Efendelo Liombunga—Liakolela Pala Okuhupa!
SOKA oñgeni “ovita vionthiki onene ya Huku Wepondolo aliho” mavikatilisa owoma tyina viameya! (Revelação 16:14) Omuuli Miqueia wahoneka onondaka mbati: “Onomphunda . . . , mambukasenguluka iya omilola mavikasenguluka ngelohi mokonda yotupia, ngomaande akunkhunuka nooku kualauka.” (Miquéias 1:4) Otyiponga patyi matyikamoneka navana vahaumbila Jeova? Ondaka ya Huku yatyi: “Vana mavakaipawa na Jeova monthiki ina makatuka konthele yoohi alo onthele onkhuavo yoohi.”—Jeremias 25:33.
Mokonda yomalondolo oo, ononkhalamutwe yombunga, novanyingi vatekula ovana aveke, vesukisa okulipula konthele yovana vavo vekula oityi vena okulinga opo ‘ovana vakahupe kotyiponga otyo otyinene?’ Ombimbiliya ilekesa okuti ovo vapondola okukahupa inkha vavasiwa tyapama mopaspilitu monkhalelo yata meti liavo.—Mateus 24:21.
Omokonda Yatyi Tyakolela Okukala Nefendelo Liombunga
Ovohe vena okuimbuka okuti vena okulinga atyiho pala okutekula ovana “montheto no movitumino via Jeova.” (Efésios 6:4) Okulilongesa Ombimbiliya novana tyakolela unene. Onthue tuhanda ovakuendye vetu vakale ngo Vakristau vo ko Filipe, vana Paulu apandele mokonda yokutavela ku Jeova. Oe wahoneka okuti: “Nonthyolwa mbange, ngetyi mutavelale apeho, ha mokonda ko vala ndyikahi pokati kenyi, mahi pahe haunene tyina namaende, tualeiko okulinga ovipuka vieta eyovo lienyi. Tualeiko okutyilinga nonthilo nonthekete.”—Filipenses 2:12.
Okuti ovana vove vetavela ovitumino via Jeova natyina ove wehepo? Natyina veli kosikola vetavela ovitumino via Jeova? Oñgeni ove upondola okukuatesako ovana okunoñgonoka ounongo wokuhongolelwa novitumino via Jeova natyina ove wehepo?
Efendelo liombunga liakolela unene pala okukuatesako nokupameka ekolelo liovana vove konthele oyo. Ngotyo, matulilongesa ovipuka vitatu vesukisa opo elongeso liombunga liende nawa.
Okulinga Apeho
Ombimbiliya ilekesa okuti onthiki imue ankho onoandyu ovana va Huku vakongwa okuya ponthele yae. (Jó 1:6) Nove otyo ulinga ngotyo novana vove. Holovona onthiki nomuvo pala efendelo liombunga kongulohi nomuvo mamumanuhula. Tupu, upondola okuovola omuwo omukuavo muna okulilongesa inkha pena etyi tyemutumbukila monthiki muaholovona.
Wahakale notyituwa tyokulinga efendelo liombunga pamwe-pamwe. Hinangelesa ovana okuti tyakolela vali unene okulilongesa Ombimbiliya. Anthi, ovana vove vapondola okutokela momaliva a Satanasi. (1 Pedro 5:8) Inkha ove kusuku notyinthiki tyefendelo liombunga, otale otelevisau ine otyilinga otyikuavo vali tyouye, Satanasi mekuvili.—Efésios 5:15, 16; 6:12; Filipenses 1:10.
Kutikinyamo Ovipuka Mulinga Kese Nthiki
Efendelo Liombunga kokangulohi liavilapo vali tyipona okulilongesa vala. Undapesa ovipuka mulinga kese nthiki. Ñgeni? Pamwe, upondola okuholovona onondaka mbumue ovana mavapopi monthiki oyo, ine omo nosimano onokhuavo. Omokonda yatyi uhakutikinyamo etyi mamukapopia movilinga viokuivisa? Ovana vahambukua tyina valinga ovipuka vevila okulinga. Okulinga etyi mamukapopia nokusoka oñgeni mamulingi matyimukuatesako okukala vali nonthumbi movilinga viokuivisa Ouhamba wa Huku.—2 Timóteo 2:15.
Tupu upondola okulongesa ovana oñgeni vapondola okuyakulila ekolelo liavo. Okapitulu 15 komukanda Os Jovens Perguntam — Respostas Práticas, Volume 2, kapondola okuundapeswa pala okutomphola nombunga. Pomafo 132 no 133 pena osapi: Plano para enfrentar a pressão de colegas, pena onondaka tupu mbupondola okuundapeswa pala okukuatesako ovana opo vaave omakumbululo evehambukiswa. Onthele ikahi pombuelo yefo 133 yati: “Treine suas respostas com seus pais ou com um amigo maduro”, ilunda ovakuendye okuilinga novohe ine onepanga wanoñgonoka nawa. Pamwe-pamwe, omokonda yatyi uhalingila ononthele ombo Melongeso liove Liombunga?
