Ove Uhole Okutaindya Omuvo Wokulilongesa Ombimbiliya?
MENIMA liokualamba Ononkhalamutwe mbo Nombangi mba Jeova valinga epiluluko komaliongiyo opo onombunga vakale vali nomuvo wokulilongesa Ombimbiliya. Inkha ove unkhalamutue yombunga, kala tyityi okuti tyakolela unene okulinga apeho elilongeso lio Mbimbiliya kumwe nomukai wove novana. Vokuelinepa vehena ovana, navo vapondola okutaindya omuvo wokulilongesa kumwe Ombimbiliya. Ovakuatate nonomphange vokuhanepele, navo vesukisa okuundapesa omuvo oo wokulilongesa Ombimbiliya.
Ovanyingi vapandula unene epongiyo olio Lielilongeso Liombunga kokangulohi. Mongeleka, Kevi, omukulu umue wewaneno, wahoneka okuti: “Ondaka ‘napandula’, kaituuka pala okupopia oñgeni ewaneno liahambukwa konthele yepiluluko olio. Onthue vakulu vomawaneno tuhole okutomphola oñgeni matuundapesa nawa otyinthiki otyo, ngetyi tyaita Ononkhalemutue mbo Nombangi—okulilongesa nombunga yetu.”
Jodi, omukai womukulu wewaneno, wahoneka okuti: “Onthue tuna ovana ovakainthu vetatu vomanima 15, 11, na 2. Pahe tuailukila mewaneno lionompholo. Otyo ankho tyimana omuwo omunyingi no nonkhono pala okupongiya omaliongiyo. Nepiluluko eli, pahe, tuna otyinthiki tyokulinga apeho efendelo liombunga!”
João na JoAnn, ovalinepi vamue ovakokoli-ndyila, vahoneka okuti: “Elilongeso lietu liombunga ankho tulinga vala pamue-pamue, mokonda tuna ovilinga ovinyingi mewaneno. Epongiyo eli epe, otyiawa Jeova etuavela tyitupameka mopaspilitu—inkha tuundapesa nawa omuwo oo ngetyi tyaitwa.”
Tony omukuendye umue una omanima 20 waholovona Muvali kongulohi opo alinge elilongeso liae. Mononthiki ononkhuavo mbo simano upongiya omaliongiyo ewaneno. Anthi, Tony wati “haunene ndyiyunga nawa Muvali.” Omokonda yatyi? “Mokonda otyinthiki otyo omuwo wange wakolela unene na Jeova.” Tony wahangununa okuti: “Mono ola onombali, ame ndyililongesa etyi tyipameka oupanga wange na Jeova. Ndyina vali omuwo wokulilongesa nokusokolola kuetyi natanga mono versikulu Mbombimbiliya.” Ouwa patyi tyampha? “Omalondolo a Jeova navasa apameka vali omutima wange tyipona kohale.” Okuti oe upondola okuava ongeleka? “Momukanda Estudo Perspicaz, ame natanga konthele youpanga ankho ukahi pokati ka David na Jonatan. Nelilongesa unene konthele yokuafuapo kua Jonatan. Omuenyo wavo wankhuatesako okutala nawa oityi tyihangununa okukala omapanga otyotyili. Ame tyotyili ndyiovola okuvasa vali omalumono Muvali motyinthiki tyelilongeso liange!”
Tyotyili, ovaumbili aveho va Jeova vena okupola esilivilo mokuundapesa nawa omuwo oo vapewa wokulilongesa nawa Ombimbiliya nefendelo liombunga.