okuti omaande atalamene okuhateka etyi otyikasa tyomphango tya Yehova tyayauka o Jordau. Omamanya oo, maemuhinangelesa ehuviso eli.’ Tupu Josue watuma okupaka omamanya 12 mondongi, pana ankho petai ono saserdote.

Konyima, Josue atolela ono saserdote mbokuatyinda otyikasa tyomphango okuti: ‘Tundeimo pahe mo Jordau.’ Etyi vatundamo, liwa liwa omeva ahimbika okuhateka vali.