Efendelo Liombunga liava omphitilo opo ovohe vakuateseko ovana okukala noupanga na Jeova nokupama movilinga viae. Okutanga omukanda Os Jovens Perguntam Volume 2, muna onondaka mbumue onongwa mokapitulu 38 posapi yati: “O Que Farei Com a Minha Vida?” Tyina mulilongesa okapitulu oko, kuatesako ovana vove okutala okuti okulinga ehando lia Huku otyipuka tyimue otyiwa. Paka momutima wovana ehando liokuundapela Jeova ngomukokoli-ndyila, ovilinga vio Mbetele, Osikola Yovilinga Viokuivisa (Escola de Treinamento Ministerial), ine okuovola okunyingila movilinga viomuwo auho.
Mahi tyesukisa okulunguka: Ovohe vamue valongesa ovana vavo etyi vevehandela, avatombo etyi ovana vevilale okulinga. Mahi otyiwa okulongesa ovana okukala nehando novilinga vio Mbetele, no vioumisionaliu. Okulinga ngotyo, inkha katulunguka tupondola okupaka momitima viavo ekevelo vehemevili atyivenumanesa. (Colossenses 3:21) Apeho hinangela okuti omona upondola okuhumba Jeova nomutima wae muene—ha no wovohe. (Mateus 22:37) Pandula omona wove muetyi evila okulinga nawa, ohatualako okumukuluminya okulinga etyi eheveli. Panda ovipuka aviho Jeova alinga. Yeka ovana vove valekese olupandu kouwa wa Jeova.
Linga Elongeso Lihambukiswa
Otyipuka tyatatu tyesukisa opo Efendelo Liombunga liende nawa ehambu. Oñgeni ove motyilingi? Hamwe mupondola okutehelela ovidiu yondalama ine okutala nokutomphola konthele yo novidiu mbalingwa no Nombangi mba Jeova. Ine mupondola okutanga onthele imue yo Ombimbiliya amuho, amulitepulila ononthele ombo pala kese umue mombunga.
Momutala Womulavi no mo Despertai!, muna ononthele mbumue onongwa mbutavela okutomphola nombunga. Mongeleka ove upondola okuundapesa efo 31 mukese Despertai! posapi yati: “Qual É a Sua Resposta?” Pena ononthele ononkhuavo ononyingi, mo Sentinela younyingi posapi yati “Para os Jovens.” Upondola okuundapesa ononthele ombo nonkhuavo vali mbo vakuendye mbati “Ensine Seus Filhos.”
Ononthele mbokuati “Os Jovens Perguntam” mo Despertai! mbupondola okuundapeswa novohe vena ovana vekahi nokuhika meti lioukuendye, momukanda Os Jovens Perguntam, Volume 2. Tyina utanga omukanda oo, omokonda yatyi wahatalela poukasa wati: “Como Responderia?” ukahi konthyulilo ya kese kapitulu. Oukasa oo wesukisa vali tyipona okupitulula. Omapulo ekahi moukasa oo apondola okuundapeswa pala etompho liombunga.
Tyesukisa okulunguka, opo ovohe pokulinga elongeso liombunga vahalinge ovana omapulo omanyingi. Mongeleka ovohe kavapondola okukuluminya ovana okutangela peulu ine okuhoneka pomafo okuati “Minhas Anotações” ine opo nonthele ononkhuavo mbomukanda. Momukanda oo pefo 3 posapi yati: “Uma nota para os pais” “ilunda ovana okuhoneka momikanda viavo, ovipuka viomuenyo wavo muene. Komutwe wandyila, vapondola okutala konthele yetyi vahoneka.”
Inkha ove utualako okulinga efendelo liombunga apeho, nokupopia ovipuka mulinga kese nthiki, nokulinga nehambu, Jeova mekuavela ononkhaneno onongwa mononkhono ulinga. Omuwo ombunga vaholovona wakolela unene opo ombunga itualeko mohole nokupama mopaspilitu.
[Oliolutalatu pefo 31]
Linga Ovipuka Vipameka Ombunga
“Tyina tulilongesa nomulume wange, tupongiya ononthele mbewaneno otyo omona wetu omukainthu ahangununa omalutalatu. Pamwe, tulinga omalekeso Ombimbiliya netyi matukapopia movilinga viokuivisa. Tutualako nokulongesa ononthele mbatokala meti liae, mbuhambukiswa, nokupameka, nokuyolesa.”—J.M., Estados Unidos.
“Pala okukuatesako omona okunoñgonoka Ombimbiliya, tulinga onombuingwa ngetyi ankho tyikahi Ombimbiliya kohale, tulinga okopiya ovikapitulu no noversikulu vio mukanda wa Isaia. Tuhonyeka omafo atuewingi nawa. Omona wetu omukuendye aovola ngetyi tyalingile Jesus mondyuo yokufendela mo Nazare. Onondaka mbukahi mu Lucas 4:16-21 mbati Jesus “waikula ombwingwa ya [Isaia] avasi” apa ankho aovola. (Isaías 61:1, 2) Anthi, omona wetu nae ulinga ngotyo, okuovola avasi mombuingwa okapitulu ka Isaia 61 no noversikulu mbatyo. Okuhuva nounongo wa Jesus wokuikula onombuingwa, omukuendye upopia okuti: ‘Jesus wali omunongo!’” —Y.T., Japão.
[Olutalatu pefo 30]
Okulilongesa ovipuka vilinga kese nthiki tyivatela ovana okuyakulila tyina vahongiliyua navakuavo kosikola
[Olutalatu pefo 31]
Okulikuatehila tyeta ehambu mefendelo liombunga.