Kamakukala Vali Oviponga!
INKHA omunthu umwe ukupopila okuti, “kamakukala vali ovinimawe,” oñgeni ukala? Ove upondola okumukumbulula okuti, “Otyo ondyoi vala. Oviponga omuenyo wetu.” Ine upondola okupopia vala momutima okuti, ‘Unyana vala!’
Namphila oviponga vimoneka ngoti mavitualako apeho, tupondola okukala nonthumbi yokuti mavikapuako. Mahi, kamavikapuako kononkhono mbovanthu. Ovanthu kavetyivili okunoñgonoka nawa oñgeni ovipuka ovio vimoneka, nomokonda yatyi, tupu kavetyivili okuvityilika. Salomau Ohamba yo Isilayeli yokohale ankho wiiwe mokonda younongo wae, wahoneka okuti: “Ovanthu kavetyivili okunoñgonoka ovilinga vialingwa mombuelo yekumbi, namphila ovanthu vaundapa unene opo vevinoñgonoke, nongotyo kavevinoñgonoka. Iya namphila vapopia okuti ovanongo unene opo vevinoñgonoke, kavetyivilile okuvinoñgonoka.”—Eclesiastes 8:17.
Inkha ovanthu kavapondola okumanako oviponga, olie mevimaneko? Ombimbiliya ipopia okuti Omupakeko wetu oe mevimaneko. Oe walinga ovipuka aviho, pohi no keulu. (Eclesiastes 1:7) Iya tyelikalela novanthu, Huku una epondolo liahapu. Omuuli Jeremia wapopia nawa konthele yotyo okuti: “Tatekulu Hamba Jeova! Tala, ove muene walinga nepondolo liove enene eulu noohi, nokuoko kuove kuatandavela. Ove utupu natyike tyikupuiya.” (Jeremias 32:17) Mokonda o Huku walinga oohi natyiho tyilimo, tyotyili oe utyii oñgeni malingi ovipuka opo ovanthu vakalemo nombembwa nepamo.—Salmo 37:11; 115:16.
Mahi, oñgeni Huku makaetako omapiluluko oo? Ovipuka ovinyingi ovivi vikahi nokupita hono pano pohi, vilinga onthele “yenyingilikilo” lilekesa “onthyulilo youye.” Jesus wati: “Inkha muatala okuti ovipuka evi vikahi nokumoneka, noñgonokei okuti ouhamba wa Huku ukahi popepi.” (Mateus 24:3; Lucas 21:31) Ouhamba wa Huku, outumini wokeulu walingua na Huku, maukalinga omapiluluko omanene pano pohi, alo umwe okumanako ovipuka vietela ovanthu ononkhumbi. Namphila Jeova Huku ena epondolo liokutyilinga, oe waavela otyilinga otyo Omona wae. Omuuli Daniele wapopia konthele yomona oo okuti: “Wapeua outumini, nounene, nouhamba, opo ovanthu aveho, novilongo, nomalaka vemuumbile.”—Daniel 7:14.
Omona wa Huku, Jesus Kristu, wapeua epondolo lituuka opo apilulule oohi ikale omphangu ongwa. Omanima 2000 konyima etyi Jesus ali pano pohi, oe walekesile vala katutu epondolo liae liokuyunga ononkhono mbo ohi. Nthiki imwe etyi oe novalongwa vae valinga oungendi nowato Melunga lio Galileia, “kuakatuka epuku-puku enene, iya omakufikufi aahimbika okuveta mowato, auhimbika okuyula omeva.” Ovalongwa vae avatili unene owoma. Mokonda ankho vasoka okuti mavankhi, vaya ku Jesus. Oityi Jesus alinga? Oe “waviyula omphepo, apopila elunga okuti: ‘Uti filu! Uhaviele!’ Iya omphepo aitulu, apakala etuliyo limwe enene.” Ovalongwa vae avahuvu, iya avapulu okuti: “Naina ou olie, mokonda alo umwe omphepo nelunga vimutavela?”—Marcos 4:37-41.
Tunde opo, Jesus waya keulu apewa epondolo enene noutumini. Mokonda Ohamba Youhamba wa Huku, oe una otyilinga nounongo wokulinga omapiluluko aeho esukisa opo ovanthu vakale nomuenyo wombembua nepamo pano pohi.
Mahi, ngetyi tuhole okumona, ovitateka ovinyingi, noviponga, vietuako novanthu velungavi. Oityi Ouhamba wa Huku maukalinga vana vatualako novituwa ovio, avehetavela okupiluluka? Ombimbiliya ipopia okuti Tatekulu Jesus matundu “keulu, kumwe no noandyu mbae mbononkhono ononene. Notupia tuatema, opo afete vana vehei Huku, na vana vehetavela onondaka onongwa konthele ya Tatekulu yetu Jesus.” Tyotyili oe “makahanyako vana vekahi nokuhanyauna oohi.”—2 Tessalonicenses 1:7, 8; Revelação 11:18.
Konyima yotyo, “Ohamba yo nohamba,” Jesus Kristu, makayunga ononkhono ambuho mbo ohi. (Revelação 19:16) Oe makalinga atyiho opo vana mavakatuminwa Nouhamba vahamone vali ononkhumbi. Oe makaundapesa ononkhono mbae opo aonganeke nawa ovipuka aviho pano pohi pala okuetela ovanthu ouwa. Otyo matyikafuisapo etyi Jeova Huku alaele ovanthu vae tunde kohale, okuti: “Mandyilokesa ombila yenyi momuvo watyo, iya oohi maiyave ovikulia, iya omuti womepia mauwimi ovinyango.” (Levítico 26:4) Ovanthu mavakatunga onondyuo avahakala nowoma wokuti mambuhanyua notyiponga tyimwe: “Tyotyili, mavakatunga onondyuo avakalamo, mavakatuika omiti avakalia ovinyango viavio.”—Isaías 65:21.
Oityi Una Okulinga?
Tyotyili ove, novanthu ovakuavo, muhambukwa nolusoke luokukakala mouye uhena vali oviponga. Mahi, oityi una okulinga opo ukakalemo? Mokonda “vana vehei Huku” na “vana vehetavela onondaka onongwa” kamavakakala mouye uhena oviponga ukahi popepi, tyayandyuluka nawa okuti una okulilongesa konthele ya Huku nokuvatela outumini wae pano pohi. Huku uhanda tumunoñgonoke, nokutavela onondaka onongwa Mbouhamba oe avialeka menyina Liomona wae.
Onkhalelo ongwa yokutyilinga okulilongesa Ombimbiliya nombili. Oyo, ina onondonga ove wesukisa opo ukakale nepamo moutumini Wouhamba. Omokonda yatyi uhaitila Onombangi mba Jeova vekukuateseko okulilongesa etyi Ombimbiliya ilongesa? Ovo mavekukuatesako nehambu. Tyotyili inkha ulinga ononkhono mbokunoñgonoka Huku nokutavela onondaka onongwa, onondaka ombu mba Provérbios 1:33 mambukelifuilapo momuenyo wove, mbati: “Una unthehelela, makakala netuliyo, iya kamakasukalala nowoma wotyiponga.”