Etavelo Liayandyana Unene
“Ame nalota onondyoi mbutilisa owoma, mbotupia two ifelunu! Nalota ngoti ndyikahi nokuyumbwa motupia, iya andyipindukapo nokuliyavela. Nalinga ononkhono ononene opo nahalinge onkhali.”—Arline.
OVE utavela okuti oifelunu omphangu yononkhumbi yapakelwa vana valinga ovivi? Ovanthu ovanyingi otyo vetavela. Menima lio 2005, Omunongo umue mo Sikola onene yo St. Andrews ko Eskosia, waimbuka okuti pononkhalamutue ononthatu mbongeleya mo Eskosia umue utavela okuti vana vekahi kokule na Huku mavakamona “ononkhumbi mbahapu momutima mo ifelunu.” Onkhalamutue ya tano itavela okuti ovanthu vokukahi mo ifelunu mavamono ononkhumbi molutu.
Movilongo ovinyingi, etavelo lio ifelunu yotupia likahi nokuyandyana. Mongeleka povanthu 100 vapulwa mo Estadu Unidu menima lio 2007, 70puvo vetavela elongeso lio ifelunu. Alo umue movilongo muna ovanthu vahasukile nokufenda, vetavela o ifelunu. Mo Kanada menima 2004, povanthu 100 vapulwa 42 vetavela oifelunu. Tupu, mo Gra-Bretanha, povanthu 100 vapulwa, 32 vetavela okuti kuna o ifelunu yotupia.
Oityi Ononkhalamutue Mbonongeleya Valongesa
Ononkhalamutue ononyingi mbonongeleya, vayekapo okulongesa okuti oifelunu yotupia omphangu yononkhumbi. Anthi, vetavela ehangununo lielifwa no olio, liapopiwa mo Katikisimu ko Katolika, lialingwa menima lio 1994. “Ononkhumbi mbehitiso lio ifelunu, okuayapulwa apeho ku Huku.”
Mahi, nkhele ovanyingi vatualako okutavela okuti oifelunu omphangu yononkhumbi momutima ine omolutu. Ovanthu vokutavela elongeso olio, vati liatunda mo Mbimbiliya. R. Albert Mohler, omutumini wo Seminário Teológico Batista do Sul wati: “Otyo, otyili tyo Vihonekwa.”
Etavelo Liove Liakolela Mokonda Yatyi?
Inkha oifelunu omphangu yononkhumbi tyili, ove wesukisa okukala nowoma nayo. Anthi, inkha elongeso olio hatyiliko, ononkhalamutue mbonongeleya valongesa ngotyo, vekahi nokunguanguanesa ovanthu vetavela kelongeso olio, no kuveetela owoma. Otyo, tupu tyiundula Huku.
Oityi Ondaka ya Huku Ombimbiliya, ipopia konthele oyo? Ononthele mambulandulako, mambuundapesa ono Mbimbiliya mbo Katolika no Protestande, pala okukumbulula omapulo etatu ati: (1) Oityi tyili tyipita nomunthu tyina ankhia? (2) Oityi Jesus alongesa konthele yo ifelunu? (3) Okulilongesa otyili konthele yo ifelunu tyikukalesa ñgeni?