Okuti Ovinimawe, Nomitetanena—Vilekesa Okuti Huku Omukalavi?

OITYI OVANTHU VAMWE VAPOPIA: “O Huku utumina ouye, moluotyo oe weetako ovinimawe nomitetanena, iya otyo tyilekesa okuti omukalavi.”

OITYI OMBIMBILIYA IPOPIA: “Ouye auho ukahi pomaoko ondingavivi.” (1 João 5:19) “Ondingavivi” olie? Ombimbiliya ipopia okuti o Satanasi. (Mateus 13:19; Marcos 4:15) Okuti otyo ounkhembi? Nkhele soka kuetyi: Inkha o Satanasi utumina ouye, naina oe ukahi nokuhongiliya ovanthu vakale nelungavi, nouhima ngetyi ekahi. Okuti otyo katyitukuatesako okunoñgonoka omokonda yatyi ovanthu valingila ovipuka vinyona ohi? Ovanongo ovanyingi vapopia okuti mokonda ovanthu vekahi nokunyona ohi, otyo tyipondola okuetako ovinimawe, nomitetanena, nokuviyawisa vali ine okulingisisa vinyone vali unene ovanthu.

Mahi, omokonda yatyi Huku ayekela Satanasi atualeko okuhongiliya ovanthu? Opo tukumbulule epulo olio, tuesukisa okusoka kuetyi Andau na Eva vatyitukilapo Outumini wa Huku. Tunde opo, ovanthu ovanyingi vekahi nokulandula ongeleka oyo. Mokonda yokuaholovona okuehetavela outumini wa Huku, ovanthu vekahi pomaoko ondyale ya Huku, Satanasi. Otyo Jesus apopilile okuti Satanasi “omutumini wouye.” (João 14:30) Okuti Satanasi matumina apeho? Au!

Jeovaa usuka nononkhumbi Satanasi ekahi nokueta. Tyotyili, Huku kahambukwa nononkhumbi mbovanthu. Mongeleka, etyi elongo lio Isilayeli ankho likahi nokupita movitateka, Ombimbiliya yapopia konthele ya Huku okuti: “Mokueenda kuononkhumbi mbavo ambuho, nelitehelelele omapita.” (Isaías 63:9) Nokankhenda, Huku walinga epongiyo opo apa katutu amaneko outumini omukalavi wa Satanasi! Waholovona Omona wae, Jesus Kristu, opo akale Ohamba youviuki omuvo wahapu.

OÑGENI OVE WAKUTIKINYUAMO: Namphila outumini wa Satanasi wehekahi nokuyakulila ovanthu kovinimawe, nokomitetanena, outumini wa Jesus mauketyilinga. Nthiki imwe, Jesus wayakulilile ovalongwa vae kotyipepe otyinene. Ombimbiliya yati: “Waviyulile omphepo, apopila elunga okuti: ‘Uti filu! Hiliya!’ Iya omphepo aitulu, apakala etuliyo limwe enene.” Ovalongwa avati: “Naina ou olie, mokonda alo umwe omphepo nelunga vimutavela?” (Marcos 4:37-41) Otyo tyitukalesa nonthumbi yokuti Jesus makayakulila ovanthu aveho ovataveli mokueenda Kuouhamba wae.—Daniel 7:13, 14.