Oityi Tuesukisila Okuhumba Vokuakulupa?
KEKOMO lielunga mo Kalifornia, ko Amelika, kuvasiwa omuti umwe wokuapolua vali unene omalutalatu ouye auho. Vewihana okuti Sipreste Solitario. Vati omuti oo una omanima alamba po 250. Omuti oo omuwa wiiwe nawa mokonda utualako tyapama omanima omanyingi, ovanthu veulinga nawa mononkhalelo ononyingi. Wakutua nomapanda ovivela nokuatungilwa omamanya pehina pala okuupameka.
Omuti oo Sipreste Solitario, utuhinangelesa Ovakristau vokuakulupa vekahi pokati ketu, vokuakoleleya unene. Onkhalelo imwe yakolela vetyilinga, omokuivisa onondaka onongwa. Omuuli Joele wapopile okuti, “ovalume ovakulu” mavakaivisa onondaka mbo Mbimbiliya. (Joel 2:28-32; Atos 2:16-21) Nkhele soka onoola ovakulu ovo vaundapa nononkhono okuvatela vakuavo okunoñgonoka ‘onondaka onongwa mbouhamba wa Huku’! (Mateus 24:14) Vamwe povaivisi ovo Vouhamba wa Huku vokuakulupa, vakoleleya ononkhumbi vamoneswa, ine ovitateka ovikuavo omanima omanyingi. Inkha omuti oo sipreste wapandua mokonda utualako tyapama omanima omanyingi, nokuapamekwa nomapanda nokuatungilwa omamanya, ovakuatate vetu vokuakulupa pokati ketu, vatokala okupandwa vali unene, nokuhumbwa!
Jeova Huku watumine ovanthu vae kohale okuti: “Una okukatuka kolupala luonohuki onongonga nokuhumba una wakulupa.” (Levítico 19:32) Pokati kovaumbili va Jeova hono, tuvasapo onongeleka onongwa unene mbo vekolelo, ‘vaenda na Huku’ omanima omanyingi. (Miquéias 6:8) Putyina vatualako okuendela movitumino vio Vihonekwa, onohuki mbavo onongonga mbukala “otyaka tyouwa.”—Provérbios 16:31.
O apostolu Paulu walongele omukuendye Timoteo okuti: “Uhapopie omapita omukulu.” Anthi, Timoteo ankho una ‘okumuiita ngatyina ohe’ iya ‘ovakai ovakulu, ngatyina ovo ina.’ (1 Timóteo 5:1, 2) Moluotyo, Timoteo ankho una “okukatuka” kolupala luo vonohuki onongonga. Tyayandyuluka nawa, okuti Jeova uhanda onkhalelo yetu yokupopia ilekese okuti tuna ehumbilo.
Romanos 12:10 yati: “Kalei ovatete kokukala nehumbilo kese umwe na mukuavo.” Ovakulu vewaneno tyotyili vesukisa okuhumba Ovakristau vakulupa. Mahi, atuho tuna okukala ovatete kokuhumba vakuetu.
Tyotyili, kese umwe mombunga una otyilinga tyakolela konthele yo vohe novo ina kulu. Konthele yomuti Sipreste Solitario, ovanthu vaovola ononkhalelo mbokuuyunga, iya avatualako okulinga ngotyo. Nonthue, tuesukisa okuovola ononkhalelo mbokutualako okupanda ovo tate vakulupa, novo tate mbuale novo me kulu. Ngotyo, inkha tukala ovateheleli ovawa, matyitutyilika okulinga ovipuka monkhalelo onthue tuhanda, tyihatale oñgeni otyo tyikalesa vakuetu.—Provérbios 23:22; 1 Timóteo 5:4.
Vokuakulupa vekahi pokati ketu, vapandwa unene na Jeova. Oe keveyekepo. (Salmo 71:18) Huku yo tyotyili uvepameka opo vatualeko okumuumbila nekolelo. Nonthue tutualeiko okukuatesako vokuakulupa nokuvehumba.
[Olutalatu pefo 13]
Ngetyi omuti Sipreste Solitario wesukisa okupamekwa, no vokuakulupa vesukisa okupandwa nokuhumbwa
[Alandwa]
American Spirit Images/age fotostock