Elilongeso Lioulike Nelilongeso Liombunga, Viakolela!
1. Esuko patyi Ononkhalamutue mbo Nombangi mba Jeova vena nonthue mononthiki mbuno, iya omokonda yatyi?
1 Ngokotyita tyotete, Ononkhalamutue mbo Nombangi mba Jeova, vasukalala unene nouwa wovanthu va Jeova. (Atos 15:6, 28) Nononkhumbi ononene mbukahi popepi, tyakolela unene kese muivisi Wouhamba apameke oupanga wae na Jeova. Oñgeni moundapesa omuvo una ankho uundapesa pala Elilongeso Liomukanda Mewaneno? Aveho vekahi nokupewa ondundo opo vaundapese omuvo oo pala okulilongesa Ombimbiliya nombunga. Okuundapesa omuvo oo nonondunge, matyituvatela okulilongesa vali nawa Ondaka ya Huku, nokupolako esilivilo.—Sal. 1:1-3; Rom. 11:33, 34.
2. Oñgeni tupondola okulinga elilongeso lietu liombunga kokangulohi?
2 Elilongeso Liombunga Kokangulohi: Onohongoi mbo nombunga, vekahi nokupewa ondundo opo vafuisepo otyilinga tyavo vapewa na Jeova, tyokukala no programa yokulilongesa Ombimbiliya apeho nombunga. (Deut. 6:6, 7) Ovakuatate vahanepele, no nomphange vehena ovilinga ovinene mombunga, vapondola okuundapesa omuvo oo pala okulinga elilongeso liavo lioulike, nokuovolola nawa momikanda omikuavo. Tyakolela atuho tuundapese nawa omuvo pala okulilongesa, nokusokolola nawa kuetyi tuelilongesa, opo tutualeko okupameka oupanga wetu na Jeova, namphila tukahi ‘mononthiki onondingavivi.’—Efé. 5:15, 16.
3, 4. Omikanda patyi tupondola okuundapesa opo tulinge elilongeso lietu, iya omokonda yatyi?
3 Oityi Mamulilongesa: O Índice das Publicações da Torre de Vigia ine o Biblioteca da Torre de Vigia mo CD-ROM, ipondola okukuvatela okuvasa etyi matyikuatesako ombunga yove okuvasa ehambu melilongeso liombunga. Onombunga mbupondola okulilongesa ononthele ombu mbumoneka apeho Mutala Womulavi: “Como Ter uma Familia Feliz,” “Ensine Seus Filhos,” nonthele yati “Para os Jovens.” Tupu, o Despertai! ina onthele yati “Jovens Perguntam-Respostas Práticas,” nononthele ononkuavo mbupopia kombinga yetungo.
4 Okutanga Ombimbiliya kumue tyahakuluminya, matyikuatesako aveho mombunga okuhinangela ovitumino via Huku, nokuviundapesa momuenyo wavo. (Heb. 4:12) Mononthiki ononkhuavo, mupondola okutala, nokuhipulula konthele yono video mbeongano. Mokala nomphitilo yokuholovona nawa etyi mamulilongesa, noñgeni mamulilongesa. Omokonda yatyi wahapulila ombunga yove oityi ovo vahanda okulilongesa?
5. Omokonda yatyi elilongeso lioulike, nelilongeso Liombimbiliya mombunga, viakolela unene momuenyo wetu hono?
5 Omokonda Yatyi Tyakolela Hono: Okupameka oupanga wetu na Jeova, matyitukalesa tyafuapo pala “okutualako tyapama nokukevelela eyovo ku Jeova.” (Êx. 14:13) Ovohe vesukisa ehongolelo lia Huku pala okutekula ovana ‘mouye uno wovivi.’ (Fil. 2:15) Ovana vesukisa ombatelo opo vetyivile okuanya ovituwa ovivi kosikola. (Pro. 22:3, 6) Opo ovalinepi vapameke otyinepo tyavo, tupu vesukisa okupameka oupanga wavo na Jeova. (Ecl. 4:12) Tutualeiko okuundapesa nonondunge omuvo wahupako opo tulipameke ‘mekolelo’ lietu!—Judas 20.