Jesus Walekesa Oñgeni Tupondola Okukala Nomuenyo Omuwa

NGETYI tuapopia monthele yokualamba, Jesus wakalele nomuenyo omuwa. Moluotyo, inkha tuhanda okukala nomuenyo omuwa, tuna okuhetekela ongeleka yae, nokutehelela onondonga mbae.

Jeova utulondola opo tulinge ngetyi tyilekesa otestu ikahi pombanda. Okuhetekela Jesus tyakutikinya okuendesila omuenyo wetu auho mongeleka, no momalongeso ae. Okulinga ngotyo, matyitukuatesako okupandwa na Huku nokukala nomuenyo omuwa.

Jesus walongesile onondonga ononyingi mbupondola okutukuatesako okumuhetekela. Onondonga ombo, mbumwe tumbuvasa Melongomona lio Komphunda. Tutalei onondonga mbumwe, noñgeni tupondola okumbuundapesa momuenyo wetu.

ONONDONGA: “Vena ehambu ovovana vaimbuka okuti vesukisa okulongeswa na Huku.”​—Mateus 5:3.

OÑGENI ONONDONGA OMBO MBUTUKALESA NOMUENYO OMUWA:

Jesus walekesile okuti ovanthu vatungwa nehando liokunoñgonoka Huku. Tuhanda okunoñgonoka omakumbululo omapulo ngaa: Tukahiko mokonda yatyi? Omokonda yatyi kuakalela ononkhumbi ononyingi? Okuti Huku wesuka umwe nonthue? Okuti vokuankhia vatualako nomuenyo komphangu onkhuavo? Tuesukisa okunoñgonoka omakumbululo omapulo oo opo tukale nomuenyo una esilivilo. Jesus ankho utyii okuti omakumbululo oo avasiwa vala Mondaka ya Huku. Etyi Jesus elikuambelele ku Tate yae, wati: “Ondaka yove otyili.” (João 17:17) Okuti Ondaka ya Huku ipondola umwe okutukuatesako okunoñgonoka Huku nokukala nehambu?

ETYI TYAMONEKELELE UMWE:

Esa ankho wiimba nawa o rock, iya ankho ukahi nokunkhimana. Nongotyo, ankho utupu ehambu liotyotyili. Wati: “Namphila ankho ndyihole unene okuimba, ankho ndyihanda otyipuka tyinkhalesa vali nehambu.” Mahi, mokueenda kuomuvo, Esa elivasi Nombangi imwe ya Jeova. Wati: “Nemulingile omapulo omanyingi. Onkhalelo ankhumbulula Novihonekwa yanthyuvisile, moluotyo andyitavela okulilongesa nae Ombimbiliya.” Etyi Esa alongesilwe Mombimbiliya, tyemuhikile komutima, atyimulundu okupakula omuenyo wae ku Jeova. Wati: “Kohale ankho apeho ndyilipaka movitateka ovinyingi, mahi pahe ndyina omuenyo omuwa.”a

ONONDONGA: “Vokuna okankhenda vena ehambu.”​—Mateus 5:7.

OÑGENI ONONDONGA OMBO MBUTUKALESA NOMUENYO OMUWA:

Okukala nokankhenda tyakutikinya okulingila vakuetu ovipuka oviwa. Jesus wakalele nokankhenda navana ankho vesukisa. Mokonda yokankhenda, waovolele okutepulula ononkhumbi mbavakuavo. (Mateus 14:14; 20:30-34) Tyina tukala nokankhenda nga Jesus, tuhambukwa, mokonda vokukala nokankhenda navakuavo vakala nehambu. (Atos 20:35) Tupondola okukala nokankhenda navakuetu mokuvepopila ovipuka oviwa, nokuvelingila oviwa, nokukuatesako vana vesukisa ombatelo yetu. Okuti okukala nokankhenda tyitukalesa umwe nomuenyo omuwa?

