Ovatangi Vapula
Okuti Ovinimawe, Nomafindya Novipepe Ovinene, Ekoyeso Lia Huku?
Huku kaeta ovinimawe noviponga ovikuavo pala okumonesa ovanthu ononkhumbi. Nalumue etyilingile, tupu nalumue meketyilinga. Mokonda yatyi? Omokonda Ombimbiliya mu 1 João 4:8, yati “Huku oluembia”.
Oluembia, ondyivindyivi yovipuka aviho Huku alinga. Oluembia kalulingi omapita una wahalingi ovivi. Ombimbiliya yati “oluembia kalulingila vakuavo ovivi”. (Romanos 13:10) Mu Jó 34:12 Ombimbiliya yati: “Tyotyili, Huku kalingi ovivi.”
Tyotyili Ombimbiliya yaula okuti pononthiki mbetu makukamoneka “ovinimawe ovinene.” (Lucas 21:11) Mahi, Jeova haeko weetako ovinimawe, novipepe ovinene vikahi nokuipaa ovanthu. Inkha Huku haeko ukahi nokumonesa ovanthu ononkhumbi mbutundilila kovinimawe no koviponga ovikuavo, iya olie ukahi nokueta oviponga ovio?
“Ouye auho ukahi pomavoko ondingavivi,” Satanasi Eliapu, ngetyi Ombimbiliya yetyipopia. (1 João 5:19) Satanasi omuipai tunde etyi atyitukilapo Huku ponthyimbi yovanthu, alo mononthiki mbetu. (João 8:44) Satanasi utala omuenyo wovanthu ngatyina uhasilivila. Satanasi ulinga aviho nelungavi, nokuhongiliya ovanthu mouye okuovola okulipaka kounene. Hono mouye, ovanthu velulu vakuluminya ovanthu ovanyingi ovahepi okukala ponomphangu pehole okupita oviponga ovinene, novinimawe novikuavo vali. (Efésios 2:2; 1 João 2:16) Ngotyo, elungavi liovanthu, lihole okueetela ovanthu ovanyingi ononkhumbi. (Eclesiastes 8:9) Ñgeni ngotyo?
Oviponga ovinyingi vihole okuetwa novanthu. Nkhele tala ononkhumbi mbapita novanthu mepundaumbo limue ko Estadu Unidu liatumbukilwa nefindya enene liomeva. Ine soka konondyuo mbahanyaukapo ko Venezuela, mokonda mbatungilwa mombuelo yonomphunda, iya mokonda yombila, ofika oyo yahimbika okusenguluka otyo itoka. Oviponga ovio novikuavo vali, ngovipepe ovinene, nombila viaetele ononkhumbi ononene, mokonda ovanthu onomphuki kavasuku nomalondolo, tupu vatunga pana pehetavela okutungwa. Pamue vatunga novipuka viahasete okuhanyauka, nokuhasoko nawa tete evi mavalingi, ine omokonda yoviponyo via vana vekahi koutumini.
Pahe tala otyiponga tyapopiwa Mombimbiliya. Kononthiki mba Jesus, otyitongo-tongo tyondyuo imue tyateka, atyiipaa ovanthu 18. (Lucas 13:4) Otyiponga otyo, tyatundile kotyiponyo tyovanthu, ine “omokonda yomuvo novitateka viuhuluka vala,” katyatundile ku Huku.—Eclesiastes 9:11.
Okuti kuna oviponga vimue viaetelwe na Huku? Enga, mahi vielikalela nevi vihole okuya vala avike na vina vietwa novanthu. Oviponga viatundile ku Huku viatongolele vala vana vatokala okunkhia, mahi kavihi. Onongeleka mbumue konthele oyo, Ombila Onene yo kononthiki mba Noe, nehanyauko lio Sodoma no Gomora kononthiki mba Lote. (Gênesis 6:7-9, 13; 18:20-32; 19:24) Omakoyeso oo a Huku, aipaele vala onondingavivi vehetavelele okulivela, mahi ovaviuki komaiho a Huku, vahupile nomuenyo.
Tyotyili, Huku una ounongo, nehando, nepondolo liokunyimako ononkhumbi ambuho, nokuyovola ovanthu memone litundilila kovinimawe, novipepe ovinene, nombila. O Salmo 72:12 ipopia konthele ya Jesus Kristu Ohamba yaholovona Huku okuti: “Mayovola omuhepi uliyavela okuita ombatelo, na una umona ononkhumbi, na kese umue uhena omuvateli.”