Okulilongesa Otyili Konthele yo Ifelunu Tyikukalesa Ñgeni?
VANA valongesa okuti oifelunu omphangu yononkhumbi, vekahi nokulongesa ounkhembi omuvi unene konthele ya Jeova Huku novituwa viae. Ombimbiliya ipopia okuti Huku makanyimako onondingavivi. (2 Tessalonicenses 1:6-9) Mahi, onyengo yaviuka, hatyoko otyituwa tyavilapo tya Huku.
Huku hamukalaviko, tupu kakala nonkhongo. Oe alo umue wati: “Okuti ame ndyihambukwa tyina ondingavivi ankhia?” (Ezequiel 18:23, Almeida, revista e corrigida.) Inkha Huku kahambukilwa ononkhia mbondingavivi, oñgeni mahambukwa okuvetala apeho tyina vamoneswa ononkhumbi mbahapu?
Otyituwa tyavilapo tya Huku, oluembia. (1 João 4:8) Tyotyili, “TATEKULU omuwa kuaveho, oe una okankhenda novipuka aviho atunga.” (Salmo 145:9, Almeida, revista e corrigida.) Anthi, Huku uhanda tukale nohole nae itunda momutima.—Mateus 22:35-38.
Etyi Tyikupa Vali Ondundo, Owoma wo Ifelunu ine Ohole na Huku?
Elongeso liokuti onohande mbumona emone mo ifelunu, litukalesa nowoma na Huku. Anthi, omunthu unoñgonoka otyili konthele ya Huku akala nohole nae, ukala nonthilo ongwa nae. O Salmo 111:10 yati, “Onthilo na TATEKULU otyo onthyimbi yonondunge. Aveho vaenda ngotyo ovanongo.” (The New American Bible) Onthilo na Huku, hawoma, mahi onthilo ongwa yehumbilo enene no Mupakeko wetu. Onthilo oyo, ituhindila okulinga vala etyi tyimuhambukiswa.
Tala oñgeni okunoñgonoka otyili konthele yo ifelunu tyakalesa Kathleen, omukai wokuna omanima 32, ankho usipa epangwe. Omuenyo wae ankho o wovipito vala, noungangala, nokuliyele oe muene, nomaundalelapo. Oe wati: “Ankho ndyitala omona wange una enima like andyisoko okuti, ‘Tala etyi ndyikahi nokumulinga. Mandyikayokwa mo ifelunu mokonda yetyi ndyilinga.’” Kathleen ankho wovola okuyekapo okusipa epangwe, mahi ehetyivili. Oe wati, “Ankho ndyihanda okulinga etyi tyaviuka, mahi momuenyo wange no mouye, ankho natyike tyimpha ondundo. Ngoti ankho kutupu ehunga liokulinga oviwa.”
Kathleen etyi elivasa no Nombangi mba Jeova, wati: “Nanoñgonoka okuti kutupu oifelunu. Etyi Ovihonekwa viapopia tyaviuka vali nawa. Okunoñgonoka okuti kutupu oifelunu yotupia, tyambatela unene.” Mahi, oe tupu wanoñgonoka omulao wa Huku wokuti ovanthu vapondola okukakala nomuenyo wahapu pano pohi, tyina onondingavivi mbamanyimuako. (Salmo 37:10, 11, 29; Lucas 23:43) Apopi nehambu okuti: “Pahe ndyina ekevelelo lio tyotyili, liokukala nomuenyo wahapu Momphangu Yombembwa!”
Okuti Kathleen metyivili okuyekapo okusipa epangwe tyina ehena vali owoma wo ifelunu yotupia? Oe wati: “Tyina ndyikala nepeleyo enene liokusipa, ndyilikuambela, okuita ombatelo ku Jeova Huku. Ndyisoka oñgeni atala ovituwa ovio viasila, iya andyilityilika okumunumanesa. Jeova wakumbulula omalikuambelo ange.” (2 Coríntios 7:1) Owoma wokunumanesa Huku wakuatesako Kathleen okuyekapo ovituwa viae ovivi.
Tyotyili, ohole na Huku nonthilo nae, vituavela ondundo yokulinga ehando Liae, atukala nombembwa ihapu. Mahi, owoma wo ifelunu yotupia kautuavela ondundo. Omuhoneki wo salmu wati: “Kese munthu una onthilo na Jeova, aendela monondyila mbae, una ononkhano onongwa.”—Salmo 128:1, American Standard Version.
[Okakasa/Olutalatu pefo 9]
OLIE MAKAYOVOLWA MO IFELUNU?
Onombimbiliya mbumue mbungua-nguanesa ovanthu mokonda mbupitiya onondaka ombu onombali mbo Gregu— Geʹen·na no Haiʹdes—mondaka ike “ifelunu.” Mombimbililya ondaka Geʹen·na ihangununa ononkhia mbuhena ekevelo lietutilo. Mahi, vana vekahi mo Haiʹdes ine elangalo, vena ekevelo lietutilo.
Ngotyo, konyima yononkhia mba Jesus nokupinduluapo, apostolu Petulu wapopilile ovateheleli vae okuti Jesus “kayekelelwe mo ifelunu.” (Atos 2:27, 31, 32; Salmo 16:10, King James Version) Ondaka yapitiyua “ifelunu” mo versikulu omo, mo Gregu o Haiʹdes. Jesus ankho kaile momphangu yotupia. Hades ine “ifelunu,” elangalo. Mahi, Jesus haeko vala aike Huku apindulilepo melangalo.
Ombimbiliya ipopia konthele yetutilo okuti: “Ononkhia no ifelunu (elangalo) mbayovola ovankhi ankho vekahimo.” (Revelação 20:13, 14, KJ) Okulongolola atyiho tyili mo “ifelunu” tyihangununa okukondolela omuenyo ovaviuki aveho, Huku makatutilisa. (João 5:28, 29; Atos 24:15) Otyiwa unene okukevelela, vetu vokuankhia tyina vakapidukapo okutunda melangalo! Jeova meketyilinga mokonda o Huku yoluembia luahapu.