ETYI TYAMONEKELELE UMWE:

Maliya nomulume wae Carlos, vaava ongeleka ongwa konthele yokukala nokankhenda. Tate ya Maliya wasiuapo nomukai, iya momanima okualamba wavelele unene. Maliya na Carlos avemueta meumbo liavo, opo vemukuateseko. Pamwe ankho kavalala, iya tyina amankhinduka vahatekela kosipitali. Vapopia okuti otyo pamwe ankho tyiveponeswa unene. Mahi, vena ehambu, ngetyi Jesus apopile mokonda vetyii okuti vekahi nokuavela tate ya Maliya ombatelo esukisa.

ONONDONGA: “Vokuna ombembwa vena ehambu.”​—Mateus 5:9.

OÑGENI ONONDONGA OMBO MBUTUKALESA NOMUENYO OMUWA:

Tyina tulinga ononkhono mbokukala nombembwa navakuetu, tulinga oupanga novanthu aveho. Otyiwa okutavela elondolo eli Liombimbiliya: “Inkha tyitavela, muetyi muvila, kalei nombembwa novanthu aveho.” (Romanos 12:18) “Ovanthu aveho” vakutikinya ombunga yetu novanthu ovakuavo vehe Nombangi mba Jeova. Okuti okukala nombembwa “novanthu aveho” tyipondola umwe okutukalesa nomuenyo omuwa?

ETYI TYAMONEKELELE UMWE:

Tala ongeleka yomukai utiwa o Nair. Mokueenda kuomanima, wakalele novitateka ovinyingi, ankho vipondola okumukalesa tyehena ombembwa, haunene mombunga yae. Omulume wae wemusapo, iya atekula ovana vae aike, omukuendye nomukainthu, mokueenda kuomanima 15. Omukuendye watyo ahimbika okusipa epangwe, iya apeho ankho unumana unene nokuvelinga onya. Nair utavela okuti etyi elilongesile Mombimbiliya tyemuavela ononkhono mbokukala nombembwa, namphila ankho ena otyitateka otyo. Ankho ulityilika okutañguna ine okulwa. Ankho ulinga ononkhono mbokukala noluembia, nokankhenda, nokutehelela nawa vakuavo. (Efésios 4:31, 32) Nair una onthumbi yokuti okulilongesa okukala nombembwa tyemukuatesako okukala noupanga omuwa nombunga yae novanthu ovakuavo.

SOKA KOMUTWE WANDYILA

Inkha tulandula elondolo olio ewa lia Jesus, matukala nehambu nomuenyo omuwa. Mahi, opo tukale nomuenyo omuwa wotyotyili, tupu tuesukisa okunoñgonoka etyi matyikamoneka komutwe wandyila. Haunene, oñgeni matukala nomuenyo omuwa tyina atuho tutyii okuti matukulupa, nokuvela, konyima atunkhi? Ovio ovipuka vikahi nokumoneka mouye uno.

Mahi, kuna onondaka onongwa! Jeova wapakela ononkhano onongwa aveho valinga ononkhono “mbokueenda ngetyi Jesus aendele.” Jeova walaa okuti apa katutu makaetako ouye omupe wouviuki, omu ovanthu vekolelo mavakakala apeho nekongoko ewa ngetyi Jeova ahandele. Ondaka Yae yati: “Ekaka lia Huku likahi pokati kovanthu, iya oe makakala navo, ovo mavakakala ovanthu vae. Iya Huku muene makakala navo. Huku makasekuna ononkhuka momaiho avo, ononkhia, okulila, no nongembia kamavikakalako vali. Mokonda ovipuka ovio aviho mavikalamba.”—Revelação 21:3, 4. 

Maliya wokuna omanima 84, wapopiua monthele yotete, uhambukwa tyina asoka okuti onondaka ombo mambukafuiswapo. Iya ove? Uhanda okunoñgonoka vali konthele “yomuenyo omuwa” maukeya Mouhamba wa Huku? (1 Timóteo 6:19) Inkha uhanda, ita Konombangi mba Jeova apa ukala ine uhonekela kovahoneki vomukanda ou.b